ପାଟନା: ବଲିଉଡ ଅଭିନେତା ସୁଶାନ୍ତ ସିଂହଙ୍କ ଆତ୍ମହତ୍ୟା ଘଟଣାରେ ତାଙ୍କ ବାପା ପାଟନାର ରାଜୀବନଗର ଥାନାରେ ଏତଲା ଦାଏର କରିଛନ୍ତି । ଅଭିନେତ୍ରୀ ତଥା ସୁଶାନ୍ତଙ୍କ ମହିଳା ବନ୍ଧୁ ରିୟା ଚକ୍ରବର୍ତ୍ତୀଙ୍କ ବିରୋଧରେ ଏହି ମାମଲା ଦାଏର କରାଯାଇଛି ।
ସୁଶାନ୍ତଙ୍କୁ ପ୍ରେମରେ ଫସାଇ ଟଙ୍କା ହଡପ କରିବା ଓ ଆତ୍ମହତ୍ୟା ପାଇଁ ଉସକାଇବା ନେଇ ରିୟାଙ୍କ ଉପରେ ଆରୋପ ଲଗାଯାଇ କେସ ନମ୍ବର 241/ 20 ଆଧାରରେ ଥାନାରେ ପରିବାର ଅଭିଯୋଗ ପତ୍ର ଦାଖଲ କରିଛନ୍ତି । ତେବେ ସୁଶାନଙ୍କ ପରିବାର ଏତଲା ଦାଏର କରିବା ପରେ ପାଟନାରୁ 4 ଜଣିଆ ପୋଲିସ ଟିମ ମୁମ୍ବାଇରେ ପହଞ୍ଚିଯାଇଛି ।
ପୂର୍ବରୁ ସୁଶାନ୍ତ ଆତ୍ମହତ୍ୟା ମାମଲାରେ ରିୟା ଚକ୍ରବର୍ତ୍ତୀଙ୍କୁ 11 ଘଣ୍ଟା ଧରି ଜେରା କରିଥିଲା ମୁମ୍ବାଇ ପୋଲିସ । ସେହିପରି କିଛିଦିନ ପୂର୍ବରୁ ରିୟା କେନ୍ଦ୍ରମନ୍ତ୍ରୀଙ୍କୁ ଏହି ମାମଲାରେ ସିବିଆଇ ଯାଞ୍ଚର ଦାବି କରିଥିଲେ । ସୁଶାନ୍ତ ଜୁନ 14ରେ ନିଜ ବାନ୍ଦ୍ରା ସ୍ଥିତ ବାସଭବନରେ ବେକରେ ଦଉଡି ଦେଇ ଆତ୍ମହତ୍ୟା କରିଥିଲେ ।
