ବେଙ୍ଗାଲୁରୁ: ପୁଣି ଥରେ ବେଙ୍ଗାଲୁରୁରେ ଶୁଭିଲା ଦେଶ ବିରୋଧୀ ନାରା । ‘କାଶ୍ମୀର ମୁକ୍ତି’ ପ୍ଲାକାର୍ଡ ପ୍ରଦର୍ଶନ ଓ ସ୍ଲୋଗାନ ଦେଇ ଗିରଫ ହେଲେ ଯୁବତୀ ।
ସୂଚନା ଯେ ଶୁକ୍ରବାର ବେଙ୍ଗାଲୁରୁର ଟାଉନ ହଲରେ ହିନ୍ଦୁ ଜାଗରଣ ବୈଦିକ ପକ୍ଷରୁ ଗତକାଲି ପାକିସ୍ତାନ ଜିନ୍ଦାବାଦ ନାରା ଦେଇଥିବା ଯୁବତୀ ଅମୂଲ୍ୟ ଲିୟୋନାଙ୍କ ଗିରଫ ପ୍ରତିବାଦରେ ଏକ ପ୍ରଦର୍ଶନ କରାଯାଇଥିଲା । ପ୍ରଦର୍ଶନକାରୀଙ୍କ ଭିତରେ ଜଣେ ଯୁବତୀ ହାତରେ କନ୍ନଡ ଭାଷାରେ ‘ଦଳିତ ମୁକ୍ତି୍’, ‘କାଶ୍ମୀର ମୁକ୍ତି’ ଓ ‘ମୁସଲିମ ମୁକ୍ତି’, ଲେଖାଥିବା ପ୍ଲାକାର୍ଡ ପ୍ରଦର୍ଶିତ କରିଥିଲେ ।
ଏହାପରେ ଉପସ୍ଥିତ ଲୋକ ଯୁବତୀଙ୍କୁ ଘେରି ଯାଇଥିଲେ, କୌଣସି ଅଘଟଣ ଘଟିବା ପୂର୍ବରୁ ବେଙ୍ଗାଲୁରୁ ପୋଲିସ ଯୁବତୀଙ୍କୁ ଭିଡରୁ ଉଦ୍ଧାର କରିବା ସହ ହେପାଜତକୁ ନେଇଥିଲେ । ଏହି ଘଟଣା ପରେ ବେଙ୍ଗାଲୁରୁ ପୋଲିସ କମିଶନର ଭାସ୍କର ରାଓ ଯୁବତୀ ଜଣଙ୍କର ପରିଚୟ ଠାରୁ ଆରମ୍ଭ କରି ଏହା ପଛରେ କାହାର ହାତ ରହିଛି ସେ ନେଇ ଅଧିକ ତଦନ୍ତ ଆରମ୍ଭ ହୋଇଥିବା କହିଛନ୍ତି ।
ଏଠାରେ ସୂଚନା ଯୋଗ୍ୟ ଯେ ବେଙ୍ଗାଲୁରୁରେ ଗୁରୁବାର ନାଗରିକତା ସଂଶୋଧନ ଆଇନ ବିରୋଧୀ ରାଲିରେ ପାକିସ୍ତାନ ଜିନ୍ଦାବାଦର ନାରା ଦେଇଥିବା ଯୁବତୀ ଅମୂଲ୍ୟ ଲିୟୋନାକୁ 14 ଦିନ ପାଇଁ ନ୍ୟାୟିକ ହେପାଜତକୁ ପଠାଇ ଦିଆଯାଇଛି । ଏଆଇଏମଆଇଏମର ସୁପ୍ରିମୋ ଅସାଦୁଦ୍ଦିନ ଓୱେସୀଙ୍କ ନେତୃତ୍ବରେ ଆୟୋଜିତ ହୋଇଥିବା ସିଏଏ ବିରୋଧି ରାଲି ମଞ୍ଚରେ ପାକିସ୍ତାନକୁ ସମର୍ଥନ କରି ନାରା ଲଗାଇଥିଲେ ଏହି ଯୁବତୀ ।
