ଭୁବନେଶ୍ବର: ନିଜର ପଞ୍ଚମ ପାରି ଆରମ୍ଭ କରିବାକୁ ଯାଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପଞ୍ଚମଥର ପାଇଁ ମୁଖ୍ଯମନ୍ତ୍ରୀ ଭାବେ ଶପଥ ଗ୍ରହଣ କରୁଛନ୍ତି ସେ । ସକାଳ 10 ଟା 30 ସମୟରେ ଭୁବନେଶ୍ବର ପ୍ରଦର୍ଶନୀ ପଡିଆରେ ରାଜ୍ୟପାଳ ପ୍ରଫେସର ଗଣେଶୀ ଲାଲ ତାଙ୍କୁ ପଦ ଓ ଗୋପନୀୟତାର ଶପଥପାଠ କରାଇବେ। ତେବେ ମୁଖ୍ୟମନ୍ତ୍ରୀଙ୍କ ସହ ତାଙ୍କର ୨୦ ଜଣିଆ ମନ୍ତ୍ରୀମଣ୍ଡଳ ମଧ୍ୟ ଏହି ଉତ୍ସବରେ ଶପଥ ଗ୍ରହଣ କରିବେ। ସେମାନଙ୍କ ମଧ୍ୟରେ ୧୧ ଜଣଙ୍କୁ କ୍ୟାବିନେଟ୍ ପାହ୍ୟା ଦିଆଯାଇଥିବା ବେଳେ ଆଉ ୯ଜଣଙ୍କୁ ମିଳିଛି ରାଷ୍ଟ୍ରମନ୍ତ୍ରୀ ପାହ୍ୟା ।
ତେବେ କ୍ୟାବିନେଟ ମନ୍ତ୍ରୀଙ୍କ ତାଲିକାରେ ଅଛନ୍ତି ରଣେନ୍ଦ୍ର ପ୍ରତାପ ସ୍ବାଇଁ , ବିକ୍ରମ କେଶରୀ ଆରୁଖ , ପ୍ରଫୁଲ୍ଲ ମଲ୍ଲିକ, ନିରଞ୍ଜନ ପୂଜାରୀ , ପଦ୍ମନାଭ ବେହେରା , ପ୍ରତାପ ଜେନା, ଅରୁଣ ସାହୁ , ସୁଦାମ ମାରାଣ୍ଡି , ସୁଶାନ୍ତ ସିଂ, ନବ କିଶୋର ଦାସ ଏବଂ ଟୁକୁନି ସାହୁ ।
ରଣେନ୍ଦ୍ର ପ୍ରତାପ ସ୍ବାଇଁ: 1990 ମସିହାର କ୍ରମାଗତ ଭାବେ ଆଠଗଡ-ତିଗିରିଆ ବିଧାନସଭା ଆସନରୁ ପ୍ରତିନିଧିତ୍ବ କରି ଆସୁଛନ୍ତି ରଣେନ୍ଦ୍ର ପ୍ରତାପ ସ୍ବାଇଁ । ରାଜା ସ୍ବାଇଁ ନାମରେ ଜଣାଶୁଣା ରଣେନ୍ଦ୍ର ପୂର୍ବରୁ ନବୀନ ସରକାରରେ କ୍ରୀଡା ଏବଂ ଯୁବ ବ୍ୟାପାର ମନ୍ତ୍ରୀ ଭାବେ ତୁଲାଇଥିଲେ । ବେଶ ଦୀର୍ଘ ଦିନ ଧରି ରାଜ୍ୟ ମନ୍ତ୍ରୀମଣ୍ଡଳରୁ ବାଦ ପଡିଥିବା ରଣେନ୍ଦ୍ର ଏବେ ପୁଣିଥରେ ରାଜ୍ୟ କ୍ୟାବିନେଟକୁ ଫେରୁଛନ୍ତି । ଚଳିତ ଥରକୁ ମିଶାଇ ମୋଟ 7 ଥର ରାଜ୍ୟ ବିଧାନସଭାକୁ ନିର୍ବାଚିତ ହୋଇଛନ୍ତି ସେ ।
