ଚେନ୍ନାଇ: ଚୋର ସନ୍ଦେହରେ ଗ୍ରାମବାସୀଙ୍କ ନିସ୍ତୁକ ମାଡରେ ସନ୍ଦିଗ୍ଧ ଯୁବକଙ୍କ ମୃତ୍ୟୁ । ତାମିଲନାଡୁ ତ୍ରିଚି ସହରର ଜୀୟାପୁରମ ଅଞ୍ଚଳରେ ଏଭଳ ନୃଶଂସ କାଣ୍ଡ ଘଟିଛି । ଏହି ଆକ୍ରମଣରେ ଆଉ ଏକ ଯୁବକ ମଧ୍ୟ ଗୁରୁତର ଆହତ ହୋଇଛନ୍ତି । ଗୁରୁତର ଯୁବକଙ୍କୁ ମହାତ୍ମା ଗାନ୍ଧି ମେମୋରିଆଲ ସରକାରୀ ମେଡିକାଲରେ ଭର୍ତ୍ତି କରାଯାଇଛି । ମୃତକ ଜଣକ କେରଳର 30 ବର୍ଷୀୟ ଦୀପୁର ଏବଂ ଆହତ 25 ବର୍ଷୀୟ ଅରବିନ୍ଦ ବୋଲି ଜଣାପଡିଛି ।
ସୂଚନାଯୋଗ୍ୟ, ଶୁକ୍ରବାର ଅପରାହ୍ନରେ ତ୍ରିଚି ଆଲୁର ଗ୍ରାମରେ ଦୀପୁର ନାମକ ଯୁବକ ତାଲା ଭାଙ୍ଗି ଏକ ଘର ଖୋଲିବାକୁ ଚେଷ୍ଟା କରୁଥିଲେ ଏବଂ ଯୁବକଙ୍କ ସହ ତାଙ୍କ ସହଯୋଗୀ ଅରବିନ୍ଦ ମଧ୍ୟ ଉପସ୍ଥିତ ଥିଲେ । ତେବେ ସେମାନେ ଚୋରି କରିବାକୁ ଉଦ୍ୟମ କରୁଥିବା ଭାବି ସେଠାକାର ଗ୍ରାମବାସୀ ତାଙ୍କୁ ବିରୋଧ କରି ଏକ ରଶିରେ ବାନ୍ଧି ନିସ୍ତୁକ ମାଡ ଦେଇଥିଲେ । ଫଳରେ ସମ୍ପୃକ୍ତ ଯୁବକ ଓ ତାଙ୍କର ସହଯୋଗୀ ଗୁରୁତର ଆହତ ହୋଇଥିଲେ ।
ପୋଲିସ ଏ ସମ୍ପର୍କରେ ଖବର ପାଇ ଘଟଣାସ୍ଥଳରେ ପହଞ୍ଚିଥିଲା ଏବଂ ଗୁରୁତର ଅବସ୍ଥାରେ ଉଭୟଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲା । ମାତ୍ର ଶନିବାର ଦିନ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ତେବେ ବାସ୍ତବରେ କଣ ଘଟିଥିଲା ସେ ସମ୍ପର୍କରେ ପୋଲିସ ଖୋଳତାଡ କରୁଛି ଏବଂ ଏନେଇ ଥାନାରେ ଏକ ମାମାଲା ରୁଜୁ କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
