ହାଇଦ୍ରାବାଦ: ଆରୋଗ୍ୟ ସେତୁରେ ସୁରକ୍ଷାକୁ ନେଇ ଅନେକ ସମୟରେ ଉଠିଛି ପ୍ରଶ୍ନ । ଏହି ଆପ୍ରେ ବ୍ୟକ୍ତିଗତ ତଥ୍ୟ ଦିଆଯାଉଥିବାରୁ ଏହି ତଥ୍ୟ କେତେ ସୁରକ୍ଷିତ କାହାକୁ ନେଇ ଅନେକ ସମୟରେ ଆପ୍ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ଏହି ସମସ୍ୟାର ସମାଧାନ ପାଇଁ କେନ୍ଦ୍ର ସରକାର ଆପ୍ଟିକୁ ବର୍ତ୍ତମାନ ଓପନ ସୋର୍ସରେ ପରିଣତ କରିଛନ୍ତି । ଏହା ଦ୍ବାରା ଗବେଷକ, ବିଶାରଦ ଓ ଆପ୍କୁ ବିକାଶ କରୁଥିବା ଏକ୍ସପର୍ଟମାନେ ଏଥିରେ ଆକ୍ସେସ କରି ଏହାର କାର୍ଯ୍ୟକାରିତାକୁ ନିଜେ ବୁଝିପାରିବେ ।
ଆପ୍ଲିକେଶନର ଆଣ୍ଡ୍ରଏଡ ଭର୍ସନରେ ସୋର୍ସ କୋଡ ବର୍ତ୍ତମାନ ସମୀକ୍ଷା ପାଇଁ ଉପଲବ୍ଧ ହୋଇଛି । ସେପଟେ ଆଇଓଏସ ଭର୍ସନ ପାଇଁ ଆଗାମୀ 2 ସପ୍ତାହ ମଧ୍ୟରେ ଓପନ ସୋର୍ସକୁ ରିଲିଜ କରାଯିବାର ଯୋଜନା ରହିଛି । ଏଥିସହ ଏହି ସମୟ ମଧ୍ୟ ସର୍ଭର କୋଡ ମଧ୍ୟ ରିଲିଜ କରିବାର ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର । ତେବେ ଆରୋଗ୍ୟ ସେତୁ ଆପ୍ର 98 ପ୍ରତିଶତ ୟୁଜର୍ସ ଆଣ୍ଡ୍ରଏଡ ପ୍ଲାଟଫର୍ମର ବ୍ୟବହାର କରୁଥିବା ଜଣା ପଡିଛି ।
ଏହି ଆପ୍ରେ ଗୋପନୀୟତା, ସୁରକ୍ଷା ଓ ଟ୍ରାନ୍ସପରେନ୍ସିକୁ ପ୍ରାଧାନ୍ୟ ଦିଆଯାଇଥିବା ବେଳେ ଏହାର ସୋର୍ସ କୋଡକୁ ବର୍ତ୍ତମାନ ଓପନ ସୋର୍ସ କରାଯାଇଛି । ଏନେଇ ସୂଚନା ଦେଇଛନ୍ତି ଇଲେକ୍ଟ୍ରୋନିକ୍ସ ଓ ଆଇଟି ମନ୍ତ୍ରଣାଳୟ । ଏହା ଦ୍ବାରା ଡେଭେଲପର କମ୍ୟୁନିଟିମାନେ ବିଭିନ୍ନ ସମୟରେ ଏଥିରେ ଗୋପନୀୟତା ଓ ସୁରକ୍ଷାକୁ ନେଇ ଉଠାଇଥିବା ପ୍ରଶ୍ନର ଉତ୍ତର ସେମାନ ନିଜେ ପାଇପାରିବେ ବୋଲି କୁହାଯାଇଛି ।
@IANS