ପ୍ରଫୁଲ୍ଲ ମଲ୍ଲିକ: ଏଥର ଅବିଭକ୍ତ ଢେଙ୍କାନାଳ ଜିଲ୍ଲାରୁ କେବଳ ଜଣଙ୍କୁ ମାତ୍ର ନବୀନ ପଟ୍ଟନାୟକଙ୍କ ମନ୍ତ୍ରୀମଣ୍ଡଳରେ ସ୍ଥାନ ମିଳିଛି । ସେ ହେଉଛନ୍ତି କାମାକ୍ଷାନଗର ବିଧାୟକ ପ୍ରଫୁଲ୍ଲ ମଲ୍ଲିକ । 2004, 2009, 2014 ଏବଂ 2019 ମିଶାଇ ମୋଟ 4 ଥର ରାଜ୍ୟ ବିଧାନସଭାକୁ ପ୍ରତିନିଧିତ୍ବ କରିଛନ୍ତି । ଗତ ସରକାରରେ ସେ ଖଣି, ଇସ୍ପାତ ଏବଂ କୋଇଲା ମନ୍ତ୍ରୀ ଭାବେ ଦାୟିତ୍ବ ତୁଲାଇ ଥିଲେ ।
ବିକ୍ରମ କେଶରୀ ଆରୁଖ
ନବୀନ ପଟ୍ଟନାୟକଙ୍କ ନବଗଠିତ ମନ୍ତ୍ରୀ ପରିଷଦରେ ସ୍ଥାନ ପାଇଛନ୍ତି ଭଞ୍ଜନଗର ବିଧାୟକ ବିକ୍ରମକେଶରୀ ଆରୁଖ । ପଞ୍ଚମ ଥର ପାଇଁ ବିକ୍ରମ ଭଞ୍ଜନଗରରୁ ପ୍ରତିନିଧିତ୍ବ କରୁଛନ୍ତି । ଆସନ୍ତାକାଲି ବିକ୍ରମ କ୍ୟାବିନେଟ ପାହ୍ୟାର ମନ୍ତ୍ରୀ ଭାବେ ଶପଥ ଗ୍ରହଣ କରିବେ ।
ବିକ୍ରମ କେଶରୀ ଆରୁଖ ଛାତ୍ର ସମୟରୁ ରାଜନୈତିକ ଜୀବନ ଆରମ୍ଭ କରନ୍ତି । ମାତ୍ର ବିଧାନସଭାକୁ ଜନତା ଦଳରୁ ଲଢି 1995 ମସିହାରେ ବିଧାୟକ ଭାବେ ବିଜୟ ଲାଭ କରି ବିଧାନସଭାକୁ ନିର୍ବାଚିତ ହୁଅନ୍ତି । ଏହାପରେ କ୍ରମାଗତ ଭାବେ ଭଞ୍ଜନଗରରୁ ସେ ଲଢିଆସୁଛନ୍ତି । ସେ ମନ୍ତ୍ରିମଣ୍ଡଳର ବହୁ ଗୁରୁତ୍ବପୂର୍ଣ୍ଣ ବିଭାଗରେ ମନ୍ତ୍ରୀ ପଦ ତୁଲାଇ ଆସିଛନ୍ତି ।
ଟୁକୁନି ସାହୁ
ଭୁବନେଶ୍ବର: ଆସନ୍ତା କାଲି ନବୀନ ପଟ୍ଟନାୟକ ପଞ୍ଚମଥର ପାଇଁ ଶପଥ ନେବେ । ତେବେ ନବୀନଙ୍କ କ୍ୟାବିନେଟରେ ଏକମାତ୍ର ମହିଳା ଭାବେ ସ୍ଥାନ ପାଇଛନ୍ତି ଟିଟିଲାଗଡର ବିଧାୟିକା ଟୁକୁନି ସାହୁ । ଦୁଇଥରର ବିଧାୟିକା ଟୁକୁନି ରାଜନୈତିକ ଜୀବନରେ ପ୍ରଥମଥର ପାଇଁ ମନ୍ତ୍ରୀ ହୋଇଥିବା ବେଳେ ପୁଣି କ୍ୟାବିନେଟ ପାହ୍ୟା ପାଇଛନ୍ତି । ବଲାଙ୍ଗୀର ଜିଲ୍ଲାର ଜଣାଶୁଣା ରାଜନେତା ସ୍ବର୍ଗତ ଅଭିମନ୍ୟୁ ସାହୁଙ୍କ ଧର୍ମପତ୍ନୀ ହେଉଛନ୍ତି ଟୁକୁନି ସାହୁ ।
