ଥିରୁଅନନ୍ତପୁରମ: କେରଳର କୋଜିକୋଡ ଅନ୍ତର୍ଜାତୀୟ ବିମାନବନ୍ଦରରେ ପ୍ରବେଶ କଲା ମହାମାରୀ କୋରୋନା । ବିମାନବନ୍ଦର ଟର୍ମିନାଲ ମ୍ୟାନେଜର କୋରୋନା ପଜିଟିଭ ଚିହ୍ନଟ । ଫଳରେ 30 ଜଣ କର୍ମଚାରୀଙ୍କୁ କ୍ବାରେଣ୍ଟିନକୁ ଯିବାକୁ କୁହାଯାଇଛି ବୋଲି ଅଧିକାରୀମାନେ କହିଛନ୍ତି । ଜିଲ୍ଲା କଲେକ୍ଟର ଜାଫର ମଲିକ ଏନେଇ ସୂଚନା ଦେଇଛନ୍ତି ।
ସ୍ୱାସ୍ଥ୍ୟ ବିଭାଗର ଅଧିକାରୀଙ୍କ ଅନୁସାରେ, ମ୍ୟାନେଜରଙ୍କ ରକ୍ତ ନମୁନା ଜୁନ୍ 7 ରେ ସଂଗ୍ରହ କରାଯାଇଥିଲା । ଶନିବାର ରିପୋର୍ଟ ପଜିଟିଭ ଆସିବା ପରେ ତାଙ୍କ ସହ କାର୍ଯ୍ୟରତ ସହକର୍ମୀଙ୍କୁ କ୍ବାରେଣ୍ଟାଇନରେ ରଖାଯାଇଛି । ହେଲେ ତାଙ୍କ ଶରୀରରେ କୋରୋନାର କୌଣସି ଲକ୍ଷଣ ନଥିଲା । ଶନିବାର ମଧ୍ୟ ଡ୍ୟୁଟିରେ ଥିଲେ ବୋଲି ଜଣାପଡିଛି। ଫଳରେ ମ୍ୟାନେଜରଙ୍କ ସହ ସଂସ୍ପର୍ଶରେ ଥିବା କର୍ମଚାରୀଙ୍କୁ କ୍ବାରେଣ୍ଟିନରେ ରହିବାକୁ କୁହାଯାଇଛି।
ଏଥିରେ ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆର ଅଧିକାରୀ, ଏୟାର କଷ୍ଟମ୍ସ ଏବଂ କେନ୍ଦ୍ରୀୟ ଶିଳ୍ପ ସୁରକ୍ଷା ବଳର ଅଧିକାରୀ ଅଛନ୍ତି ବୋଲି ସୂତ୍ରରୁ ପ୍ରକାଶ । ସେ ବିମାନବନ୍ଦରରେ ଏବଂ ବାହାରେ ଡ୍ୟୁଟିରେ ଥିବାବେଳେ ଅଧିକାରୀଙ୍କ ସମ୍ପର୍କ ଅନୁସନ୍ଧାନ କରିବାକୁ ଚେଷ୍ଟା କରୁଛନ୍ତି । ଟର୍ମିନାଲ୍ କ୍ଷେତ୍ର ଏବଂ ଅନ୍ୟାନ୍ୟ ବିମାନବନ୍ଦର ପରିସର ଯେଉଁଠାରେ ଅଧିକାରୀ ଗତ ସପ୍ତାହରେ ରହିଥିଲେ, ତାହା ବିଶୋଧନ କରାଯିବ । ଏଏଆଇର ଜଣେ ଅବସରପ୍ରାପ୍ତ ବରିଷ୍ଠ ଅଧିକାରୀ କହିଛନ୍ତି, “ଆଜି ରାତି ସୁଦ୍ଧା କିମ୍ବା ରବିବାର ସକାଳ ସୁଦ୍ଧା ବିଶୋଧନ ପ୍ରକ୍ରିୟା ଶେଷ ହେବ ବୋଲି ଆଶା କରାଯାଉଛି।
