ନୂଆଦିଲ୍ଲୀ: ଅଯୋଧ୍ୟା ମାମଲାର ରାୟ ପୂର୍ବରୁ ଏ ମାମଲାର ଶୁଣାଣି କରୁଥିବା ସୁପ୍ରିମକୋର୍ଟ 5 ଜଣ ବିଚାରପତିଙ୍କୁ ନେଇ ଗଠିତ ଖଣ୍ଡପୀଠଙ୍କ ସୁରକ୍ଷା ବ୍ୟବସ୍ଥାକୁ ବଢାଇ ଦିଆଯାଇଛି । ପରିସ୍ଥିତିକୁ ଦୃଷ୍ଟିରେ ରଖି ମୁଖ୍ୟ ବିଚାରପତି ଜଷ୍ଟିସ ରଞ୍ଜନ ଗୋଗୋଇଙ୍କୁ ଜେଡ ପ୍ଲସ ସୁରକ୍ଷା ପ୍ରଦାନ କରାଯାଇଛି ।
ଏହାସହ ଅନ୍ୟ 4 ଜଣ ବିଚାରପତିଙ୍କ ବାସଭବନ, ସୁପ୍ରିମକୋର୍ଟ ପରିସର ଏବଂ ଏହାର ଆଖପାଖ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ ସୃଦୃଢ କରାଯାଇଛି। ଦେଶର ସର୍ବୋଚ୍ଚ ନ୍ୟାୟଳୟର ସୁରକ୍ଷା ଦାୟିତ୍ବ ଦିଲ୍ଲୀ ପୋଲିସର ଅଧିନସ୍ଥ। ସୁପ୍ରିମ କୋର୍ଟକୁ ଯିବାକୁ ଥିବା ସମସ୍ତ ରାସ୍ତା ଉପରେ ତୀକ୍ଷ୍ଣ ନଜର ରଖାଯାଇଛି । ନୂଆଦିଲ୍ଲୀର ତିଲକ ମାର୍ଗ, ମଥୁରା ରୋଡ, ମହାଦେବ ରୋଡ ଓ ଇଣ୍ଡିଆ ଗେଟ୍ ଅଞ୍ଚଳରେ ସୁରକ୍ଷା ଦିଲ୍ଲୀ ପୋଲିସ ହସ୍ତରେ ନ୍ୟସ୍ତ ।
ସୁପ୍ରିମକୋର୍ଟ ସମେତ ଜାତୀୟ ରାଜଧାନୀ ଦିଲ୍ଲୀର ଅନେକ ଅଞ୍ଚଳରେ ପେଟ୍ରୋଲିଂ ଆରମ୍ଭ ହୋଇଛି । ସଦିଗ୍ଧ ଲୋକଙ୍କ ଉପରେ ନଜର ରଖାଯାଇଛି । ସୁରକ୍ଷାକୁ ଦୃଷ୍ଟିରେ ରଖି ନୂଆଦିଲ୍ଲୀରେ ଅଧିକ ଫୋର୍ସ ମୁତୟନ ହୋଇଛି ।
