ଝାରସୁଗୁଡା: ଶିଳ୍ପ ସମୃଦ୍ଧ ସହିତ ଖଣି ଖାଦାନ ଜିଲ୍ଲା ଝାରସୁଗୁଡା । ଏହି ଜିଲ୍ଲାର ପ୍ରାୟ ସମସ୍ତ ଗାଁକୁ ସବୁଦିନିଆ ରାସ୍ତା ଥିବା ବେଳେ ଜିଲ୍ଲାରେ ଏମିତି ଏକ ଗାଁ ରହିଛି ଲଖନପୁର ବ୍ଲକ ଅନ୍ତର୍ଗତ ଦେବଦରହ ଗାଁ । ଏପର୍ଯ୍ୟନ୍ତ ଏହି ଗାଁକୁ ଯିବାଆସିବା ପାଇଁ ରାସ୍ତାର ସୁବିଧା ଟିକେ ହୋଇପାରିନାହିଁ ।
ଦେବଦରହ ଗାଁରେ ପ୍ରାୟ 60ରୁ ଅଧିକ ପରିବାର ବସବାସ କରୁଛନ୍ତି । ଏହି ଗାଁକୁ ଯିବା ବାଟରେ ପଡିଥାଏ ଚିରସ୍ରୋତା ଅହିରା ନାଳା । ଏହି ନାଳ ଉପରେ ସେତୁ ନିର୍ମାଣ ହୋଇନଥିବାରୁ ବିଶେଷ କରି ବର୍ଷା ଦିନରେ ଗ୍ରାମବାସୀଙ୍କୁ ବିଭିନ୍ନ ସମସ୍ୟାର ସମ୍ମୁଖୀନ ହେବାକୁ ପଡୁଛି ।
ବିଶେଷ କରି ବର୍ଷା ଦିନରେ ଆଣିଥାଏ ଗ୍ରାମବାସୀଙ୍କ ପାଇଁ ନାହିଁ ନଥିବା ଦୁଃଖ । ଦେବଦରହ ଗାଁର ତିନିପଟେ ନାଳ ବୋହୁ ଥିବାବେଳେ ଗୋଟିଏ ପଟେ ରହିଛି ଘଞ୍ଚ ଜଙ୍ଗଲ ।
ଅଧିକ ପଢନ୍ତୁ: ନିର୍ବାଚନ ଆଚରଣ ବିଧିର ଉଲଂଘନ: ନିର୍ବାଚନୀ ରାଲିକୁ ରୋକିଲା
ନାଳ ଯୋଗୁଁ ପିଲାମାନେ ପାଠ ପଡିବା ଯିବା ପାଇଁ ଅନେକ ଅସୁବିଧା ହେଉଥିବା ବେଳେ ରୋଗୀ ଓ ପ୍ରସ୍ତୁତି ମହିଳାମାନଙ୍କୁ ଡାକ୍ତରଖାନା ନେବାପାଇଁ ଆସୁଥିବା ଆମ୍ବୁଲାନ୍ସ ଅଧବାଟରେ ରହିଯାଏ । ଶେଷରେ ଆରମ୍ଭ ହୁଏ ଖଟିଆ ବୁହା ଅଭିଯାନ ।
ବର୍ତ୍ତମାନ ନିର୍ବାଚନ ଆସିଥିବାରୁ ଦେବଦରହ ଗାଁକୁ ସମସ୍ତ ଦଳର ନେତାମନ୍ତ୍ରୀଙ୍କ ସୁଅ ଛୁଟିଛି । ହେଲେ ପ୍ରତିଶୃତି ଦେଇ ଯାଉଥିବା ନେତାମନ୍ତ୍ରୀ କେବେ ଏଠାରେ ନାଳ ଉପରେ ପୋଲ ନିର୍ମାଣ କାର୍ଯ୍ୟ ଆରମ୍ଭ କରିବେ ତାହା ଦେଖିବାକୁ ବାକି ରହିଲା ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
