ବେଙ୍ଗାଲୁରୁ: କର୍ଣ୍ଣାଟକ ନିର୍ବାଚନ ଫଳାଫଳ ଆସିବା ପରେ ରାଜ୍ୟ କଂଗ୍ରେସରେ ଏକପ୍ରକାର ଇସ୍ତଫା ପର୍ବ ଆରମ୍ଭ ହୋଇଛି । ପ୍ରଥମେ ବିରୋଧୀ ଦଳ ନେତା ପଦରୁ ସିଦ୍ଧରମୈୟା ଇସ୍ତଫା ଦେବାପରେ ତାଙ୍କୁ ଅନୁସରଣ କରି ରାଜ୍ୟ କଂଗ୍ରେସ ସଭାପତି ଦିନେଶ ଗୁଣ୍ଡୁ ରାଓ ମଧ୍ୟ ଇସ୍ତଫା ଦେଇଛନ୍ତି । ଦିନେଶ କହିଛନ୍ତି ସେ ରାଜ୍ୟ କଂଗ୍ରେସର ମୁଖ୍ୟ ହିସାବରେ ଉପନିର୍ବାଚନ ଦାୟିତ୍ବ ତାଙ୍କ ଉପରେ ଥିଲା । ହେଲେ ଦଳ ଆଶାଜନକ ପ୍ରଦର୍ଶନ କରିବାରେ ବିଫଳ ହୋଇଛି । ଫଳରେ ସେ ନୈତିକତା ଦୃଷ୍ଟିରୁ ଇସ୍ତଫା ଦେଉଛନ୍ତି ।
15ଟି ବିଧାନସଭା ଆସନ ପାଇଁ ଉପନିର୍ବାଚନ ହୋଇଥିବାବେଳେ ଆଜି ଆସିଛି ନିର୍ବାଚନ ଫଳାଫଳ । ଉପନିର୍ବାଚନରେ ବିଜେପି ଏକତରଫା ଭାବେ 12 ଟି ଆସନରେ ବିଜୟୀ ହୋଇଥିବା ବେଳେ କଂଗ୍ରେସକୁ ମିଳିଛି ମାତ୍ର 2ଟି ସିଟ । ଏହାସହ ରାଜ୍ୟରେ ପ୍ରଭାବ ରଖିଥିବା ଜେଡିଏସ ଖାତା ଖୋଲି ପାରିନାହିଁ । ଆଉ ଏକ ଆସନରେ ସ୍ବାଧୀନ ପ୍ରାର୍ଥୀ ବିଜୟୀ ହୋଇଛନ୍ତି ।
