ଜୟପୁର: ରାଜସ୍ଥାନ କୋଟାସ୍ଥିତ ଜେକେ ଲୋନ ହସ୍ପିଟାଲରେ ଶିଶୁ ମୃତ୍ୟୁ ଭୟଙ୍କର ରୂପ ନେଉଛି । ଏତେ ସଂଖ୍ୟକ ଶିଶୁଙ୍କ ମୃତ୍ୟୁ ସ୍ବାସ୍ଥ୍ୟବିଭାଗର ଚିନ୍ତା ବଢାଇ ଦେଇଛି। ତେବେ ଏହି ଘଟଣାର ତଦନ୍ତ ପାଇଁ ଆଜି କେନ୍ଦ୍ରୀୟ ଚିକିତ୍ସା ମନ୍ତ୍ରଣାଳୟର ଏକ ଟିମ କୋଟାର ସରକାରୀ ହସ୍ପିଟାଲରେ ପହଞ୍ଚିଛନ୍ତି ।
ଏହି ଟିମ ଡାକ୍ତରଖାନାରେ ହୋଇଥିବା ଶିଶୁ ମୃତ୍ୟୁ ଘଟଣାର ତଦନ୍ତ କରୁଛନ୍ତି । ଏହାସହ ଡାକ୍ତରଖାନାରେ ଥିବା ବିଭିନ୍ନ ଅସୁବିଧାର ଏକ ରିପୋର୍ଟ ପ୍ରସ୍ତୁତ କରୁଛନ୍ତି । ଏହି ରିପୋର୍ଟ ପ୍ରସ୍ତୁତ ପରେ କେନ୍ଦ୍ରୀୟ ଟିମକୁ ପଠାଯିବ ବୋଲି ସୂଚନା ମିଳିଛି ।
ସୂଚନା ଅନୁସାରେ, ରାଜସ୍ଥାନର କୋଟାରେ ଶିଶୁ ମୃତ୍ୟୁ ଏବେ ବି ଥମିବାର ନାଁ ନେଉନି। ଏହି କାରଣରୁ କେନ୍ଦ୍ରସରକାରଙ୍କ ନେତୃତ୍ବାଧୀନ ଏହି ଟିମକୁ ହସ୍ପିଟାଲକୁ ପଠାଯାଇଛି। ଏହି ଟିମରେ ଏମ୍ସ ଏଡଓଡି କୁଲଦୀପ ସିଂ, ୱାରିସା, ଅରୁଣ ସିଂ ସମେତ ଅନେକ ବରିଷ୍ଠ ଡାକ୍ତର ସାମିଲ ଅଛନ୍ତି । ଏହି ସମସ୍ତ ଡାକ୍ତରଙ୍କ ପାଇଁ କୋଟାସ୍ଥିତ ସର୍କିଟ ହାଉସରେ ରହିବାର ବ୍ୟବସ୍ଥା କରାଯାଇଛି ।
ଏହି ଟିମ ଜେକେଲୋନ ହସ୍ପିଟାଲର ଜେନେରାଲ ୱାର୍ଡ ପିଆଇସିୟୁ ଓ ଏନଆଇସିୟୁ ବିଭାଗର ପରିଦର୍ଶନ କରିବେ । ଏହି ସମୟରେ ମେଡିକାଲରେ ଥିବା ସମସ୍ତ ରୋଗୀଙ୍କ ସହ କଥାବାର୍ତ୍ତା ହେବାସହ ସେମାନଙ୍କ ଭଲମନ୍ଦ ପଚାରି ବୁଝିବେ ।
ସୂଚନା ଅନୁସାରେ, କୋଟାର ଜେକେଲୋନ ହସ୍ପିଟାଲରେ 100ରୁ ଊର୍ଦ୍ଧ୍ବ ଶିଶୁଙ୍କର ଜୀବନ ଯାଇସାରିଲାଣି । ଏତେ ଦିନ ଧରି ନିରବ ଥିବା ରାଜ୍ୟ ସରକାର ହଠାତ ନିଦରୁ ଉଠିଛନ୍ତି । ଘଟଣାକୁ ନେଇ ରାଜସ୍ଥାନରେ ରାଜନୀତି ଜୋର ଧରିଛି ।
