ଭୋପାଳ: ପୂର୍ବରୁ ବାହାଘର ଓ ବ୍ରତଘର ପାଇଁ ହଳଦୀ-ଚାଉଳ ଦେଇ ନିମନ୍ତ୍ରଣ କରାଯାଉଥିଲା । କେତେକ ସ୍ଥାନରେ ଏବେବି ଏହି ପରମ୍ପରା ରହିଛି । ହଳଦୀ-ଚାଉଳକୁ ଶୁଭକାର୍ଯ୍ୟର ପ୍ରତୀକ ଭାବରେ ଆମ ସଭ୍ୟତାରେ ଗ୍ରହଣ କରାଯାଇଥାଏ । ଆଉ ଏବେ ନିର୍ବାଚନ ପ୍ରଚାରରେ ବି ଏହାର ବ୍ୟବହାର ଦେଖିବାକୁ ମିଳିଛି ।
ଘଟଣାଟି ମଧ୍ୟପ୍ରଦେଶର । ଆସନ୍ତା 19ରେ ହେବ ଶେଷ ପର୍ଯ୍ୟାୟ ନିର୍ବାଚନ । ଆଉ ଏଥିପାଇଁ ପ୍ରଚାର ଜୋରସୋରରେ ଚାଲିଛି । 17 ତାରିଖ ପ୍ରଚାରର ଶେଷ ଦିନ । ମଧ୍ୟପ୍ରଦେଶର ଖରଗୋନ ଜିଲ୍ଲାରେ ପ୍ରଧାନମନ୍ତ୍ରୀ ପ୍ରଚାର କରିବାର କାର୍ଯ୍ୟକ୍ରମ ରହିଛି । ତେବେ ମୋଦିଙ୍କ ସଭାରେ ସାମିଲ ହେବା ପାଇଁ ହଳଦୀ-ଚାଉଳ ଦେଇ ଲୋକଙ୍କୁ ନିମନ୍ତ୍ରଣ କରୁଛନ୍ତି ବିଜେପି କାର୍ଯ୍ୟକର୍ତ୍ତା ।
ଦଳୀୟ କର୍ମୀ ଘରକୁ ଘର ଯାଇ ଲୋକଙ୍କୁ ନିମନ୍ତ୍ରଣ କରୁଛନ୍ତି । ମୋଦିଙ୍କ ସଭାରେ ସାମିଲ ହେବା ପାଇଁ ଅନୁରୋଧ କରୁଛନ୍ତି । ତେଣୁ କୁହାଯାଇପାରେ ପୂର୍ବ ପରମ୍ପରାକୁ ଆପଣେଇ ଲୋକଙ୍କୁ ଆକୃଷ୍ଟ କରୁଛନ୍ତି ବିଜେପି କର୍ମକର୍ତ୍ତା ।