ଗତ 2014 ନିର୍ବାଚନ ପୂର୍ବରୁ ଅଭିମନ୍ୟୁଙ୍କୁ ହତ୍ୟା କରାଯାଇଥିଲା, ସେତେବେଳେ ଅଭିମନ୍ୟୁ ଟିଟିଲାଗଡ ଆସନରୁ ବିଜେଡିର ଟିକେଟ ଦାବିଦାର ଥିଲେ ରାଜନୈତିକ ସ୍ବାର୍ଥ ପାଇଁ ତାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଥିଲା । ପରେ ନିର୍ବାଚନରେ ତାଙ୍କ ପତ୍ନୀ ଟୁକୁନି ସାହୁଙ୍କୁ ନବୀନ ଟିକେଟ ଦେଇଥିଲେ । ଆଉ ଟୁକୁନି ପ୍ରଥମ ଥର ପାଇଁ ନିର୍ବାଚନରେ କଂଗ୍ରେସର ସୁରେନ୍ଦ୍ର ସିଂ ଭୋଇଙ୍କୁ 15ହଜାରରୁ ଅଧିକ ଭୋଟ ବ୍ୟବଧାନରେ ପରାସ୍ତ କରି ପ୍ରଥମଥର ପାଇଁ ବିଧାନସଭାକୁ ଆସିଥିଲେ ।
ଗତ ପାଞ୍ଚବର୍ଷରେ ଟୁକୁନି ନିଜ ଅଞ୍ଚଳରେ ଅନେକ ବିକାଶମୂଳକ କାର୍ଯ୍ୟ କରିବା ସହ ରାଜନୀତିରେ ଅନଭିଜ୍ଞ ସତ୍ତ୍ବେ ସେ ଜଣେ ସଫଳ ବିଧାୟିକା ଭାବେ ନବୀନଙ୍କ ଗୁଡବୁକରେ ଥିଲେ । ଚଳିତ ନିର୍ବାଚନରେ ଟୁକୁନି ପୁଣିଥରେ ନିଜ ପୁରୁଣା ପ୍ରତିଦ୍ବନ୍ଦି କଂଗ୍ରେସର ବରିଷ୍ଠ ନେତା ତଥା ପୂର୍ବତନ ବିଧାୟକ ସୁରେନ୍ଦ୍ର ସିଂ ଭୋଇଙ୍କୁ ପରାଜିତ କରି ଦ୍ବିତୀୟ ଥର ପାଇଁ ବିଧାନସଭାକୁ ନିର୍ବାଚିତ ହୋଇଛନ୍ତି । ଆଉ ନବୀନ ତାଙ୍କ କ୍ୟାବିନେଟରେ ଟୁକୁନିଙ୍କୁ ସାମିଲ କରିଛନ୍ତି ।
ପଦ୍ନନାଭ ବେହେରା
ନବୀନଙ୍କ କ୍ୟାବିନେଟରେ ଦୀର୍ଘଦିନ ପରେ ସ୍ଥାନ ପାଇଛନ୍ତି ବୀରମହାରାଜପୁରର ବିଧାୟକ ପଦ୍ମନାଭ ବେହେରା । ପଦ୍ମନାଭ ବେହେରା ମୂଳତଃ ହେଉଛନ୍ତି କନ୍ଧମାଳ ଜିଲ୍ଲାର ତେବେ ସୀମା ନିର୍ଧାରଣ ପରେ ପଦ୍ମନାଭଙ୍କୁ ଗତ 2009ରୁ ବୀରମହାରଜପୁରରୁ ଦଳ ପ୍ରାର୍ଥୀ କରି ଆସୁଛି ପଦ୍ମନାଭ ବେହେରା । 