ଜୟପୁର: ସୋସିଆଲ ମିଡିଆରେ ଫଟୋ ଓ ଭିଡିଓ ଶେୟାର କରିବା ସହ ବଢୁଥିବା ଫଲୋଅର୍ସ ସଂଖ୍ୟାକୁ ନେଇ ରାଜସ୍ଥାନର ଆମେର ଥାନାଞ୍ଚଳରେ ଘଟିଛି ଏକ ଭୟଙ୍କର ଘଟଣା । ପତ୍ନୀଙ୍କର ସୋସିଆଲ ମିଡିଆ ଆକାଉଣ୍ଟରେ ବଢୁଥିବା ଫଲୋଅର୍ସ ସଂଖ୍ୟାକୁ ନେଇ କ୍ରୋଧାନ୍ବିତ ସ୍ବାମୀ ତାଙ୍କୁ ହତ୍ୟା କରିଥିବା ଭଳି ଘଟଣା ସାମ୍ନାକୁ ଆସିଛି । ସୋମବାର ରେଶମା ମଙ୍ଗଲାନୀ ନାମକ ମହିଳାଙ୍କ ରକ୍ତାକ୍ତ ମୃତଦେହ ଜବତ ହେବା ପରେ ଏପରି ଅମାନବୀୟ ହତ୍ୟାକାଣ୍ଡର ସତ୍ୟତା ସାମ୍ନାକୁ ଆସିଛି ।
ସୂଚନା ମୁତାବକ ସ୍ତ୍ରୀଙ୍କ ଏହି ମାତ୍ରାଧିକ ଫଲୋଅର୍ସକୁ ଦେଖି ନିଜ କ୍ରୋଧକୁ ସମ୍ଭାଳି ପାରିନଥିଲା ଜହ୍ଲାଦ ସ୍ବାମୀ ଅୟାଜ ଅହମ୍ମଦ । ଉଭୟଙ୍କ ବାହାଘରକୁ 2 ବର୍ଷ ହୋଇଥିଲେ ସୁଦ୍ଧା ପତ୍ନୀଙ୍କ ଚରିତ୍ରକୁ ନେଇ ସ୍ବାମୀ ଅୟାଜର ସବୁବେଳେ ସନ୍ଦେହ ରହୁଥିଲା । ସେଥିରେ ପୁଣି ସୋସିଆଲ ମିଡିଆରେ ବଢୁଥିବା ଫଲୋଅର୍ସ ସଂଖ୍ୟା ସ୍ବାମୀଙ୍କୁ ଅଧିକ କ୍ରୋଧାନ୍ବିତ କରିଥିଲା । ଫଳରେ ଯୋଜନାବଦ୍ଧ ଭାବେ ପ୍ରଥମେ ସ୍ତ୍ରୀକୁ ମଦ ପିଆଇ ଘଟଣାସ୍ଥଳକୁ ନେଇଥିଲା ସ୍ବାମୀ ।
ସେଠାରେ ପତ୍ନୀଙ୍କୁ ହତ୍ୟା କରିବା ପରେ ତାଙ୍କ ମୁହଁକୁ ପଥରରେ ଛେଚି ପରିଚୟ ଲୁଚାଇବାକୁ ଚେଷ୍ଟା କରିଥିଲା ଅୟାଜ । ସୋମବାର ଦିଲ୍ଲୀ ହାଇୱେସ୍ଥିତ ନୂଆ ମାତା ମନ୍ଦିର ପାଖ ରାସ୍ତାକଡରେ ରେଶମାଙ୍କ ମୃତଦେହ ପୋଲିସ ଠାବ କରିବା ପରେ ଆରମ୍ଭ ହୋଇଥିଲା ଖୋଳତାଡ । ମାତ୍ର 5 ଘଣ୍ଟା ମଧ୍ୟରେ ପୋଲିସ ଘଟଣାର ପର୍ଦ୍ଦାଫାସ କରିବା ସହ ଅଭିଯୁକ୍ତ ସ୍ବାମୀକୁ ଗିରଫ କରିବାରେ ସଫଳ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
