ନୂଆଦିଲ୍ଲୀ: ସେପ୍ଟେମ୍ବର 11 ଠାରୁ ଉନ୍ନାଓ ଦୁଷ୍କର୍ମ ପୀଡିତାଙ୍କ ବୟାନ ରେକର୍ଡ ହେବ । ତେବେ ପୀଡିତାଙ୍କ ବୟାନ କୌଣସି ଅଦାଲତରେ ନୁହେଁ ବରଂ ଏମ୍ସର ଅସ୍ଥାୟୀ କୋର୍ଟରେ ରେକର୍ଡ କରାଯିବ । ଏହି ମାମଲାରେ ଶୁଣାଣି କରୁଥିବା ଜଜ ଧର୍ମେଶ ଶର୍ମା ବୁଧବାରଠାରୁ ଏମ୍ସର ଅସ୍ଥାୟୀ କୋର୍ଟକୁ ଯାଇ ପୀଡିତାଙ୍କ ବୟାନ ରେକର୍ଡ କରିବେ । ଏକ ବନ୍ଦ କୋଠରୀରେ ପୀଡିତାଙ୍କ ବୟାନ ରେକର୍ଡ କରାଯିବ ।
ସେପଟେ ସେପ୍ଟମ୍ବର 2 ତାରିଖରେ ସୁପ୍ରିମକୋର୍ଟ ପୀଡିତାଙ୍କ ଶୁଣାଣି କରୁଥିବା ଦିଲ୍ଲୀର ତିସ ହଜାରୀ କୋର୍ଟଙ୍କୁ ପ୍ରଶ୍ନ କରିଥିଲେ ଯେ ଏହି ମାମଲାର ଶୁଣାଣି ପାଇଁ ଆଉ କେତେଦିନ ସମୟ ଲାଗିବ । ଏହାର ଉତ୍ତରରେ ଜଜ ଆହୁରି 45 ଦିନର ସମୟ ମାଗିଥିଲେ । ଆବଶ୍ୟକ ପଡିଲେ ଦିନ ବଢି ଯାଇ ପାରେ ବୋଲି ଜଜ କହିଥିଲେ । ତେବେ ପୀଡିତାଙ୍କ ବୟାନ ରେକର୍ଡ କରିବା ପାଇଁ ଏମ୍ସରେ ଅସ୍ଥାୟୀ କୋର୍ଟ ପ୍ରତିଷ୍ଠା କରାଯାଉ ବୋଲି ଜଜ ଧର୍ମେଶ ଶର୍ମା ନୂଆଦିଲ୍ଲୀ ହାଇକୋର୍ଟ ଏବଂ ସୁପ୍ରିମକୋର୍ଟଙ୍କୁ ଅନୁରୋଧ କରିଥିଲେ । ତାଙ୍କର ଦାବି ଏବଂ ସୁପ୍ରିମକୋର୍ଟଙ୍କ ଆଦେଶ କ୍ରମେ ଦିଲ୍ଲୀ ହାଇକୋର୍ଟ ସେପ୍ଟେମ୍ବର 6 ତାରିଖରେ ଏମ୍ସର ଟ୍ରାମା ସେଣ୍ଟର ପରିସରରେ ଏକ ଅସ୍ଥାୟୀ କୋର୍ଟ ନିର୍ମାଣ କରିବା ପାଇଁ ଅନୁମତି ଦେଇଥିଲେ ।
ସୂଚନା ଥାଉକି ଉନ୍ନାଓ ଦୁଷ୍କର୍ମ ପୀଡିତାଙ୍କ ସହ ଘଟିଥିବା ସଡ଼କ ଦୁର୍ଘଟଣା ପରେ ଅଦାଲତ ଏହି ବଡ଼ ନିଷ୍ପତ୍ତି ନେଇଛନ୍ତି । ରାଇବରେଲୀ ନିକଟରେ ସଡ଼କ ଦୁର୍ଘଟଣା ହେବା ପରେ ବର୍ତ୍ତମାନ ପୀଡିତାଙ୍କର ଏମ୍ସରେ ଚିକିତ୍ସା ଚାଲିଛି । ଏହି କାରଣରୁ ଅଦାଲତ ଏମ୍ସରେ ଅସ୍ଥାୟୀ କୋର୍ଟ ନିର୍ମାଣ କରି ଆସନ୍ତା ଶୁଣାଣି କରିବା ପାଇଁ ଆଦେଶ ଦେଇଛନ୍ତି । ସୁପ୍ରିମକୋର୍ଟଙ୍କ ଆଦେଶ କ୍ରମେ ସମସ୍ତ ଯାଞ୍ଚ ଚାଲିଛି ।
ପ୍ରକାଶ ଥାଉକି, ବିଧାୟକ କୁଲଦୀପ ସିଂହ ସେଙ୍ଗର ବିରୋଧରେ ଦୁଷ୍କର୍ମ ଅଭିଯୋଗ ରହିଛି । ଦୁଷ୍କର୍ମରେ ଶିକାର ହୋଇଥିବା ପୀଡିତାଙ୍କ ସମେତ ତାଙ୍କ ଖୁଡୀ, ମାଉସୀ ଏବଂ ଓକିଲ ରାଇବରେଲୀ ଜେଲରେ ଥିବା ନିଜ ସମ୍ପର୍କୀୟଙ୍କ ସହ ସାକ୍ଷାତ କରିବାକୁ ଯାଉଥିଲେ । ଅଧାବାଟରେ ତାଙ୍କର କାରକୁ ଏକ ଟ୍ରକ ପିଟିଥିଲା ଯେଉଁଥିରେ ଦୁଇ ମହିଳାଙ୍କର ମୃତ୍ୟୁ ଘଟିଥିଲା । ଏଠାରେ ସନ୍ଦେହ କରାଯାଉଛି ଯେ ଯୋଜନବଦ୍ଧ ଭାବେ ଉକ୍ତ ଦୁର୍ଘଟଣାଟି ଘଟାଯାଇଥିଲା ।