1998ରେ କନ୍ଧମାଳ ଲୋକସଭା ଆସନରୁ ସଂସଦକୁ ମଧ୍ୟ ନିର୍ବାଚିତ ହୋଇଥିଲେ । ଫୁଲବାଣୀରୁ 1990 ଓ 2004ରେ ଦୁଇଥର ବିଧାୟକ ହୋଇଥିବା ପଦ୍ମନାଭ ଗତ 2009ରୁ ଲଗାତାର ଭାବେ ବିଧାୟକ ଭାବେ ନିର୍ବାଚିତ ହୋଇ ଆସୁଛନ୍ତି । ତେବେ ଅଭିଜ୍ଞତା ସତ୍ତ୍ବେ ଗତ ଦୁଇଟି କାର୍ଯ୍ୟକାଳରେ ତାଙ୍କୁ ନବୀନ ମନ୍ତ୍ରୀ କରିନଥିଲେ । କିନ୍ତୁ ଚଳିତ ନିର୍ବାଚନରେ ପୁଣିଥରେ ବୀରମହାରାଜପୁରରେ ବିଜେପିକୁ ଚେକମେଣ୍ଟ ଦେଇ ବିଜୟ ବାନା ଉଡାଇଥିବା ପଦ୍ମନାଭଙ୍କୁ ନବୀନ ତାଙ୍କ କ୍ୟାବିନେଟରେ ସାମିଲ କରିଛନ୍ତି ।
ନିରଞ୍ଜନ ପୂଜାରୀ
ପଶ୍ଚିମ ଓଡ଼ିଶାର ଟାଣୁଆ ନେତା ଭାବେ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି ନିରଞ୍ଜନ ପୂଜାରୀ । ନବୀନ ସରକାରରେ ବେଶ ଦବଦବା ରଖୁଥିବା ନିରଞ୍ଜନ ବୁଧବାର କ୍ୟାବିନେଟ ପାହ୍ୟାରେ ମନ୍ତ୍ରୀ ଭାବେ ଶପଥ ନେଇଛନ୍ତି । ନିରଞ୍ଜନ ରାଜ୍ୟ ରାଜନୀତିରେ ୨୦୦୦ ମସିହାରୁ ପାଦ ଥାପିଛନ୍ତି । ପୂର୍ବରୁ ରାଜନୀତି ଜଗତରେ ସାମିଲ ଥିଲେ ମଧ୍ୟ ପ୍ରତ୍ୟେକ୍ଷ ଭାବେ ସେ ୨୦୦୦ ମସିହାରେ ପାଦ ଦେଇଛନ୍ତି । ୨୦୦୦ ମସିହାରେ ସେ ବିନିକା ନିର୍ବାଚନ ମଣ୍ଡଳୀରୁ ନିର୍ବାଚନ ଲଢ଼ି ନିର୍ବାଚିତ ହୋଇଥିଲେ । ୨୦୦୦ ଓ ୨୦୦୪ ମସିହାରେ ସେ ଦୁଇଥର ବିନିକାରୁ ନିର୍ବାଚନ ଲଢ଼ିଥିଲେ । ପରେ ସେ ସୁବର୍ଣ୍ଣପୁର ବିଧାନସଭା ଆସନରୁ ନିର୍ବାଚନ ଲଢ଼ି ବିଜୟ ଲାଭ କରିଥିଲେ ।
ତେବେ ନବୀନ ସରକାରରେ ସେ ବେଶ ଦବଦବା ଜାହିର କରି ଆସୁଛନ୍ତି । ବିଭିନ୍ନ ବିଭାଗରେ ମନ୍ତ୍ରୀପଦ ସମ୍ଭାଳି ଥିବା ବେଳେ ୨୦୧୪ ନିର୍ବାଚନରେ ବିଜୟ ଲାଭ ପରେ ତାଙ୍କୁ ବାଚସ୍ପତି ଭାବେ ଦାୟିତ୍ୱ ମିଳିଥିଲା । ବିଜେଡି ସୁପ୍ରିମୋ ନବୀନଙ୍କ ଆସ୍ଥା ଭାଜନ କରିପାରିଥିବାରୁ ସେ ପୁନର୍ବାର କ୍ୟାବିନେଟ ପାହ୍ୟା ମନ୍ତ୍ରିମଣ୍ଡଳରେ ନିଜ ସ୍ଥାନ ପକ୍କା କରିପାରିଛନ୍ତି । ବୁଧବାର ନବୀନଙ୍କ ସହ ସେ ଶପଥ ଗ୍ରହଣ କରିଛନ୍ତି ।
