ପାଟନା: ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ପରିବାରରେ ନୂଆମୋଡ । ବିହାର ଲୋକସଭା ନିର୍ବାଚନକୁ ନେଇ ଲାଲୁ ଯାଦବଙ୍କ ବଡ ପୁଅ ତେଜ ପ୍ରତାପଙ୍କ ୟୁ-ଟର୍ଣ୍ଣ । ଦୁଇ ଭାଇ ଭିତରେ ଚାଲିଥିବା ମହାଭାରତରେ ସାନ ଭାଇକୁ ନେଇ ଚାଲିଥିବା ମତଭେଦ ମଧ୍ୟରେ ହଠାତ ତେଜଙ୍କ ବଢିଛି ଭାଇ ପ୍ରୀତି ।
ଗତ କିଛିଦିନ ତଳେ ସମ୍ପତ୍ତି ବିବାଦକୁ ନେଇ ଦୁଇ ଭାଇଙ୍କ ବିବାଦ ଚାଲିଥିଲା । ପରେ ପରିବାର ବିରୋଧରେ ବିଦ୍ରୋହର ବିଗୁଲ ବଜାଉଥିବା ତେଜପ୍ରତାପଙ୍କୁ ବଡ ଭଉଣୀ ମିସା ଯାଦବଠୁ ସମର୍ଥନ ନମିଳିବାରୁ ଏଭଳି ୟୁ-ଟର୍ଣ୍ଣ ନେଇଥିବା କୁହାଯାଉଛି । ବିଗତ ଦିନ ରାଲିରେ ତେଜ ନିଜକୁ 'ଦ୍ବିତୀୟ ଲାଲୁ' କହୁଥିବା ତେଜପ୍ରତାପ ନିଜ ସାନ ଭାଇକୁ ପ୍ରଶଂସା କରି ଏକ ଭାବବିହ୍ବଳ ଟ୍ବିଟ କରିଛନ୍ତି ।
ଯେଉଁଥିରେ ଲେଖା ଯାଇଛି ଯେ, "ମୋ ସାନ ଭାଇ ମୋ ସାହାସ, ମୋ ଦମ୍ଭ, ସବୁକିଛି । ମୋ ପାଇଁ ସେ ମୋ ଜୀବନଠୁ ବଳି । ମୋ ଉପରେ ଯାହା ବିପଦ ପଡେ, ସେ ସବୁ ସମ୍ଭାଳି ନିଏ । ମୋ ସହ ମୋ ପରିବାର ସବୁବେଳେ ଖୁସିରେ ରୁହନ୍ତୁ। ଏହି ଚିନ୍ତାଧାରା ସହ ସେ ସବୁ କାମକୁ ସଫଳତାର ସହ ଶେଷ କରେ ।"
ପୈତୃକ ସମ୍ପତି ନେଇ ବିବାଦ ଚାଲିଥିବା ବେଳେ ଗତ କିଛିଦିନ ତଳେ ଜାହାନାବାଦରେ ଆୟୋଜିତ ଏକ ରାଲିରେ ତେଜ ନିଜକୁ ଦ୍ବିତୀୟ ଲାଲୁ ବୋଲି କହିଥିଲେ । ଏହାକୁ ଶୁଣିବା ପରେ ତାଙ୍କ ବଡ ଭଉଣୀ ନିଜ ସାନ ଭାଇ ତେଜସ୍ବୀ ଯାଦବଙ୍କୁ ଲାଲୁ ଯାଦବଙ୍କ ଅସଲ ଉତ୍ତରାଧିକାରୀ ବୋଲି କହିଥିଲେ । ଏହାକୁ ଶୁଣିବା ପରେ ତେଜ ପ୍ରତାପ ବୁଧବାର ନିଜ ସ୍ବରକୁ ନରମ କରିଛନ୍ତି ।
