ନୂଆଦିଲ୍ଲୀ: ଜୁଲାଇ 15 ତାରିଖରେ ଭାରତ ଓ ୟୁରୋପୀୟ ସଂଘ ମଧ୍ୟରେ 15 ତମ ଶିଖର ସମ୍ମିଳନୀ ବୈଠକ ଆୟୋଜିତ ହେବ । ଭିଡିଓ କନଫରେନ୍ସ ଜରିଆରେ ହେବାକୁ ଥିବା ଏହି ବୈଠକରେ ବିଭିନ୍ନ ଆଞ୍ଚଳିକ ଏବଂ ବିଶ୍ବ ସ୍ତରୀୟ ପ୍ରସଙ୍ଗ ଉପରେ ଆଲୋଚନା ହେବାର ସମ୍ଭାବନା ରହିଛି ।
ୟୁରୋପୀୟ ସଂଘ ପକ୍ଷରୁ ୟୁରୋପୀୟ ପରିଷଦର ସଭାପତି ଚାର୍ଲ୍ସ ମିସେଲ ଏବଂ ୟୁରୋପୀୟ ଆୟୋଗର ସଭାପତି ଉର୍ସୁଲା ଭନ୍ ଡେର୍ ଲେୟନ୍ ଏହାର ପ୍ରତିନିଧିତ୍ୱ କରିବେ। ସେହିପରି ଭାରତ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏହି ସମ୍ମିଳନୀର ପ୍ରତିନିଧିତ୍ୱ କରିବେ ବୋଲି ୟୁରୋପୀୟ ପରିଷଦ ଏକ ବିବୃତ୍ତିରେ ଘୋଷଣା କରିଛି । ପରିଷଦ ପକ୍ଷରୁ କୁହାଯାଇଛି, ଏହି ସମ୍ମିଳନୀ ୟୁରୋପୀୟ ସଂଘ ଏବଂ ଭାରତ ମଧ୍ୟରେ ରଣନୈତିକ ଭାଗିଦାରୀକୁ ମଜବୁତ କରିବାର ଏକ ସୁଯୋଗ ହେବ। ମିଳିତ ଜାତିସଂଘ ଏବଂ ବିଶ୍ୱ ବାଣିଜ୍ୟ ସଂଗଠନରେ ପ୍ରଭାବଶାଳୀ ବହୁପାକ୍ଷିକ ଏବଂ ନିୟମ ଆଧାରିତ ବହୁପାକ୍ଷିକ ଆଦେଶକୁ ପ୍ରୋତ୍ସାହିତ କରିବା ପାଇଁ ନେତାମାନେ ସେମାନଙ୍କର ସଂକଳ୍ପକୁ ଦୋହରାଇବେ ବୋଲି ଆଶା କରାଯାଉଛି ।
ନେତାମାନେ ସୁରକ୍ଷା, ଜଳବାୟୁ, ପରିବେଶ, ବାଣିଜ୍ୟ ଏବଂ ପୁଞ୍ଜି ବିନିଯୋଗ, ଡିଜିଟାଲ ଅର୍ଥନୀତି ଏବଂ ସଂଯୋଗ କ୍ଷେତ୍ରରେ ସହଯୋଗ ସମ୍ପର୍କରେ ଆଲୋଚନା କରିବେ। ସେମାନେ ବିଶ୍ବ ତଥା ଆଞ୍ଚଳିକ ପ୍ରସଙ୍ଗ ଉପରେ ମଧ୍ୟ ଆଲୋଚନା କରିବେ ବୋଲି ବିବୃତ୍ତିରେ କୁହାଯାଇଛି । ତେବେ ବିଶ୍ବ ଏବେ କୋରୋନା ମହାମାରୀ ବିରୋଧରେ ଲଢୁଛି । ଏହାକୁ ଦୃଷ୍ଟିରେ ରଖି ନେତାମାନେ ଜୀବନ ରକ୍ଷା , ସାମାଜିକ-ଅର୍ଥନୈତିକ ପରିଣାମକୁ ହ୍ରାସ କରିବା ପାଇଁ ବିଶ୍ୱ ସହଯୋଗ ଏବଂ ଏକତା ଉପରେ ଆଲୋଚନା କରିବେ ବୋଲି କୁହାଯାଇଛି ।
