ବଲିଆ: ସମସ୍ତ ଡ଼ାକ୍ତରଖାନାକୁ 24 ଘଣ୍ଟିଆ ବିଜୁଳି ଯୋଗାଇଦେବାକୁ ଘୋଷଣା କରିଛନ୍ତି ଯୋଗୀ ସରକାର । କିନ୍ତୁ ବଲିଆ ଜିଲ୍ଲା ମୁଖ୍ୟ ଚିକିତ୍ସାଳୟରେ ଦେଖିବାକୁ ମିଳିଛି ସମ୍ପୂର୍ଣ୍ଣ ବିପରୀତ ବ୍ଯବସ୍ଥା । ଦୁଇ ଦିନ ହେବ ବିପର୍ଯ୍ୟସ୍ତ ହୋଇପଡ଼ିଛି କରେଣ୍ଟ ସେବା । ରୋଗୀଙ୍କ ପାଇଁ ପଙ୍ଖା ତ ଲାଗିଛି କିନ୍ତୁ ବିଜୁଳିର ବିକଳ୍ପ ସାଜିଥିବା ଜେନେରେଟର ବି ଏଠାରେ ଅଚଳ । ଆଉ ଏପଟେ ପ୍ରବଳ ଗରମ ହେଉଥିବାରୁ ହାତରେ ବିଞ୍ଚଣା ଧରି ରୋଗୀଙ୍କୁ ବିଞ୍ଚିବାରେ ଲାଗିଛନ୍ତି ସମ୍ପର୍କୀୟ ।
କରେଣ୍ଟ ସପ୍ଲାଇ ଠପ୍ ହୋଇଯାଇଥିବାରୁ ଦିନରେ ତ କାମ ଚଳିଯାଉଛି କିନ୍ତୁ ରାତିରେ ଭୟାନକ ହୋଇପଡ଼ୁଛି ରୋଗୀଙ୍କ ଅବସ୍ଥା । ଜରୁରୀକାଳୀନ ବିଭାଗରେ ମୋବାଇଲ ଟର୍ଚ୍ଚରେ ଚାଲୁଛି ଚିକିତ୍ସା । ଯାହା ପ୍ରଶାସନର ପାରିବାପଣିଆକୁ ପଦାରେ ପକାଇଛି ବୋଲି କହିଛନ୍ତି ରୋଗୀଙ୍କ ସମ୍ପର୍କୀୟ ।
ଆଉ ଏଭଳି ଏକ ସମ୍ବେଦନଶୀଳ ଘଟଣାରେ ଖାମଖିଆଲି ଭାବେ ମନ୍ତବ୍ୟ ଦେଇଛନ୍ତି ଜିଲ୍ଲା ମୁଖ୍ୟ ଚିକିତ୍ସାଧିକାରୀ । ଡ଼ାକ୍ତରଖାନାରେ ବିଜୁଳିର ସେପରି କିଛି ଅସୁବିଧା ନାହିଁ, କେବୁଲରେ କିଛି ସମସ୍ଯା ପାଇଁ ଏପରି ଘଟିଥାଇପାରେ । ତେଣୁ ତୁରନ୍ତ ଏହାର ମରାମତି କରାଯିବ ବୋଲି ସେ କହିଛନ୍ତି ।
ରୋଗୀଙ୍କ ଜୀବନ ସହ ଜଡ଼ିତ ଥିବା ଚିକିତ୍ସାକେନ୍ଦ୍ରରେ କେବେ ସୁଧୁରୁଛି ବିଜୁଳି ବ୍ଯବସ୍ଥା ଏବଂ କଣ ରହୁଛି ପ୍ରଶାସନର ପଦକ୍ଷେପ ତାହା କେବଳ ଦେଖିବାକୁ ବାକି ।
ବ୍ୟୁରୋ ରିପୋର୍ଟ, ଇଟିଭି ଭାରତ
