ନୂଆଦିଲ୍ଲୀ: ଆଉ ମାତ୍ର ଗୋଟିଏ ଦିନ ପରେ ନିର୍ଦ୍ଧାରଣ ହେବ ନେତାଙ୍କ ଭାଗ୍ୟ । ଜନାଦେଶ କାହାକୁ ଯାଇଛି ତାହା ସାରା ଦେଶ ଜାଣିବ । ହେଲେ ନିର୍ବାଚନ ପୂର୍ବରୁ ଦେଖିବାକୁ ମିଳିଥିଲା ବହୁ କସରତ । ଦଳ ଡିଆଁ ଠାରୁ ଆରମ୍ଭ କରି ଦଳ ବିରୋଧୀ ମନ୍ତବ୍ୟ ହେଉ ବା ଦଳର ମଙ୍ଗ ସମ୍ଭାଳିବା ହେଉ ପ୍ରତିଟି ଦଳରେ ଦେଖିବାକୁ ମିଳିଥିଲା ଏମିତି କିଛି ଚିତ୍ର । ତେବେ ଚର୍ଚ୍ଚା ସେତେବେଳେ ଜୋର ଧରିଥିଲା ଯେତେବେଳେ ପ୍ରିୟଙ୍କା ଗାନ୍ଧୀ କଂଗ୍ରେସର ମହାସଚିବ ଦାୟିତ୍ବରେ ରହିଲେ । ଏହାପରେ ଫୁଲ ଆକ୍ସନ ମୁଡରେ ଆସିଥିଲେ ଏହି ଲେଡି । ପ୍ରଚାର କରିବାକୁ ଗଳିକନ୍ଦିରେ ପହଞ୍ଚିଥିଲେ । ଆଉ କେବେକେବେ ସାଥ ଦେଉଥିଲେ ସାନଭାଇ ରାହୁଲ ଗାନ୍ଧୀ । ଆଉ ଏହି 2 ଜଣଙ୍କ ପରିଶ୍ରମ ଫଳଫଳରେ ପ୍ରତିଫଳିତ ହେବ ବୋଲି କହିଛି ଶିବସେନା ।
ଏକଜିଟ ପୋଲରେ ଏନଡିଏକୁ ବହୁମତ ମିଳିବା ଚର୍ଚ୍ଚା ଜୋର ଧରିଛି । ଆଉ ଏଭଳି ସ୍ଥିତିରେ କଂଗ୍ରେସକୁ ଇଙ୍ଗିତ କରିଛି ଶିବସେନା । ଦଳ ନିଜର ମୁଖପତ୍ର ‘ସାମନା’ର ସମ୍ପାଦକୀୟରେ ଲେଖିଛି, ଚଳିତ ନିର୍ବାଚନରେ ରାହୁଲ ଓ ପ୍ରିୟଙ୍କା କଠିନ ପରିଶ୍ରମ କରିଛନ୍ତି । ଆଉ ଏହା ଫଳଫଳରେ ପ୍ରତିଫଳିତ ହେବ । ବିରୋଧୀ ଦଳ ଆସନରେ ବସିବା ପାଇଁ କଂଗ୍ରେସକୁ ପର୍ଯ୍ୟପ୍ତ ଆସନ ମିଳିବ । ଅନ୍ୟପଟେ ଏନଡିଏକୁ ବହୁମତ ମିଳିବା ପକ୍କା ବୋଲି କହିଛି ଶିବସେନା । ଦେଶର ଜନତା ବହୁ ପୂର୍ବରୁ ମୋଦିଙ୍କୁ ପୁଣିଥରେ ପ୍ରଧାନମନ୍ତ୍ରୀ କରିବା ପାଇଁ ନିଷ୍ପତ୍ତି ନେଇସାରିଥିଲେ ବୋଲି ଦଳ କହିଛି ।
