ଲକ୍ଷ୍ନୌ: ୟୁପି ମୁଜାଫରନଗରରେ ସଡ଼କ ଦୁର୍ଘଟଣାରେ 6 ଜଣ ଶ୍ରମିକଙ୍କର ମୃତ୍ୟୁ ହୋଇଛି, 2 ଜଣ ଗୁରୁତର ଆହତ ହୋଇଛନ୍ତି । ଘଟଣାରେ ପ୍ରବାସୀ ଶ୍ରମିକଙ୍କ ମୃତ୍ୟୁକୁ ନେଇ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଗଭୀର ସମବେଦନା ଜଣାଇଛନ୍ତି । ସମସ୍ତ ଆହତଙ୍କୁ ଉପଯୁକ୍ତ ଚିକିତ୍ସା ଯୋଗାଇବା ଏବଂ ମୃତକଙ୍କୁ ତାଙ୍କ ସମ୍ପର୍କୀୟଙ୍କ ନିକଟକୁ ପଠାଇବା ପାଇଁ ସିଏମ ଯୋଗୀ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ସହିତ ସିଏମ ମୃତକଙ୍କ ପରିବାରକୁ ପ୍ରତ୍ୟେକ ପିଛା 2 ଲକ୍ଷ ଟଙ୍କା ଏବଂ ଗୁରୁତର ଆହତମାନଙ୍କୁ 50 ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରିବାକୁ ଘୋଷଣା କରିଛନ୍ତି ।
ସୂଚନାନୁସାରେ, ବୁଧବାର ରାତିରେ 8 ଜଣ ଶ୍ରମିକ ରାସ୍ତାରେ ଯାଉଥିବାବେଳେ ରାଜ୍ୟ ପରିବହନର ବସ ଶ୍ରମିକଙ୍କ ଉପରେ ଚଢିଯାଇଥିଲା । ଏହି ଦୁର୍ଘଟଣାରେ 6 ଜଣ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ 2 ଜଣ ଗୁରୁତର ଆହତ ହୋଇଛନ୍ତି । ସମସ୍ତ ଆହତଙ୍କୁ ମେରଠ ମେଡିକାଲରେ ଭର୍ତ୍ତି କରାଯାଇଥିଲା। ପୋଲିସର ସୂଚନାନୁସାରେ, ବସ ଡ୍ରାଇଭରକୁ ଗିରଫ କରାଯାଇଛି ।
