ନୂଆଦିଲ୍ଲୀ: ଦେଶର ପ୍ରଥମ ଇଞ୍ଜିନ ବିହୀନ ରେଳ ବନ୍ଦେ ଭାରତ ଖୁବ ଶୀଘ୍ର ଯାତ୍ରା ଆରମ୍ଭ କରିବ। ସାଧାରଣ ଦ୍ରୁତଗାମୀ ଟ୍ରେନ ଠାରୁ ଅଧିକ ବେଗରେ ଯାତ୍ରା କରୁଥିବା ରେଳରେ ଯାତ୍ରା କରିବାର ଅନୁଭବକୁ ଆହୁରି ଅଧିକ ଭଲ କରିବାକୁ ରେଳବାଇ ପ୍ରୟାସ ଜାରି ରଖିଛି। ଏକ ରିପୋର୍ଟ ଅନୁସାରେ, ବର୍ତ୍ତମାନ ଏହି ରେଳରେ ପଞ୍ଚତାରକା ହୋଟେଲର ଖାଦ୍ୟ ମଧ୍ୟ ଯାତ୍ରୀ ପାଇ ପାରିବେ।
ଆଇଆରସିଟିସିର ଜଣେ ବରିଷ୍ଠ ଅଧିକାରୀ ଗଣମାଧ୍ୟମକୁ କହିଛନ୍ତି, ଯାତ୍ରୀଙ୍କୁ ବିଭିନ୍ନ ପ୍ରକାର ବ୍ୟଞ୍ଜନ ପରଷିବାର ମଉକା ଦେବ ଏହି ଟ୍ରେନ। ଖୁବ ଜଲଦି ଏହି ଯୋଜନାକୁ ମଞ୍ଜୁରୀ ମିଳିଗଲେ ବହୁ ପ୍ରତୀକ୍ଷିତ ଟ୍ରେନ 18ରେ ଏହା ଆରମ୍ଭ କରିଦିଆଯିବ ।
ସୂଚନା ଅନୁସାରେ, ପିଣ୍ଡ ବଲୁଚୀରୁ ଖାଦ୍ୟ ଅଣାଯାଇ ପ୍ରୟାଗରାଜରେ ବନ୍ଦେ ଭାରତ ଏକ୍ସପ୍ରେସରେ ରଖାଯିବ। ଟ୍ରେନ ଫେରିବା ବେଳେ କାନପୁର ଷ୍ଟେସନରେ ଭୋଜନ ପାଇଁ ଖାଦ୍ୟ ନିଆଯିବ। ଏହି ଖାଦ୍ୟ ହୋଟେଲ ଲ୍ୟାଣ୍ଡମାର୍କରୁ ପ୍ରସ୍ତୁତ ହୋଇ ଆସିବ। ସକାଳୁ ଜଳଖିଆ ପାଇଁ ସାଧାରଣତଃ ରେଳ ବିଭାଗ ପକ୍ଷରୁ କଟଲେଟ ଓ ବ୍ରେଡ ଦିଆଯାଏ। ହେଲେ ଏଥିରେ ପେଟିସ, ମଫିନ୍ସ ଆଦିର ବ୍ୟବସ୍ଥା କରାଯାଇଛି।
ନୂଆଦିଲ୍ଲୀରୁ ବାରାଣାସୀ ଭିତରେ ଏକଜିକ୍ୟୁଟିଭି କ୍ଲାସରେ ଯାତ୍ରା କରୁଥିବା ଯାତ୍ରୀଙ୍କୁ ସକାଳ ଜଳଖିଆ ଠାରୁ ମଧ୍ୟାହ୍ନ ଭୋଜନ ପର୍ଯ୍ୟନ୍ତ ମାତ୍ର 399 ଟଙ୍କା ଖର୍ଚ୍ଚ କରିବା ପାଇଁ ପଡିବ। ଚେୟାର କାରରେ ଯାତ୍ରା କରୁଥିବା ଯାତ୍ରୀଙ୍କ ପାଇଁ ମାତ୍ର 344 ଟଙ୍କା ଏବଂ ଫେରିବା ସମୟରେ 349 ଓ 288 ଟଙ୍କା ଖର୍ଚ୍ଚ ହେବ।
