ନୂଆଦିଲ୍ଲୀ: ଜୋର ଧରିଛି ଜୟଶ୍ରୀରାମ ନାରା । ତେବେ ଏହା ସକାରାତ୍ମକ ଭାବେ ନୁହେଁ ବରଂ ନକାରାତ୍ମକ ଦିଗରେ ଗତି କରୁଛି । ମୁସଲିମ ତଥା ମୌଲାନାଙ୍କୁ ଏଥିଲାଗି ଟାର୍ଗେଟ କରାଯାଉଛି । ଦିଲ୍ଲୀର ଜଣେ ମୌଲାନା ଜୟ ଶ୍ରୀରାମ ନାରା ନଦେବାରୁ ତାଙ୍କୁ ଆକ୍ରମଣ କରାଯାଇଛି । ମୌଲାନାଙ୍କ ପରିଚୟ ମୋହମ୍ମଦ ମୋମିନ ଭାବେ ଜଣାପଡିଛି ।
ଦିଲ୍ଲୀର ରୋହିଣୀ ସେକ୍ଟର-20ରେ ମୋହମ୍ମଦ ମୋମିନ ଏଭଳି ଅଭିଯୋଗ କରିଛନ୍ତି । ସେ ‘ଜୟଶ୍ରୀରାମ’ ନାରା ନଦେବାରୁ ତାଙ୍କୁ କିଛି ଲୋକେ ଗାଳିଗୁଳଜ କରିଥିଲେ । ପରେ ତାଙ୍କୁ ଧମକଚମକ ଦେବା ସହ କାର ଦ୍ବାରା ଧକ୍କା ମାରିଥିଲେ ବୋଲି ଅଭିଯୋଗ ଆସିଛି । ତେବେ ମୋହମ୍ମଦ ଅମନ ବିହାର ଅଞ୍ଚଳରେ ବାସ କରନ୍ତି । ତାଙ୍କର କହିବା କଥା ହେଲା ସେ ସନ୍ଧ୍ୟା ବେଳେ ବାହାରକୁ ବୁଲିବା ପାଇଁ ଚାଲି ଚାଲି ଯାଉଥିଲେ । ସେହି ସମୟରେ ହଠାତ କିଛି ଯୁବକ କାର ଯୋଗେ ଆସି ତାଙ୍କୁ ‘ଜୟଶ୍ରୀରାମ’ ନାରା ଦେବାକୁ ବାଧ୍ୟ କରିଥିଲେ । ସେ ଏଭଳି ନାରା ନଦେବାରୁ ତାଙ୍କୁ ମାରପିଟ କରିବା ସହ ଦୁର୍ବ୍ୟବହାର କରାଗଲା ।
ମୋହମ୍ମଦ ବର୍ତ୍ତମାନ ଆହତ ଅଛନ୍ତି । ଏହି ଘଟଣାରେ ଦିଲ୍ଲୀ ପୋଲିସ ତଦନ୍ତ ଆରମ୍ଭ କରି ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରିଛି । ସପେଟେ ଘଟଣା ଘଟିଥିବା ସ୍ଥାନର ସିସିଟିଭି ଫୁଟେଜକୁ ଆଧାର କରି ତଦନ୍ତ ଜାରି ରଖିଛି ପୋଲିସ ।
