ନୂଆଦିଲ୍ଲୀ: ଥଣ୍ଡା ବଢିବା ସହିତ ଦିଲ୍ଲୀର ବାୟୁମଣ୍ଡଳରେ ମଧ୍ୟ ପ୍ରଦୂଷଣର ମାତ୍ରା ଅହେତୁକ ଭାବେ ବୃଦ୍ଧି ପାଇଛି। ରବିବାର ସକାଳ ସୁଦ୍ଧା ରାଜଧାନୀ ଦିଲ୍ଲୀର ବାୟୁମଣ୍ଡଳର ଏୟାର କ୍ବାଲିଟି ସୂଚକାଙ୍କ 173 ପଏଣ୍ଟ ରେକର୍ଡ କରାଯାଇଛି ଯାହା ଗତ 5 ମାସ ମଧ୍ୟରେ ସର୍ବାଧିକ ରହିଛି।
ଦିଲ୍ଲୀ ସହରର ଅନେକ ଅଞ୍ଚଳର ଏୟାର କ୍ବାଲିଟି ସୂଚକାଙ୍କ 200 ପାର କରିଛି ଯାହା ଦିଲ୍ଲୀବାସୀଙ୍କ ଚିନ୍ତାର କାରଣ ପାଲଟିଛି। ଚଳିତ ବର୍ଷ ସାମାନ୍ୟରୁ କମ ମାତ୍ରାର ବୃଷ୍ଟିପାତ ହୋଇଥିବା କାରଣରୁ ଦିଲ୍ଲୀ ସମେତ ଏନସିଆରରେ ବାୟୁରେ ପ୍ରଦୂଷଣ ମାତ୍ରା ବଢିଥିବାର ଅନୁମାନ କରିଛି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ। କମ ବୃଷ୍ଟିପାତ କାରଣରୁ ବାୟୁ ମଣ୍ଡଳରେ ଧୂଳି ଓ ବିଷାକ୍ତ କଣିକା ଘୁରି ବୁଲୁଥିବା ଯୋଗୁ ପ୍ରଦୁଷଣର ମାତ୍ରା ଅହେତୁକ ଭାବେ ବୃଦ୍ଧି ପାଇବାର ସାମ୍ଭାବ୍ୟ କାରଣ ହୋଇଥାଇପାରେ ବୋଲି ପ୍ରଦୂଷଣ ବୋର୍ଡର ଅଧିକାରୀ ସୂଚନା ଦେଇଛନ୍ତି ।
ଅଲିପୁର 166
ଆନନ୍ଦ ବିହାର 193
ଅଶୋକ ବିହାର 172
ମଥୁରା ରୋଡ 244
ଡିଟିୟୁ 207
ଦିଲସାଦଲ ଗାର୍ଡେନ 176
ଆଇଟିଓ 178
ଜାହାଙ୍ଗିରପୁରୀ 227
ଲୋଦି ରୋଡ 127
ମନ୍ଦିର ମାର୍ଗ 164
ମୁଣ୍ଡକା 252
ଦ୍ବାରକା 167
ନଜଫଗଡ 148
ନରେଲା 208
ଓଖଲା 159
ରୋହିଣି 179
ଦିଲ୍ଲୀର ପଡୋଶୀ ରାଜ୍ୟରେ ଶୀତ ଋତୁରେ ପାରୋଲି ଜଳାଯାଉଥିବା ଯୋଗୁଁ ଏହା ଆଉ ଏକ କାରଣ ହୋଇପାରେ ବୋଲି ମଧ୍ୟ ଅନୁମାନ କରାଯାଉଛି । ଦିଲ୍ଲୀର ପଡୋଶୀ ରାଜ୍ୟ ଓ ଉତ୍ତର ଭାରତର କେତକ ରାଜ୍ୟରେ ଶୀତ ଦିନେ ପାରୋଲି ଜଳାଯାଏ। ସେଥିରୁ ସୃଷ୍ଟି ହେଉଥିବା ଧୂଆଁ ଯୋଗୁ ବାୟୁମଣ୍ଡଳରେ ବିଷାକ୍ତ କଣିକାର ମାତ୍ରା ବୃଦ୍ଧି ପାଇଥାଏ। ଫଳରେ ଏହି ପ୍ରଦୂଷଣର ମାତ୍ରା ଆଗକୁ ଆହୁରି ମଧ୍ୟ ବଢିପାରେ ବୋଲି ମଧ୍ୟ ଆଶଙ୍କା ଦେଖାଦେଇଛି।
