ବେଙ୍ଗାଲୁରୁ: କର୍ଣ୍ଣାଟକରେ ପ୍ରତି ରବିବାର ସମ୍ପୂର୍ଣ୍ଣ ଲକଡାଉନ ରହିବ । ଜୁଲାଇ 5 ତାରିଖରୁ ଏହି ନିୟମ ଲାଗୁ କରାଯିବ । ଏନେଇ ମୁଖ୍ୟମନ୍ତ୍ରୀ ବିଏସ ୟେଦୁରପ୍ପା ଘୋଷଣା କରିଛନ୍ତି ।
ଶନିବାର ରାଜ୍ୟରେ କୋରୋନା ଭାଇରସ ସ୍ଥିତିକୁ ନେଇ କର୍ଣ୍ଣାଟକ ମୁଖ୍ୟମନ୍ତ୍ରୀ ବି.ଏସ୍ ୟେଦୁରପ୍ପା ଏକ ସମୀକ୍ଷା ବୈଠକ କରିବା ପରେ ଏହି ନିଷ୍ପତ୍ତି ନେଇଛନ୍ତି । ଏହି ସମୟରେ ଅତ୍ୟାବଶ୍ୟକୀୟ ସାମଗ୍ରୀ ବ୍ୟତୀତ ଅନ୍ୟ କୌଣସି କାର୍ଯ୍ୟାକଳାପ ପାଇଁ ଅନୁମତି ଦିଆଯିବ ନାହିଁ ।
ରାତି 9ଟାରୁ ସକାଳ 5ଟା ପର୍ଯ୍ୟନ୍ତ କର୍ଫ୍ୟୁରେ ପରିବର୍ତ୍ତନ କରାଯାଇ ଜୁନ 29 ତାରିଖରୁ ରାତି 8 ରୁ ସକାଳ 5 ପର୍ଯ୍ୟନ୍ତ ଏହାକୁ ବଳବତ୍ତର ରଖାଯିବ। ଏହା ବ୍ୟତୀତ ସମସ୍ତ ସରକାରୀ କାର୍ଯ୍ୟାଳୟ ଶନିବାର ଦିନ ବନ୍ଦ ରହିବ । ଏହା ଜୁଲାଇ 10 ରୁ କାର୍ଯ୍ୟକାରୀ ହେବ ବୋଲି ସିଏମଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି।
ହୋଲସେଲ ମାର୍କେଟରେ ଲୋକଙ୍କ ଭିଡ ନ ଜମିବା ପାଇଁ ବୃହତ୍ତ ବେଙ୍ଗାଲୁରୁ ମହାନଗର ପାଲିକେ କମିଶନ ପକ୍ଷରୁ ଅନେକଗୁଡିକ ହୋଲ ସେଲ ମାର୍କେଟ ବସାଇବାକୁ ନିର୍ଦ୍ଦେଶ ଦିଆଯାଇଛି।
ରାଜ୍ୟରେ ଶନିବାର 918 କୋରୋନା ଭାଇରସ ମାମଲା ରିପୋର୍ଟ ହୋଇଛି । ଏହା ରାଜ୍ୟରେ ସର୍ବାଧିକ ଦିନିକିଆ ବୃଦ୍ଧି ଘଟିଛି । ଏଥିସହ 11 ଜଣଙ୍କର ମୃତ୍ୟୁ ଘଟିଛି। ରାଜ୍ୟରେ ମୋଟ ମାମଲା 11,923 କୁ ବୃଦ୍ଧି ପାଇଛି । ସଂକ୍ରମିତଙ୍କ ମଧ୍ୟରୁ 7,287 ଜଣ ସୁସ୍ଥ ହୋଇଛନ୍ତି ଏବଂ 191 ଜଣଙ୍କର ମୃତ୍ୟୁ ହୋଇଛି।
