ଜୌନପୁର: ଦେଶର ଏକମାତ୍ର ଅଫିସର ଗାଁ ହେଉଛି ଉତ୍ତରପ୍ରଦେଶର ମାଧବପଟ୍ଟି ଗାଁ । ପ୍ରଶାସନିକ ଅଧିକାରୀଙ୍କ ଗାଁ ମାଧବପଟ୍ଟି । ଏକଥା ଆମେ କହୁନୁ, କହୁଛି ଏହି ଗାଁର ପ୍ରତ୍ୟେକ ଘର ଓ ପରିବାର । ଏହି ଗାଁରେ ମାତ୍ର 75ଟି ଘର ରହିଥିବା ବେଳେ ଏଥିରୁ ବାହାରିଛନ୍ତି 51 ଅଫିସର । 51 ଜଣ ଅଫିସରଙ୍କ ମଧ୍ୟରେ ଅନେକ ଏବେ ବିଦେଶରେ ମଧ୍ୟ ନିଜ କର୍ତ୍ତବ୍ୟ ତୁଲାଉଛନ୍ତି । ତେବେ ଗାଁରୁ ଅଫିସର ହେବାର ପ୍ରକ୍ରିୟା 1952 ମସିହାରୁ ଆରମ୍ଭ ହୋଇଛି ।
ଜୌନପୁର ମୁଖ୍ୟାଳୟ ଠାରୁ ମାତ୍ର 10 କିମି ଦୂରରେ ରହିଛି ମାଧବପଟ୍ଟି ଗାଁ । ତେବେ ଏହି ଗାଁ ଅଫିସରଙ୍କ ଗାଁ ନାମରେ ପୁରା ଦେଶରେ ପରିଚିତ ଅଛି । 1952 ମସିହାରେ ପ୍ରକାଶ ସିଂ ସଫଳତା ହାସଲ କରିଥିଲେ । ଏହା ପରେ ଗାଁରୁ ପ୍ରତ୍ୟେକ ବର୍ଷ କେହି ନା କେହି ପ୍ରଶାସନିକ ସେବାରେ ସଫଳତା ହାସଲ କରି ଆସୁଛନ୍ତି ।
ତେବେ ଏହି ଗାଁର ଇନ୍ଦୁ ପ୍ରକାଶ ସିଂ ଓ ତାଙ୍କର 4 ଭାଇ ପ୍ରଶାସନିକ ସେବାରେ ଯୋଗଦେଇ ଦେଶର ସେବାରେ ନିଜକୁ ନିୟୋଜିତ କରିଛନ୍ତି । ଏହି ଗାଁରୁ କେବଳ ପ୍ରଶାସନିକ ଅଧିକାରୀ ନୁହଁନ୍ତି, ବରଂ ବୈଜ୍ଞାନିକ ମାନେ ମଧ୍ୟ ସୃଷ୍ଟି ହୋଇଛନ୍ତି । ଅନେକ ବୈଜ୍ଞାନିକ ଦେଶ ବାହାରେ କାର୍ଯ୍ୟରତ ଅଛନ୍ତି । ଗାଁର ପ୍ରତ୍ୟେକ ଯୁବଗୋଷ୍ଠୀ ଉଚ୍ଚ ପଦାଧିକାରୀ ହେବା ପାଇଁ ଚେଷ୍ଟିତ ।
ଏହି ଗାଁର ଅବସରପ୍ରାପ୍ତ ପ୍ରଫେସର ସଜ୍ଜଲ ସିଂ କହିଛନ୍ତି ଇନ୍ଦୁ ସିଂ ଗାଁର ପ୍ରଥମ ପ୍ରଶାସନିକ ଅଧିକାରୀ । ଏହା ପରେ ତାଙ୍କ ପରିବାରର 14 ଜଣ ପ୍ରଶାସନିକ ଅଧିକାରୀ ହୋଇ ସାରିଛନ୍ତି । ସେମାନଙ୍କ ମଧ୍ୟରେ ଅନେକ ଆଇଏଏସ ଓ ଆଇପିଏସ ହୋଇଛନ୍ତି ବୋଲି ସେ କହିଛନ୍ତି ।
