ନୂଆଦିଲ୍ଲୀ: କୋରୋନା ଭାଇରସ ଲଢେଇରେ ଆଜି ସର୍ବଦଳୀୟ ବୈଠକ ବସିଛି । ଭାଇରସ ସହ ଲଢେଇରେ କଂଗ୍ରେସ ଅନେକ ଦାବି ଉପସ୍ଥାପନା କରିଛି । କଂଗ୍ରେସର ସବୁଠାରୁ ଗୁରୁତ୍ବପୂର୍ଣ୍ଣ ଦାବି ହେଉଛି ସମସ୍ତଙ୍କର କୋରୋନା ଟେଷ୍ଟ କରେଇବାର ଅଧିକାର ଅଛି । କଂଗ୍ରେସ ସମସ୍ତଙ୍କ ପାଇଁ କୋରୋନା ପରୀକ୍ଷାକୁ ଉନ୍ମୁକ୍ତ କରିବା ପାଇଁ ଦାବି କରିଛି ।
କୋରୋନା ପ୍ରଭାବିତ ତଥା କଣ୍ଟେନମେଣ୍ଟ ଜୋନରେ ଥିବା ପରିବାରକୁ 10 ହଜାର ଲେଖାଏଁ ସହାୟତା ଦେବାକୁ ମଧ୍ୟ କହିଛି । ଏହାସହ ଡାକ୍ତର ଓ ସ୍ବାସ୍ଥ୍ୟକର୍ମଚାରୀଙ୍କ ସଂଖ୍ୟା ବଢାଇବାକୁ ପରାମର୍ଶ ଦେଇଛି । ଏଥିପାଇଁ ନର୍ସିଂ, ଫାର୍ମା, ମେଡିକାଲ କଲେଜରେ ପଢୁଥିବା ଛାତ୍ରଛାତ୍ରୀଙ୍କ ଠାରୁ ସାହାଯ୍ୟ ନେବାକୁ କହିଛି କଂଗ୍ରେସ ।
କେବଳ ରେଳ କୋଚ ନୁହେଁ ବରଂ ଷ୍ଟାଡିୟମ, ପ୍ରଦର୍ଶନୀ ସ୍ଥଳ, ବିଶ୍ବବିଦ୍ୟାଳୟରେ ମଧ୍ୟ କ୍ବାରେଣ୍ଟାଇନ ସେଣ୍ଟର କରିବାକୁ ଅନୁରୋଧ କରିଛି କଂଗ୍ରେସ । ପ୍ରକାଶଥାଉକି, କୋରୋନା ଭାଇରସ ରୋକିବା ପାଇଁ ଗୃହମନ୍ତ୍ରୀ ଅମିତ ଶାହା ସର୍ବଦଳୀୟ ବୈଠକ ଡାକିଛନ୍ତି । ଏହି ବୈଠକରେ ଦିଲ୍ଲୀ ବିଜେପି ଅଧ୍ୟକ୍ଷ ଆଦେଶ ଗୁପ୍ତା, ଆମ ଆଦମୀ ପାର୍ଟି ପକ୍ଷରୁ ସଞ୍ଜୟ ସିଂ, ଦିଲ୍ଲୀ କଂଗ୍ରେସ ଅଧ୍ୟକ୍ଷ ଅନିଲ ଚୌଧୁରୀ ସାମିଲ ଥିଲେ । ଏହାସହ କେନ୍ଦ୍ର ଗୃହ ସଚିବ, କେନ୍ଦ୍ର ସ୍ବାସ୍ଥ୍ୟ ସଚିବ, ଦିଲ୍ଲୀର ଚିଫ୍ ସେକ୍ରେଟାରୀ ଓ ଦିଲ୍ଲୀର ସରକାରଙ୍କ ସ୍ବାସ୍ଥ୍ୟ ବିଭାଗର ପ୍ରିନ୍ସିପାଲ୍ ସେକ୍ରେଟାରୀ ମଧ୍ୟ ଉପସ୍ଥିତ ଥିଲେ ।
ଦିଲ୍ଲୀରେ 24 ଘଣ୍ଟା ମଧ୍ୟରେ 2224 ନୂଆ ମାମଲା ସାମ୍ନାକୁ ଆସିଛି । ଏହାସହ 56 ଜଣଙ୍କର ମୃତ୍ୟୁ ହୋଇଛି। ରାଜଧାନୀରେ ସମୁଦାୟ କୋରୋନା ମାମଲା 41,182 ରେ ପହଞ୍ଚିଥିବାବେଳେ ଏପର୍ଯ୍ୟନ୍ତ 1327 ଜଣ ଲୋକ ପ୍ରାଣ ହରାଇଛନ୍ତି। ଏଭଳି ପରିସ୍ଥିତିରେ ଦିଲ୍ଲୀର ପରିସ୍ଥିତିକୁ ନିୟନ୍ତ୍ରଣ କରିବା ସରକାରଙ୍କ ପାଇଁ ଏକ ବଡ ଆହ୍ବାନ।
