ଅଯୋଧ୍ୟା: ଆସନ୍ତାକାଲି ଅଯୋଧ୍ୟାରେ ଭୂମିପୂଜନ ପରେ ଭଗବାନ ରାମଙ୍କ ଭବ୍ୟ ମନ୍ଦିର ନିର୍ମାଣ ଆରମ୍ଭ ହୋଇଯିବ । ତେବେ ଭୂମି ପୂଜନ ମହୋତ୍ସବରେ ସାମିଲ ହେଉଥିବା ସମସ୍ତ ଅତିଥିଙ୍କୁ ମନ୍ଦିର ଟ୍ରଷ୍ଟ ପକ୍ଷରୁ ସମ୍ମାନିତ କରାଯିବ । ଟ୍ରଷ୍ଟ ପକ୍ଷରୁ ଏଥିପାଇଁ ଏକ ସ୍ବତନ୍ତ୍ର ଯୋଜନା ପ୍ରସ୍ତୁତ ହୋଇଛି । ସମସ୍ତଙ୍କୁ ଏକ ଉପହାର ଦେଇ ସମ୍ମାନ କରାଯିବ । କାରଣ ପ୍ରଭୁ ରାମଙ୍କ ଦରବାରକୁ ଯେକେହି ଆସୁଥିଲେ ମଧ୍ୟ କେହି ଖାଲି ହାତରେ ଫେରନ୍ତି ନାହିଁ । ସେହି ତ୍ରେତୟା ଯୁଗର ପ୍ରଥାକୁ ପ୍ରଚଳିତ କରିବା ପାଇଁ ଟ୍ରଷ୍ଟ ଉଦ୍ୟମ ଆରମ୍ଭ କରିଛି ।
ଭୂମି ପୂଜନରେ ମୁଖ୍ୟ ଅତିଥି ହେଉଥିବା ପ୍ରଧାନମନ୍ତ୍ରୀଙ୍କୁ ଅଷ୍ଟଧାତୁରେ ନିର୍ମିତ ଏକ ସ୍ବତନ୍ତ୍ର ଭଗବାନ ରାମଙ୍କ ପ୍ରତିମୂର୍ତ୍ତି ଉପହାର ଦିଆଯିବ । ଏହି ଅଷ୍ଟଧାତୁ ମୂର୍ତ୍ତିକୁ ଟ୍ରଷ୍ଟ ଅଧ୍ୟକ୍ଷ ମହନ୍ତ ନୃତ୍ୟ ଗୋପାଳ ଦାସ ମହାରାଜ ପ୍ରଧାନମନ୍ତ୍ରୀଙ୍କୁ ପ୍ରଦାନ କରିବେ । ଏହି ମୂର୍ତ୍ତି ଉତ୍ତର ପ୍ରଦେଶର ଆଲିଗଡ ଠାରେ ନିର୍ମାଣ କରାଯାଇଛି ।
ସେହିପରି ଅନ୍ୟ ଅତିଥିଙ୍କୁ ଟ୍ରଷ୍ଟ ପକ୍ଷରୁ ଚାନ୍ଦିରେ ନିର୍ମିତ ଏକ ସ୍ବତନ୍ତ୍ର ମୁଦ୍ରା ଦିଆଯିବ । ଯେଉଁ ମୁଦ୍ରାର ଗୋଟିଏ ପାର୍ଶ୍ବରେ ଭଗବାନ ରାମ ମାତା ସୀତା ଅନୁଜ ଲକ୍ଷ୍ମଣ ଓ ପରମ ଭକ୍ତ ପବନ ପୁତ୍ର ହନୁମାନଙ୍କ ପ୍ରତିଛବି ରହିଛି । ସେହିପରି ଅନ୍ୟ ଏକ ପାର୍ଶ୍ବରେ ଟ୍ରଷ୍ଟର ଲୋଗୋ ରହିଛି ।
ସେହିଭଳି ଅତିଥିଙ୍କୁ ଲଡ୍ଡୁ ଡବା ସହ ରାମ ଦରବାର ଏକ ଫଟୋ ଚିତ୍ର ମଧ୍ୟ ପ୍ରସାଦ ରୂପେ ଦିଆଯିବ । ଏଥିପାଇଁ ସମସ୍ତ ପ୍ରସ୍ତୁତି ଶେଷ କରିଛି ଟ୍ରଷ୍ଟ ।
ବ୍ୟୁରୋ ରିପୋର୍ଟ, ଇଟିଭ ଭାରତ
