ନୂଆଦିଲ୍ଲୀ: ସମସ୍ତଙ୍କୁ ଚଢିଛି ଟିକଟକରେ ଭିଡିଓ କରିବା ନିଶା । ଏହି ନିଶା ଏମିତି ଘାରିଛିଯେ, କିଏ କେଉଁ ଅବସ୍ଥାରେ ଅଛି ତାହା ଭାବିବାକୁ ମଧ୍ୟ ନାରାଜ । ୟୁପି ପରେ ଏବେ ଦିଲ୍ଲୀରେ 2 ଜଣ ମହିଳା ପୋଲିସ ଡ୍ୟୁଟି ସମୟରେ ଖାକି ପୋଷାକରେ ଟିକଟକ ଭିଡିଓ କରିଛନ୍ତି ଯେଉଁଥାପାଇଁ ତାଙ୍କୁ ଏବେ ହଟହଟା ହେବାକୁ ପଡିଛି ।
ସୂଚନାମୁତାବକ, 2018ରେ ଉଭୟ ମହିଳା ପୋଲିସରେ ଭର୍ତ୍ତି ହୋଇଥିଲେ। ସେମାନେ ନୂଆଦିଲ୍ଲୀରେ ହିଁ ଡ୍ୟୁଟି କରୁଥିଲେ। ପୋଲିସ ଚେକପୋଷ୍ଟ ପାଖରେ ଠିଆ ହୋଇ ଏହି ଭିଡିଓ ସୁଟ କରିଥିଲେ । 15 ସେକେଣ୍ଡର ଏକ ହରିୟାଣୀ ଗୀତରେ ଡ୍ୟାନ୍ସ କରିଥିବା ଏହି ମହିଳା ପୋଲିସ କର୍ମୀଙ୍କ ଭିଡିଓ ଏବେ ଭାଇରାଲ ହେବାରେ ଲାଗିଛି ।
ପୋଲିସର ଜଣେ ଅଧିକାରୀଙ୍କ କହିବା ଅନୁସାରେ, ଭାଇରାଲ ହୋଇଥିବା ଏହି ଟିକଟକ ଭିଡିଓ ଖୁବ ଶିଘ୍ର ଅଧିକାରୀଙ୍କ ପାଖରେ ପହଞ୍ଚିଯାଇଥିଲା । ଏହାପରେ ଉଭୟଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଆଦେଶ ଦିଆଯାଇଛି।
ଏହାପୂର୍ବରୁ ମଧ୍ୟ ଦିଲ୍ଲୀ ପୋଲିସର ଜଣେ ପୋଲିସ କର୍ମୀ ଗାଡି ଉପରେ ଠିଆ ହୋଇ ଷ୍ଟଣ୍ଟ କରୁଥିବାର ଏକ ଭିଡିଓ ଭାଇରାଲ ହୋଇଥିଲା । ଏହାପରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇ କାରଣ ଦର୍ଶାଅ ନୋଟିସ ପଠାଯାଇଥିଲା ।
