ମୁମ୍ବାଇ: 57 ବର୍ଷୀୟ ବ୍ୟକ୍ତିଙ୍କ ଆତ୍ମହତ୍ୟା । ମହାରାଷ୍ଟ୍ର ନାଗପୁରରେ ଜଣେ 57 ବର୍ଷୀୟ ବ୍ୟକ୍ତି ନିଜ ଦେହରେ ନିଆଁ ଲଗାଇ ଆତ୍ମହତ୍ୟା କରିଥିବା ଜଣାପଡିଛି । ତେବେ ଆତ୍ମହତ୍ୟାର କାରଣ ଜାଣିଲେ ଆପଣ ମଧ୍ୟ ଚକିତ ହେବେ ।
ସୂଚନା ଅନୁଯାୟୀ, ନାଗପୁରର ୟଶୋଧରା ନଗରରେ ସମ୍ପୃକ୍ତ ବ୍ୟକ୍ତି ଜଣଙ୍କ ନିଜ ପରିବାର ସହିତ ରୁହନ୍ତି । ତାଙ୍କ ପରିବାର ଲୋକଙ୍କ କହିବା ଅନୁଯାୟୀ, ଗତ ସପ୍ତାହରେ 40,000 ଟଙ୍କାର ବିଦ୍ୟୁତ ବିଲ୍ ଆସିଥିଲା । ଯାହାକୁ ନେଇ ସେ ଚକିତ ହେବା ସହ ଚିନ୍ତିତ ରହୁଥିଲେ । ଏହାପର ଠାରୁ ସେ ଅତ୍ୟଧିକ ମଦ ମଧ୍ୟ ପିଉଥିଲେ ।
ତେବେ ଶନିବାର ଅପରାହ୍ନରେ ସେ ନିଜ ଦେହରେ କିରୋସିନ ଢାଳି ଆତ୍ମହତ୍ୟା ଉଦ୍ୟମ କରିଥିଲେ । ଏହାପରେ ତାଙ୍କ ପରିବାର ଲୋକ ଗୁରୁତର ଅବସ୍ଥାରେ ତାଙ୍କୁ ମେଡିକାଲ ନେଇଥିଲେ । ଯେଉଁଠାରେ ତାଙ୍କର ମୃତ୍ୟୁ ଘଟିଛି । ଏପଟେ ଘଟଣାସ୍ଥଳରୁ କୌଣସି ସୁଇସାଇଡ ନୋଟ୍ ମିଳିନଥିବା ବେଳେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
