ଚଣ୍ଡିଗଡ: ଚୀନରୁ କୋରୋନା ରାପିଡ ଟେଷ୍ଟ କିଟର ଗୁଣବତ୍ତା ଉପରେ ଏବେବି ପ୍ରଶ୍ନବାଚୀ ସୃଷ୍ଟି ଉଠୁଛି । ଏହି ସମୟରେ କେନ୍ଦ୍ର ହରିୟାଣା ସରକାରଙ୍କୁ ରାପିଡ୍ ଟେଷ୍ଟ କରିବାକୁ ଅନୁମତି ଦେଇଛନ୍ତି । ମାନେସରରେ ଅବସ୍ଥିତ ଦକ୍ଷିଣ କୋରିଆ କମ୍ପାନୀରୁ ହରିୟାଣା ସରକାର 25 ହଜାର ରାପିଡ୍ ଟେଷ୍ଟ କିଟ୍ ବ୍ୟବହାର କରିବେ। ଆଜି(ଗୁରୁବାର)ଠାରୁ ଏହି ପରୀକ୍ଷା ଆରମ୍ଭ ହେବ ।
ଏହି ସୂଚନା ଦେଇଛନ୍ତି ରାଜ୍ୟ ସ୍ବାସ୍ଥ୍ୟମନ୍ତ୍ରୀ ଅନିଲ୍ ବୀଜ । ଏଥିପାଇଁ କେନ୍ଦ୍ର ସରକାର ଅନୁମତି ଦେଇଥିବା ସେ କହିଛନ୍ତି। ଚୀନର କିଟ୍ରେ ତ୍ରୁଟି ବାହାରିବା ପରେ ହରିୟାଣା ପ୍ରଥମେ କିଟ୍ ଆମଦାନୀ ବନ୍ଦ କରିଥିଲା ।
ସ୍ବାସ୍ଥ୍ୟମନ୍ତ୍ରୀ ଅନିଲ ବିଜ କହିଛନ୍ତି, ହରିୟାଣା ସରକାର ଦକ୍ଷିଣ କୋରିଆ କମ୍ପାନୀରୁ 25 ହଜାର କିଟ୍ କିଣିଛନ୍ତି । ଖୁବ ଶୀଘ୍ର 75 ହଜାର କିଟ୍ କିଣାଯିବ । ପ୍ରଥମ ପର୍ଯ୍ୟାୟରେ 11 ହଜାର ଲୋକଙ୍କଠାରୁ ପରୀକ୍ଷା ଆରମ୍ଭ ହେବ । ଯେଉଁମାନଙ୍କଠାରେ ଥଣ୍ଡା ଓ କାଶର ଲକ୍ଷଣ ଦେଖାଦେଇଛି ସେମାନଙ୍କୁ ଆଗ ପରୀକ୍ଷା କରାଯିବ। ଏହା ବ୍ୟତୀତ ପନିପରିବା ବିକ୍ରେତା, ଖବରକାଗଜ ବିତରକ, ଦୁଗ୍ଧଚାଷୀଙ୍କ ମଧ୍ୟ ପରୀକ୍ଷା କରାଯିବ ।
ଏହାପୂର୍ବରୁ ରାଜସ୍ଥାନ, ଉତ୍ତରପ୍ରଦେଶ, ପଞ୍ଜାବ ସମେତ ଅନେକ ରାଜ୍ୟରେ ଚୀନ କମ୍ପାନୀର ରାପିଡ୍ କିଟ୍ ଅସଫଳ ପ୍ରମାଣିତ ହୋଇଥିଲା। ଏହା ପରେ ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ୍ ରିସର୍ଚ୍ଚ (ଆଇସିଏମ୍ଆର) ଚୀନର କମ୍ପାନୀଗୁଡିକର ରାପିଡ୍ ପରୀକ୍ଷଣ କିଟ୍ ଉପରେ ପ୍ରତିବନ୍ଧକ ଲଗାଇଥିଲା।