ପ୍ରତାପ ଜେନା
ମାହାଙ୍ଗା ବିଧାନସଭା ନିର୍ବାଚନୀ ମଣ୍ଡଳୀରୁ ପ୍ରତିନିଧିତ୍ବ କରୁଛନ୍ତି ପ୍ରତାପ ଜେନା । ଅଭିଜ୍ଞ ତଥା ବିଜେଡିର ଏହି ପୁରୁଣା ନେତା ଚତୁର୍ଥ ଥର ପାଇଁ ବିଧାନସଭାକୁ ନିର୍ବାଚିତ ହୋଇଛନ୍ତି । ପୂର୍ବ ସରକାରରେ ପ୍ରତାପ ଜେନା ବହୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇ ଥିବା ବେଳେ ପୁନର୍ବାର ବିଜେଡି ସୁପ୍ରିମୋ ନବୀନଙ୍କ ଆସ୍ଥାଭାଜନ ହୋଇପାରିଛନ୍ତି ଫଳରେ ପୁନର୍ବାର ସେ କ୍ୟାବିନେଟ ପାହ୍ୟାର ମନ୍ତ୍ରିମଣ୍ଡଳରେ ସ୍ଥାନ ପାଇଛନ୍ତି । ବୁଧବାର ମୁଖ୍ୟମନ୍ତ୍ରୀଙ୍କ ସହ ଶପଥ ନେଇଛନ୍ତି ।
ପ୍ରତାପ ଜେନା ୧୯୮୫-୮୬ ମସିହାରୁ ରାଜନୈତିକ ଜୀବନ ଆରମ୍ଭ କରିଥିଲେ ହେଁ ୨୦୦୦ ମସିହାରୁ ପ୍ରଥମ କରି ବିଧାନସଭା ପାଇଁ ନିର୍ବାଚନ ରଣାଙ୍ଗନକୁ ଓହ୍ଲାଇଥିଲେ । ୨୦୦୦ ମସିହାରେ ପ୍ରଥମ କରି କିଶନନଗର ବିଧାନସଭା ଆସନରୁ ପ୍ରତିଦ୍ବନ୍ଦିତା କରିଥିଲେ । ଏଥିରେ ବିଜୟ ଲାଭ କରି ବିଧାନସଭାକୁ ନିର୍ବାଚିତ ହୋଇଥିଲେ । ପରେ ପୁନର୍ବାର ୨୦୦୪ ରୁ ମଧ୍ୟ ସେ କିଶନନଗର ଆସନରୁ ବିଜୟ ଲାଭ କରିଥିଲେ । ମାତ୍ର ୨୦୦୯ ମସିହାରେ ସେ ମାହାଙ୍ଗା ନିର୍ବାଚନୀ ମଣ୍ଡଳୀରୁ ନିର୍ବାଚିତ ହୋଇ ଆସୁଛନ୍ତି । ପୂର୍ବ ସରକାରରେ ସେ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ଭଳି ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ସମ୍ଭାଳି ଥିଲେ ।
