ନୂଆଦିଲ୍ଲୀ: ତାଜ ମାନସିଂ ହୋଟେଲକୁ ସର ଗଙ୍ଗାରାମ ମେଡିକାଲ ସହ ଯୋଡି ଏହାର ପରିସର ଏବଂ କୋଠରୀକୁ କୋରୋନା କେନ୍ଦ୍ର ଭାବରେ ବ୍ୟବହାର କରିବାକୁ ଦିଲ୍ଲୀ ସରକାର ଏକ ନିର୍ଦ୍ଦେଶ ଦେଇଛନ୍ତି । ତେବେ ଦିଲ୍ଲୀରେ କୋରୋନା ମାମଲା ବୃଦ୍ଧି ଏବଂ ଜୁଲାଇ ଶେଷ ସୁଦ୍ଧା 1.5 ଲକ୍ଷ ବେଡ୍ ଆବଶ୍ୟକତାକୁ ଦୃଷ୍ଟିରେ ଏହି ପଦକ୍ଷେପ ନେଇଛନ୍ତି ।
ଟାଟା ଗ୍ରୁପର ତାଜ ମାନସିଂ ହୋଟେଲ ଲୁଟିୟନ ଦିଲ୍ଲୀ ମଧ୍ୟଭାଗରେ ଅବସ୍ଥିତ । ଦିଲ୍ଲୀ ସରକାର କୋରୋନା ମାମଲା ବୃଦ୍ଧି ହେତୁ ବହୁ ସଂଖ୍ୟକ ବେଡ ଆବଶ୍ୟକ ହେବ ବୋଲି ଆଶଙ୍କା କରିଛନ୍ତି । ତେବେ ଗଙ୍ଗା ରାମ ମେଡିକାଲକୁ ପୂର୍ବରୁ କୋରୋନା କେନ୍ଦ୍ର ଘୋଷଣା କରାଯାଇଛି ।
ତେବେ ଏହି ଆଦେଶରେ ଏହା ମଧ୍ୟ କୁହାଯାଇଛି ଯେ, ଚିକିତ୍ସା ସମୟରେ ସୃଷ୍ଟି ହେଉଥିବା ଜୈବ ଚିକିତ୍ସା ବର୍ଜ୍ୟବସ୍ତୁ ନିଷ୍କାସନର ଦାୟିତ୍ବ ଡାକ୍ତରଖାନାର । ଏହି ନିର୍ଦ୍ଦେଶ ଅନୁଯାୟୀ, କୋରୋନା ରୋଗୀଙ୍କ ଦେଖାଶୁଣା ପାଇଁ ହୋଟେଲର ସମସ୍ତ କର୍ମଚାରୀଙ୍କୁ ସୁରକ୍ଷା ଉପକରଣ ଏବଂ ତାଲିମ ଦିଆଯିବ ।
ରୋଗୀଙ୍କ ପାଇଁ ଆମ୍ବୁଲାନ୍ସ ବ୍ୟବସ୍ଥା ଡାକ୍ତରଖାନା କରିବ । ଖାଦ୍ୟ ଏବଂ ସ୍ବଚ୍ଛତା ସହିତ ଅନ୍ୟାନ୍ୟ କାର୍ଯ୍ୟ ହୋଟେଲ ବୁଝିବ । ଏହି ନିର୍ଦ୍ଦେଶରେ କୁହାଯାଇଛି ଯେ ରୁମର ଭଡା ଡାକ୍ତରଖାନାରୁ ସଂଗ୍ରହ କରାଯାଇ ହୋଟେଲକୁ ଦିଆଯିବ ।
ଅଧିକାରୀଙ୍କ କହିବାନୁସାରେ, ଯଦି ଆବଶ୍ୟକ ହୁଏ ତେବେ ଡାକ୍ତରଖାନା ଡାକ୍ତର, ନର୍ସ ଏବଂ ପାରାମେଡିକାଲ କର୍ମଚାରୀଙ୍କ ରହିବା ପାଇଁ ହୋଟେଲ ବ୍ୟବସ୍ଥା କରିପାରିବ । ଏଥିପାଇଁ ହୋଟେଲ ଏବଂ ହସ୍ପିଟାଲ ମିଶି ଫି ସ୍ଥିର କରିବେ।
