ନୂଆଦିଲ୍ଲୀ: ଦେଶରେ ବିଭିନ୍ନ ରାଜ୍ୟ ମଧ୍ୟରୁ କେରଳ, କର୍ଣ୍ଣାଟକ, ରାଜସ୍ଥାନ, ଛତିଶଗଡ ଏବଂ ପଶ୍ଚିମବଙ୍ଗରୁ ସର୍ବାଧିକ କୋରୋନା ମାମଲା ରେକର୍ଡ କରାଯାଉଛି । ଏଣୁ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଉଚ୍ଚ ସ୍ତରୀୟ କେନ୍ଦ୍ରୀୟ ଦଳକୁ ଏହି ରାଜ୍ୟଗୁଡିକୁ ସ୍ଥିତି ସମୀକ୍ଷା ପାଇଁ ପଠାଇଛନ୍ତି ।
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଶୁକ୍ରବାର ଦେଇଥିବା ଏକ ବିବୃତ୍ତି ଅନୁଯାୟୀ, ପ୍ରତ୍ୟେକ ଟିମରେ ଜଣେ ଯୁଗ୍ମ ସଚିବ ସାମିଲ ରହିଛନ୍ତି । ଏଥିସହ ସାର୍ବଜନୀନ ବିଭାଗର ଯତ୍ନ ନେବାକୁ ଜଣେ ଜନସ୍ୱାସ୍ଥ୍ୟ ବିଶେଷଜ୍ଞ ଏବଂ ରାଜ୍ୟ ଦ୍ବାରା କ୍ଲିନିକାଲ୍ ମ୍ୟାନେଜମେଣ୍ଟ ପ୍ରୋଟୋକଲ୍ ନିଶ୍ଚିତ କରିବାକୁ ଜଣେ କ୍ଲିନିକାଲ ବିଶେଷଜ୍ଞ ଏହି ଟିମରେ ସାମିଲ ଅଛନ୍ତି।
ଏହି ଟିମଗୁଡିକ କଣ୍ଟେନମେଣ୍ଟ, ସିସିଟିଭି, ଟେଷ୍ଟିଂ, ସଂକ୍ରମଣ ନିରାକରଣ ଏବଂ ନିୟନ୍ତ୍ରଣ ପଦକ୍ଷେପ ଏବଂ ସକରାତ୍ମକ ମାମଲା ଗୁଡ଼ିକର କ୍ଲିନିକାଲ ପରିଚାଳନାକୁ ଦୃଢ କରିବା ଦିଗରେ ରାଜ୍ୟର ଉଦ୍ୟମକୁ ସମର୍ଥନ କରିବେ। ଏହାଛଡା ଏହି ଟିମ୍ ମଧ୍ୟ ଠିକ ସମୟରେ ନିରାକରଣ ଏବଂ ଅନୁସରଣ ସହିତ ଜଡିତ ଚ୍ୟାଲେଞ୍ଜଗୁଡ଼ିକୁ ସଫଳତାର ସହିତ ପରିଚାଳନା କରିବାରେ ରାଜ୍ୟଗୁଡିକର ମାର୍ଗଦର୍ଶନ କରିବେ ।
କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, କେରଳରେ ବର୍ତ୍ତମାନ ସୁଦ୍ଧା 3 ଲକ୍ଷ 17 ହଜାର 929 କୋରୋନା ଆକ୍ରାନ୍ତ ରହିଛନ୍ତି । ଯାହା ମୋଟ ମାମଲାର 4.3 ପ୍ରତିଶତ । ସେହିପରି କର୍ଣ୍ଣାଟକରେ 7,43,848 ଆକ୍ରାନ୍ତ ରହିଛନ୍ତି । ଯାହା ମୋଟ ମାମଲାର 10.1 ପ୍ରତିଶତ ଅଟେ। ଏହି କ୍ରମରେ ରାଜସ୍ଥାନରେ 1,67,279 ମାମଲା, ପଶ୍ଚିମବଙ୍ଗରେ 3,09,417 ଏବଂ ଛତିଶଗଡରେ 1,53,515 ମାମଲା ରହିଛି।