ସୁଶାନ୍ତ ସିଂହ
ଭଟଲି ନିର୍ବାଚନ ମଣ୍ଡଳୀରୁ ପ୍ରତିନିଧିତ୍ବ କରୁଥିବା ଯୁବ ନେତା ସୁଶାନ୍ତ ସିଂ ଆଜି (ବୁଧବାର) ଶପଥ ଗ୍ରହଣ କରିଛନ୍ତି । ସୁଶାନ୍ତ ସିଂ ଭଟଲି ନିର୍ବାଚନ ମଣ୍ଡଳୀରୁ ତୃତୀୟ ଥର ପାଇଁ ପ୍ରତିନିଧିତ୍ବ କରୁଛନ୍ତି । ତେବେ ୨୦୦୯ ମସିହାରେ ସେ ପ୍ରତ୍ୟେକ୍ଷ ଭାବେ ରାଜନୀତିରେ ପାଦ ଦେଇଥିଲେ । ପ୍ରଥମ କରି ବିଜେଡି ଟିକେଟରୁ ନିର୍ବାଚନ ଲଢ଼ିଥିଲେ ଏବଂ ବିଜୟ ଲାଭ କରିଥିଲେ । ଆଉ ସେବେଠାରୁ ସେ କ୍ରମାଗତ ଭାବେ ଭଟଲି ଆସନକୁ ନିଜ ଅଧିନକୁ କରିଆସୁଛନ୍ତି । ନବୀନଙ୍କ ଚତୁର୍ଥ ପାଳିରେ ଶ୍ରମ ଓ ଶକ୍ତି ମନ୍ତ୍ରୀ ରହିଥିବା ସୁଶାନ୍ତ ସିଂହ ନବୀନଙ୍କ ଆସ୍ଥା ଜିତି ପାରିଥିବାରୁ ପୁନର୍ବାର ସେ କ୍ୟାବିନେଟରେ ସ୍ଥାନ ପାଇଛନ୍ତି ।
ଅରୁଣ କୁମାର ସାହୁ
ରାଜ୍ୟ ସରକାରରେ ଯୁବ ମନ୍ତ୍ରୀ ଭାବେ ଅରୁଣ ସାହୁଙ୍କର ସ୍ୱତନ୍ତ୍ର ପରିଚୟ ରହିଛି । ତେବେ ସେ ବୁଧବାର କ୍ୟାବିନେଟର ମନ୍ତ୍ରୀ ଭାବେ ଶପଥ ନେଇଛନ୍ତି । ଅରୁଣ ସାହୁ ଚତୁର୍ଥ ଥର ପାଇଁ ନୟାଗଡରୁ ପ୍ରତିନିଧିତ୍ବ କରୁଛନ୍ତି । ଲଗାତାର ଭାବେ ସେ ୨୦୦୪ ମସିହାରୁ ଏହି ନିର୍ବାଚନ ମଣ୍ଡଳୀରୁ ଜିତି ଆସୁଛନ୍ତି । କ୍ରମାଗତ ଭାବେ ବିଜୟ ଲାଭ କରୁଥିବା ଅରୁଣ ସାହୁ ନବୀନ ସରକାରଙ୍କ ମନ୍ତ୍ରୀ ମଣ୍ଡଳରେ ବହୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇ ସାରିଛନ୍ତି । ଏପରିକି ସେ ବର୍ତ୍ତମାନ ବିଜୁ ଯୁବ ଛାତ୍ର ଜନତା ଦଳର ସଭାପତି ଭାବେ କାର୍ଯ୍ୟ କରୁଛନ୍ତି । ତାଙ୍କ କାର୍ଯ୍ୟଦକ୍ଷତାକୁ ଦେଖି ନବୀନ ପୁନର୍ବାର ତାଙ୍କ ଉପରେ ଆସ୍ଥା ପ୍ରକଟ କରିଛନ୍ତି । ସେପଟେ ଅନେକ ସମୟରେ ନିଜର କାର୍ଯ୍ୟକଳାପ ପାଇଁ ଚର୍ଚ୍ଚାରେ ରହିଥିଲେ ଅରୁଣ ସାହୁ ।
