ନୂଆଦିଲ୍ଲୀ: ପୁଲୱାମା ଆତଙ୍କବାଦୀ ଆକ୍ରମଣ ପରେ ଭାରତ ନେଇଛି ପ୍ରତିଶୋଧ । ପାକିସ୍ତାନକୁ ତାହାରି ଭାଷାରେ ଜବାବ ଦେଇଛି । ଭାରତୀୟ ବାୟୁସେନାର ୧୨ଟି ମିରାଜ-୨୦୦୦ ବିମାନ ପାକିସ୍ତାନରେ ପଶି ଆତଙ୍କବାଦୀ ସଙ୍ଗଠନ ଜୈସ-ଇ-ମହମ୍ମଦର ଆଡ୍ଡା ଉପରେ ଏୟାର ଷ୍ଟ୍ରାଇକ କରିଛନ୍ତି ।
ରିପୋର୍ଟ ଅନୁସାରେ ମଙ୍ଗଳବାର ଭୋର 3ଟା 30 ସମୟରେ ନିୟନ୍ତ୍ରଣ ରେଖା ପାର କରି ପିଓକେରେ ଥିବା ଆତଙ୍କବାଦୀ ଆଡ୍ଡା ଉପରେ ଭାରତୀୟ ବାୟୁସେନା ଆକ୍ରମଣ କରିଛି । ଏଥିରେ ପାଖାପାଖି ୨୫୦ରୁ ୩୦୦ ଆତଙ୍କବାଦୀ ନିହତ ହୋଇଥିବା ରିପୋର୍ଟ ମିଳିଛି । ତେବେ ଏହି ଆକ୍ରମଣରେ ପ୍ରମୁଖ ଭୂମିକା ନେଇଥିବା ମିରାଜ 2000 ଜେଟ ବିଷୟରେ ଆସନ୍ତୁ ଜାଣିବା କିଛି ଗୁରୁତ୍ୱପୂର୍ଣ୍ଣ ତଥ୍ୟ ।
ଡାସଲ୍ଟ ମିରାଜ ୨୦୦୦ ହେଉଛି ଏକ ଫ୍ରେଞ୍ଚ ଲଢୁଆ ବିମାନ । ଏହାର ସିଙ୍ଗଲ ଇଞ୍ଜିନ ରହିଛି । ଏହା ଏକ ମଲଟିରୋଲ ବିମାନ ଯାହାକୁ ଫ୍ରାନ୍ସ କମ୍ପାନୀ ଡାସଲ୍ଟ ନିର୍ମାଣ କରିଛି । 1980 ମସିହାରେ ଫ୍ରାନ୍ସ ସହ ହୋଇଥିବା ଚୁକ୍ତି ଅନୁସାରେ ଏହି ବିମାନ ଭାରତ କ୍ରୟ କରିଥିଲା । ଏଥିରେ 150ଟି କିଣିବା ପାଇଁ ଭାରତ ପ୍ରସ୍ତାବ ରଖିଥିଲା । କିନ୍ତୁ ଶେଷରେ 40ଟି କ୍ରୟ କରିବା ନେଇ ଚୁକ୍ତି ହୋଇଥିଲା ।
ପରେ ଭାରତ 1986 ମସିହାରେ ଆଉ 9ଟି ମିରାଜ ବିମାନ କ୍ରୟ କରିଥିଲା । ତେବେ 1999 କାର୍ଗିଲ ଯୁଦ୍ଧରେ ଏହି ବିମାନର ସେବାରେ ଭାରତ ଏତେ ସନ୍ତୁଷ୍ଟ ହୋଇଥିଲା ଯେ ଏହିଭଳି ଆଉ 126ଟି ବିମାନ କିଣିବା ପାଇଁ ଅର୍ଡର କରିଥିଲା । କାର୍ଗିଲ ଯୁଦ୍ଧରେ ପାକିସ୍ତାନକୁ ପାଣି ପିଆଇ ଦେଇଥିଲା ମିରାଜ ବିମାନ । ଶେଷରେ ଜୁଲାଇ 2011ରେ 2.2 ବିଲିୟନ ପାଉଣ୍ଡରେ ଭାରତ ଏହି ବିମାନ ପାଇଁ ଏକ ପ୍ୟାକେଜ ଘୋଷଣା କରିଥିଲା।
ପ୍ରଥମେ ଏହି ବିମାନର ନାମ ବ୍ରଜ ଦିଆଯାଇଥିଲା । ଏହା ବାୟୁସେନାର ପ୍ରାଇମେରୀ ଫାଇଟର ପ୍ଲେନ ଅଟେ । ଏହି ବିମାନ ଶତ୍ରୁଙ୍କ ଅଞ୍ଚଳରେ ଲେଜର ଗାଇଡେଡ ବୋମ ମାଧ୍ୟମରେ ମଧ୍ୟ ଆକ୍ରମଣ କରିବାକୁ ସକ୍ଷମ ଅଟେ । ଏବେ ଭାରତୀୟ ସେନା ପାଖରେ ୫୧ଟି ମିରାଜ ବିମାନ ରହିଛି । ପ୍ରଥମେ ଏହା ଲାଇଟୱେଟ ଫାଇଟର ଭାବେ ଡିଜାଇନ ହୋଇଥିଲା । ପରେ ଏହା ମଲଟିରୋଲ ଫାଇଟର ବିମାନ ଭାବେ ନିର୍ମିତ ହୋଇଥିଲା । ଏହା ଗୋଟିଏ ମିନିଟରେ ସର୍ବାଧିକ 60,000 ଫୁଟ ପର୍ଯ୍ୟନ୍ତ ଉଡିବାର କ୍ଷମତା ରଖିଛି । ଏହାସହ ସମସ୍ତ ପ୍ରକାର ପାଗରେ ଏହା ଲଢେଇ କରିପାରିବ ।
ଏହି ବିମାନରେ 9ଟି ହାର୍ଡ ପଏଣ୍ଟ ଅଛି ଯେଉଁଥିରେ ୱିପନ ସିଷ୍ଟମ ପେଲୋଡ ରହିଛି । ଭାରତ ପାଖରେ ଏହି ଲଢୁଆ ବିମାନ ମିରାଜ ୨୦୦୦ ଭଳି ଅନେକ ଶକ୍ତିଶାଳୀ ଲଢୁଆ ବିମାନ ରହିଛି । ଏପରି ବିମାନ ସବୁ ଯୁଦ୍ଧ ମୈଦାନରେ ଓହ୍ଲାଇଲେ ଶତ୍ରୁପକ୍ଷର ଚିତ୍ର ହିଁ ବଦଳିଯିବ । ଭାରତ ଛଡା ଏହି ବିମାନ ଏବେ ଚୀନ, ଫ୍ରାନ୍ସ ଏବଂ ୟୁଏଇ ପାଖରେ ଅଛି ।
