ଲକ୍ଷ୍ନୌ: ବିଏସପି ସୁପ୍ରିମୋ ମାୟାବତୀ ଲକ୍ଷ୍ନୌର ବହୁଜନ ସମାଜ ପ୍ରେରଣା କେନ୍ଦ୍ରରେ ତାଙ୍କ ପ୍ରତିମୂର୍ତ୍ତୀ ଲଗାଇବା ଖବରକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି । ଏହାକୁ ଭୁଲ ଉପାୟରେ ଉପସ୍ଥାପନା କରାଯାଉଛି ବୋଲି ସେ କହିଛନ୍ତି। ଏହା ସହିତ ଉତ୍ତର ପ୍ରଦେଶରେ ଏବେ ଆଇନ ଶୃଙ୍ଖଳା ବ୍ୟବସ୍ଥା କୋମାକୁ ଚାଲିଯାଉଛି ବୋଲି କହିଛନ୍ତି ମାୟାବତୀ ।
ମାୟାବତୀ ଗୁରୁବାର ଟ୍ବିଟ କରି କହିଛନ୍ତି, ଦେଶରେ ସରକାରୀ, ଅଣ-ସରକାରୀ ଏବଂ ସର୍ବସାଧାରଣ ସ୍ଥାନ ଗୁଡ଼ିକରେ ସ୍ଥାପିତ ମୂର୍ତ୍ତି ଗୁଡ଼ିକର ସ୍ବଚ୍ଛତା, ମରାମତି ଏବଂ ରକ୍ଷଣାବେକ୍ଷଣର ଧ୍ୟାନ ରଖାଯାଉନାହିଁ ।
କିନ୍ତୁ ବିଏସପି ଏହି ଦିଗରେ ସର୍ବଦା ଧ୍ୟାନ ଦିଏ । କେବଳ ସରକାରୀ ସ୍ଥାନ ତଥା ସ୍ଥାନ ନୁହେଁ ବରଂ ଘର ଏବଂ ଘରୋଇ ସ୍ଥାନରେ ମଧ୍ୟ ସ୍ଥାପିତ ମୂର୍ତ୍ତିକୁ ପରିଷ୍କାର ପରିଚ୍ଛନ୍ନତା, ମରାମତି ଏବଂ ରକ୍ଷଣାବେକ୍ଷଣ ଉପରେ ବିଏସପି ସର୍ବଦା ବିଶେଷ ଧ୍ୟାନ ଦେଇଥାଏ। ଏହି କାରଣରୁ ଲକ୍ଷ୍ନୌ ପ୍ରେରଣା କେନ୍ଦ୍ରରେ ମୋ ପ୍ରତି ମୂର୍ତ୍ତିର ସଫାସୁତୁରା ହେଉଥିଲା । ଯାହାକୁ ଭୁଲ ଭାବରେ ଉପସ୍ଥାପନା କରାଯାଉଛି ବୋଲି ମାୟାବତୀ କହିଛନ୍ତି ।
ସୂଚନାଯୋଗ୍ୟ ଯେ, ଲକ୍ଷ୍ନୌର ବହୁଜନ ସମାଜ ପ୍ରେରଣା କେନ୍ଦ୍ରରେ ସ୍ଥାପିତ ହୋଇଥିବା ବିଏସପି ସୁପ୍ରିମୋ ମାୟାବତୀଙ୍କ ନୂତନ ପ୍ରତିମୂର୍ତ୍ତିର ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। କୁହାଯାଉଛି ଯେ ମାୟାବତୀ ମାର୍ବଲରେ ନିର୍ମିତ ଚାରୋଟି ନୂତନ ମୂର୍ତ୍ତି ସେଠାରେ ସ୍ଥାପନ କରିଛନ୍ତି। କିନ୍ତୁ ଏହି ଫଟୋ ଭାଇରାଲ ହେବା ପରେ ମାୟାବତୀ ନିଜ ପ୍ରତିକ୍ରିୟା ଦେଇଛନ୍ତି ।
ତେବେ ବିଏସପି ସହ ଜଡିତ ସୂତ୍ରରୁ ପ୍ରକାଶ ଯେ, ଏହି ପ୍ରତିମୂର୍ତ୍ତି ଲକ୍ଷ୍ନୌର ବହୁଜନ ସମାଜ ପ୍ରେରଣା କେନ୍ଦ୍ରରେ ଲଗାଯାଉଛି। ଏହା ନୂଆ ନୁହେଁ କିନ୍ତୁ ଏହାର ନବୀକରଣ ପରେ ଏହାକୁ ସ୍ଥାପନ କରାଯାଉଛି । କିଛି ମୂର୍ତ୍ତି ଭିତରେ ରଖାଯାଇଥିଲା, ସେମାନଙ୍କୁ ସଫା କରାଯାଇ ଏକ ଭିନ୍ନ ସ୍ଥାନରେ ରଖାଯାଉଛି । ଗୁରୁବାର, ଯେତେବେଳେ ମୂର୍ତ୍ତିଗୁଡ଼ିକ ସ୍ଥାପିତ ହୋଇଛି, ଲୋକମାନେ ଏ ବିଷୟରେ ଜାଣିବାକୁ ପାଇଛନ୍ତି । ଏହି ମୂର୍ତ୍ତିଗୁଡ଼ିକୁ ଦେଖି ଲୋକମାନେ ବିଭିନ୍ନ ପ୍ରକାରର ଆଲୋଚନା କରୁଛନ୍ତି ବୋଲି ସେ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
