ଅମରାବତୀ: ଏମିତି ବି ଆସେ ମୃତ୍ୟୁ । ମୃତକକୁ ଦେଖୁଥିବାବେଳେ ଗ୍ରାସିଲା ମୃତ୍ୟୁ । ସଡକ ଦୁର୍ଘଟଣାରେ ଘଟଣାସ୍ଥଳରେ ପ୍ରାଣ ହରାଇଥିବା ଜଣେ ଯୁବକଙ୍କୁ କିଛି ଲୋକ ଦେଖୁଥିବାବେଳେ ଚଢିଗଲା ଲୋରୀ । ଫଳରେ ଘଟଣାସ୍ଥଳରେ ଚାରିଜଣଙ୍କ ମୃତ୍ୟୁ । ଆନ୍ଧ୍ରପ୍ରଦେଶ ଅନନ୍ତପୁର ଅଞ୍ଚଳରେ ଏଭଳି ଛାତିଥରା ଘଟଣା ସାମ୍ନାକୁ ଆସିଛି ।
ସୂଚନାଯୋଗ୍ୟ, ଶୁକ୍ରବାର ରାତିରେ ଅନନ୍ତପୁର ରାଘବମ୍ଫାଲି ନିକଟସ୍ଥ ଜାତୀୟ ରାଜପଥରେ ଏକ କାର 29 ବର୍ଷୀୟ ରାଜଶେଖର ନାମକ ଜଣେ ବାଇକ ଚାଳକଙ୍କୁ ପଛରୁ ଧକ୍କା ଦେଇଥିଲା । ଫଳରେ ଯୁବକ ଜଣକ ଛିଟିକି ହୋଇ ରାସ୍ତାର ଅପରପାର୍ଶ୍ବରେ ପଡିଥିଲେ ଏବଂ ତାଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା । ଆଖପାଖ ଅଞ୍ଚଳର ଲୋକମାନେ ଏହି ଶବ୍ଦ ଶୁଣି ଦୁର୍ଘଟଣାସ୍ଥଳକୁ ଦୌଡି ଆସିଥିଲେ । ଠିକ ସେହି ସମୟରେ ଆଖି ପିଛୁଳାକେ ଆଉ ଏକ ଲୋମହର୍ଷଣକାରୀ ଘଟଣା ଘଟିଗଲା । ଅନନ୍ତପୁରରୁ କାଦରୀ ଅଭିମୁଖେ ଯାଉଥିବା ଏକ ଲୋରୀ ରାସ୍ତାକଡରେ ଠିଆ ହୋଇ ଦୁର୍ଘଟଣାଗ୍ରସ୍ତ ଯୁବକଙ୍କୁ ଦେଖୁଥିବା ସ୍ଥାନୀୟ ଲୋକଙ୍କ ଉପରେ ମାଡି ଯାଇଥିଲା । ଫଳରେ ଘଟଣାସ୍ଥଳରେ ଚାରିଜଣ ବ୍ୟକ୍ତିଙ୍କ ମୃତ୍ୟୁ ଘଟିଛି ଏବଂ ଜଣେ ଗୁରୁତର ଆହତ ହୋଇଛନ୍ତି । ମୃତକମାନେ ସ୍ଥାନୀୟ ଅଞ୍ଚଳର ଶିବମା(48), ଭାଲିସାବ(52), ସଞ୍ଜୀବପୁରା ସୁରୀ(32) ଏବଂ ଶ୍ରୀନିଭାସୁ(49) ବୋଲି ଜଣାପଡିଛି । ଦୁର୍ଘଟଣାରେ ଗୁରୁତର ଅନ୍ୟ ଜଣେ ବ୍ୟକ୍ତିଙ୍କୁ ମେଡିକାଲରେ ଭର୍ତ୍ତି କରାଯାଇଛି ।
ପ୍ରଥମେ ବାଇକକୁ ଧକ୍କା ଦେଇଥିବା କାର ଚାଳକ ଓ ତା'ର ସହଯାତ୍ରୀ ସମେତ ଲୋରୀ ଡ୍ରାଇଭର ମଧ୍ୟ ଏହି ଦୁର୍ଘଟଣା ଭିଆଇ ଘଟଣାସ୍ଥଳରୁ ଫେରାର ହୋଇଯାଇଛନ୍ତି । ପୋଲିସ ଦୁଇଟି ମାମଲା ରୁଜୁ କରି ଘଟଣାର ତଦନ୍ତ କରୁଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
