ନୂଆଦିଲ୍ଲୀ: ଲଗାତାର ଦ୍ବିତୀୟ ଦିନ ଧରି ଏନସିଆର ଓ ଜାତୀୟ ରାଜଧାନୀ ଦିଲ୍ଲୀରେ ବର୍ଷା ଜାରି ରହିଛି । ରବିବାର ସକାଳେ ସୁ୍ଦ୍ଧା 1 ମିଲିମିଟର ବର୍ଷା ରେକର୍ଡ ହୋଇଥିବା ପାଣିପାଗ ବିଭାଗ ପକ୍ଷରୁ ସୂଚନା ମିଳିଛି ।
ଗତ 24 ଘଣ୍ଟା ଭିତରେ ଦିଲ୍ଲୀରେ ମୋଟ 2.4 ମିଲିମିଟର ବର୍ଷା ହୋଇଛି । ତେବେ ଆଗକୁ ଦିଲ୍ଲୀ ଓ ଏହାର ଆଖପାଖ ଅଞ୍ଚଳରେ ଘଡିଘଡି ସହିତ ବର୍ଷା ହେବାର ସମ୍ଭାବନା ଅଛି ବୋଲି ଅନୁମାନ କରିଛି ଭାରତୀୟ ପାଣିପାଗ ବିଭାଗ । ବର୍ଷା ସହିତ ଶୀତର ପ୍ରବାହ ଦିଲ୍ଲୀବାସୀଙ୍କୁ ଅସ୍ତବ୍ୟସ୍ତ କରିଛି ।
ଆଗାମୀ ଦୁଇରୁ ତିନିଦିନ ଭିତରେ ଦିଲ୍ଲୀ ଓ ଏହାର ପଡୋଶୀ ଅଞ୍ଚଳ, ଉତ୍ତର-ପୂର୍ବ ରାଜସ୍ଥାନ ଓ ଦକ୍ଷିଣ-ପୂର୍ବ ହରିଆଣାରେ ପ୍ରବଳ ବର୍ଷା ହେବା ନେଇ ଅନୁମାନ କରିଛି ପାଣିପାଗ ବିଭାଗ । ଏହା ସହ ଗୁରୁଗ୍ରାମ, ଫାରୁଖନଗର, କୋସଲି, ମନେସର, ସୋହନା, ଫରିଦାବାଦ, ଭିୱାଡି, ରେୱାଲ, ବାୱାଲ, ବଲାବଗଡ ସମେତ ଅଞ୍ଚଳରେ ବଜ୍ରପାତ ସହିତ ମଧ୍ୟମରୁ ତୀବ୍ର ବର୍ଷା ହେବାର ସମ୍ଭାବନା ରହିଛି ।
ଗତ 24ଘଣ୍ଟାରେ ଦିଲ୍ଲୀର ପାଲାମ ଅଞ୍ଚଳରେ ସର୍ବନିମ୍ନ ତାପମାତ୍ରା 3.2 ଡିଗ୍ରୀ ସେଲସିୟସ ଥିବା ବେଳେ ସାଫଦାରଜଙ୍ଗରେ 2ଡିଗ୍ରୀ ସେଲସିୟସ ରହିଥିଲା । ଶନିବାର ଦିନ ମଧ୍ୟ ଦିଲ୍ଲୀର କେତେକ ଅଞ୍ଚଳରେ ବ୍ରଜପାତ ସହିତ ହାଲୁକା ବର୍ଷା ହୋଇଥିଲା । ସୋମବାରକୁ ବର୍ଷାର ମାତ୍ରା ବଢିବ ବୋଲି ଅନୁମାନ ହୋଇଛି ।
@ANI