ନବ ଦାସ
ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜର ପଞ୍ଚମ ପାଳିର ଶୁଭାରମ୍ଭ କରିଛନ୍ତି । 20 ଜଣ ମନ୍ତ୍ରୀଙ୍କ ସମେତ ସେ ଶପଥ ନେଇଛନ୍ତି । ତେବେ 20 ଜଣ ମନ୍ତ୍ରୀଙ୍କ ମଧ୍ୟରେ ରହିଛନ୍ତି ଝାରସୁଗୁଡା ବିଧାୟକ ନବ କିଶୋର ଦାସ । 2009 ମସିହାରେ ନବ ପ୍ରଥମେ କଂଗ୍ରେସ ଟିକେଟରେ ଜିତି ବିଧାନସଭା ଆସିଥିଲେ । ପରେ 2014 ରେ ପୁଣି ଥରେ ନବ କଂଗ୍ରେସ ଟିକେଟରେ ବାଜିମାତ୍ କରିଥିଲେ । ଚଳିତ ବର୍ଷ ନିର୍ବାଚନରେ ନବ କଂଗ୍ରେସ ଛାଡି ବିଜେଡିରେ ମିଶିବା ସହ ଝାରସୁଗୁଡାରୁ ପୁଣି ପ୍ରାର୍ଥୀ ହୋଇଥିଲେ । ଏଥର ମଧ୍ୟ ଜିତିବା ସହ ହ୍ୟାଟ୍ରିକ କରିଛନ୍ତି ନବ । ତେବେ ନବୀନଙ୍କ ବିଶ୍ବାସ ଜିତି ସେ ଆଜି କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଛନ୍ତି ।
ସୁଦାମ ମାରାଣ୍ଡି
ଆଜି ରାଜ୍ୟ ମନ୍ତ୍ରୀମଣ୍ଡଳରେ କ୍ୟାବିନେଟ ମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ବାଙ୍ଗିରିପୋଷି ବିଧାୟକ ସୁଦାମ ମାରାଣ୍ଡି । ପୂର୍ବରୁ କ୍ରୀଡା ମନ୍ତ୍ରୀ ରହିଥିବା ସୁଦାମ ପ୍ରଥମେ ସ୍ବାଧୀନ ବିଧାୟକ ଭାବେ ବିଧାନସଭାକୁ ଆସିଥିଲେ । ପରେ ଜେଏମଏମ ଟିକଟରେ 2004 ମସିହାରେ ମୟୂରଭଞ୍ଜ ଆସନରୁ ଲୋକସଭାକୁ ଯାଇଥିଲେ ସୁଦାମ । ତେବେ ପରେ ବିଜେଡିରେ ମିଶି 2014ରେ ବାଙ୍ଗିରିପୋଷିରୁ ପୁଣିଥରେ ବିଧାୟକ ଭାବେ ନିର୍ବାଚିତ ହୋଇଥିଲେ । ଏଥର ପୁଣି ଥରେ ଜିତି ବାଙ୍ଗିରିପୋଷିର ସେ ବିଧାୟକ ହୋଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
