ରାୟପୁର: କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନା ଠାରୁ 4 ଗୁଣା ଅଧିକ ଟଙ୍କାର ଚିକିତ୍ସା ପାଇଁ ଅର୍ଥରାଶି ପ୍ରଦାନ କରିବାକୁ ଯାଉଛନ୍ତି ଛତିଶଗଡ ସରକାର । ରାଜ୍ୟରେ ଲାଗୁ କରାଯିବ ନୂତନ ସ୍ବାସ୍ଥ୍ୟ ଯୋଜନା । ଏହି ଯୋଜନା ଦେଶର ସବୁଠାରୁ ବଡ ହେଲଥ କେୟାର ଯୋଜନା ଆୟୁଷ୍ମାନ ଯୋଜନାକୁ ପଛରେ ପକାଇଦେବ । ଏହି ଯୋଜନାରେ ଏବେ 20 ଲକ୍ଷ ଟଙ୍କା ପର୍ଯ୍ୟନ୍ତ ଚିକିତ୍ସା ସହାୟତା ପ୍ରଦାନ କରାଯିବ । 'ମୁଖ୍ୟମନ୍ତ୍ରୀ ବିଶେଷ ସ୍ବାସ୍ଥ୍ୟ ସହାୟତା ଯୋଜନା’ ପ୍ରାରମ୍ଭ କରିବା ନିର୍ଣ୍ଣୟ ଛତିଶଗଡ ମନ୍ତ୍ରୀ ପରିଷଦ ବୈଠକରେ ସର୍ବସମ୍ମତି କ୍ରମେ ଶୁକ୍ରବାର ପାରିତ ହୋଇଛି ।
ଶୁକ୍ରବାର ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବଘଲେ ଏନେଇ ଟ୍ବିଟ କରି ସୂଚନା ଦେଇଛନ୍ତି । ଏହି ଯୋଜନା ଅଧିନରେ ପ୍ରତ୍ୟକ ପରିବାରକୁ ଚିକିତ୍ସା ପାଇଁ 20 ଲକ୍ଷ ଟଙ୍କା ପର୍ଯ୍ୟନ୍ତ ଆର୍ଥିକ ସହାୟତା ଯୋଗାଇଦେବେ ସରକାର । ମୁଖ୍ୟମନ୍ତ୍ରୀ ଭାବରେ ଶପଥ ନେବା ପରେ ବଘେଲ ସରକାରଙ୍କ ଏହା ସବୁଠାରୁ ବଡ ପଦକ୍ଷେପ । ଏହି ସୂଚନା ଟ୍ବିଟରେ ସେୟାର କରି ବଘେଲ ହ୍ୟାସ ଟ୍ୟାଗ ଆୟୁଷ୍ମାନ ଭାରତ ଠାରୁ ଚାରିଗୁଣା ମଧ୍ୟ ବ୍ୟବହାର କରିଛନ୍ତି ।
ଏଠାରେ ସୂଚନା ଯୋଗ୍ୟ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଝାଡଖଣ୍ଡର ରାଜଧାନୀ ରାଞ୍ଚିର ପ୍ରଭାତତାରା ମଇଦାନରେ ଆୟୁଷ୍ମାନ ଭାରତ ଯୋଜନାର ଶୁଭାରମ୍ଭ କରିଥିଲେ । ସରକାରଙ୍କ କହିବାନୁସାରେ ଏହା ଦୁନିଆର ସବୁଠାରୁ ବଡ ହେଲଥ କେୟାର୍ ଯୋଜନା,ଯେଉଁଥିରେ ୫୦ କୋଟି ଲୋକଙ୍କୁ ସରକାରୀ ଏବଂ ବେସରକାରୀ ଡାକ୍ତରଖାନାରେ ଚିକିତ୍ସା ପାଇଁ ୫ ଲକ୍ଷ ଟଙ୍କାର ସହାୟତା ମିଳିବ । ଏବେ ଆୟୁଷ୍ମାନ ଯୋଜନାକୁ ପଛରେ ପକାଇବେ ଛତିଶଗଡ ସରକାରଙ୍କ ଏହି ମୁଖ୍ୟମନ୍ତ୍ରୀ ବିଶେଷ ସ୍ବାସ୍ଥ୍ୟ ସହାୟତା ଯୋଜନା ।
