ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଦେଶରେ କୋରୋନା (COVID-19) ମୁକାବିଲା ପାଇଁ ଯୋଜନା ତଥା କାର୍ଯ୍ୟକାରିତାକୁ ସୁନିଶ୍ଚିତ କରିବା ପାଇଁ ଗଠିତ ସଶକ୍ତ ଗୋଷ୍ଠୀ ମାନଙ୍କର ମିଳିତ ବୈଠକରେ ଅଧ୍ୟକ୍ଷତା କରିଛନ୍ତି । ଏନେଇ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ।
ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି , ‘ଦେଶରେ କୋରୋନା ମୁକାବିଲା ପାଇଁ ଯୋଜନା ତଥା କାର୍ଯ୍ୟକାରିତାକୁ ସୁନିଶ୍ଚିତ କରିବା ପାଇଁ ଗଠିତ ସଶକ୍ତ ଗୋଷ୍ଠୀର ମିଳିତ ବୈଠକରେ ପ୍ରଧାନମନ୍ତ୍ରୀ ମୋଦି ଅଧ୍ୟକ୍ଷତା କରିଥିଲେ । ଡାକ୍ତରଖାନା ଉପଲବ୍ଧତା, ଉପଯୁକ୍ତ ଆଇସୋଲେସନ ବ୍ୟବସ୍ଥା ଏବଂ କ୍ବାରେଣ୍ଟାଇନ ସୁବିଧା ବିଷୟରେ ସେ ଦେଶବ୍ୟାପୀ ପ୍ରସ୍ତୁତିର ସମୀକ୍ଷା କରିଥିଲେ ।’
ମାର୍ଚ୍ଚ 29ରେ ଗୃହ ମନ୍ତ୍ରଣାଳୟ ବିପର୍ଯ୍ୟୟ ପରିଚାଳନା ଅଧିନିୟମ, 2005 ଅନୁଯାୟୀ କୋରୋନାର ସମନ୍ବିତ ମୁକାବିଲା କରିବା ପାଇଁ 11ଟି ସଶକ୍ତ ଗୋଷ୍ଠୀ ଗଠନ କରିଥିଲେ । ସଶକ୍ତ ଗୋଷ୍ଠୀଗୁଡ଼ିକ ହେଉଛି, ମେଡିକାଲ ଜରୁରୀକାଳୀନ ପରିଚାଳନା ଯୋଜନା, ଡାକ୍ତରଖାନାର ଉପଲବ୍ଧତା, ଆଇସୋଲେସନ ଏବଂ କ୍ବାରେଣ୍ଟାଇନ ସୁବିଧା, ରୋଗର ତଦାରଖ, ପରୀକ୍ଷା ଏବଂ ଜରୁରୀକାଳୀନ ସମୟରେ ଯତ୍ନ ତାଲିମ, ଚିକିତ୍ସା ଉପକରଣର ଉପଲବ୍ଧତାକୁ ସୁନିଶ୍ଚିତ କରିବା, ମାନବ ସମ୍ବଳ ଏବଂ ଦକ୍ଷତା ବିକାଶ, ଯୋଗାଣ ଶୃଙ୍ଖଳା ଏବଂ ଲଜିଷ୍ଟିକ୍ ପରିଚାଳନାକୁ ସୁଗମ କରିବା | ଆବଶ୍ୟକ ସାମଗ୍ରୀ ଯେପରିକି ଖାଦ୍ୟ ଏବଂ ଔଷଧ, ବେସରକାରୀ କ୍ଷେତ୍ର, ଏନଜିଓ ଓ ଆନ୍ତର୍ଜାତୀୟ ସଂଗଠନ ସହିତ ପ୍ରତିକ୍ରିୟା ସମ୍ବନ୍ଧୀୟ କାର୍ଯ୍ୟକଳାପ, ଅର୍ଥନୈତିକ ଓ କଲ୍ୟାଣମୂଳକ ପଦକ୍ଷେପ, ସୂଚନା ଯୋଗାଯୋଗ ଏବଂ ଜନସଚେତନତା, ପ୍ରଯୁକ୍ତିବିଦ୍ୟା ଓ ତଥ୍ୟ ପରିଚାଳନା, ଜନସାଧାରଣଙ୍କ ଅଭିଯୋଗ ଓ ପରାମର୍ଶ, ଏବଂ କୌଶଳ ସମ୍ବନ୍ଧୀୟ ପ୍ରସଙ୍ଗ ପାଇଁ ସମନ୍ବୟ ରକ୍ଷା କରିବା ।
ଏହି 11ଟି ସଶକ୍ତୀକରଣ ଗୋଷ୍ଠୀ ନଅ ଜଣ ସଚିବ ସ୍ତରର ଅଧିକାରୀ, ଜଣେ ନୀତି ଆୟୋଗର ସଦସ୍ୟ ଏବଂ ଜଣେ ନୀତି ଆୟୋଗର ସିଇଓଙ୍କ ଦ୍ବାରା ପରିଚାଳିତ |
ଗୋଷ୍ଠୀ ଗୁଡିକ ବିଭିନ୍ନ ସମସ୍ୟା କ୍ଷେତ୍ରଗୁଡିକ ଚିହ୍ନଟ ଏବଂ ଏହାର ସମାଧାନ କରିବା ସହ ନୀତି ନିର୍ଦ୍ଧାରଣ, ଯୋଜନା ପ୍ରସ୍ତୁତ, ରଣନୀତି କାର୍ଯ୍ୟ କରିବା ଏବଂ ନିଜ ନିଜ କ୍ଷେତ୍ରରେ ଏହି ଯୋଜନା, ନୀତି, ରଣନୀତି, ନିଷ୍ପତ୍ତି ଗୁଡିକର ସମୟ ସୀମା ମଧ୍ୟରେ କାର୍ଯ୍ୟକାରୀ କରିବା ପାଇଁ ପଦକ୍ଷେପ ନେବାକୁ କ୍ଷମତାପ୍ରାପ୍ତ |
@ANI
