ଶ୍ରୀନଗର: ଆରମ୍ଭ ହୋଇଯାଇଛି ଚଳିତବର୍ଷର ପ୍ରଥମ ଅମରନାଥ ଯାତ୍ରା । ରବିବାର ସନ୍ଧ୍ୟା ସୁଦ୍ଧା ବାଲତାଲ ଓ ପାହାଲଗାମରେ ପ୍ରଥମ ଅମରନାଥମ ଯାତ୍ରୀ ପହଞ୍ଚି ସାରିଛନ୍ତି । ଯାତ୍ରୀମାନଙ୍କ ପାଇଁ ପ୍ରଶାସନ ତରଫରୁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଏହାପରେ ଯାତ୍ରୀମାନେ ଦକ୍ଷିଣ କାଶ୍ମୀରରେ ଥିବା ପବିତ୍ର ମନ୍ଦିରରୁ ସୋମବାରଠୁ ପୁଣି ପଦଯାତ୍ରା ଆରମ୍ଭ କରିବେ ବୋଲି ସୂଚନା ମିଳିଛି ।
ଖବର ଅନୁଯାୟୀ, 46 ଦିନ ଧରି ଆରମ୍ଭ ହୋଇଥିବା ଏହି ଯାତ୍ରାକୁ ରବିବାର ସକାଳ ସମୟରେ ଜମ୍ମୁକାଶ୍ମୀର ରାଜ୍ୟପାଳ କେ. କେ ଶର୍ମା ଉଦଘାଟନ କରିଛନ୍ତି । ପ୍ରଥମ ଥର ପାଇଁ ଯାତ୍ରୀ ନିବାସ କ୍ୟାମ୍ପରୁ 93 ଟି ଗାଡି ବାହାରି 2,234 ଜଣ ଯାତ୍ରୀଙ୍କୁ ନେଇ ଯାତ୍ରା ଆରମ୍ଭ କରିଛି ।
ସେହିପରି ଶ୍ରୀନଗର ଗସ୍ତ ସମୟରେ ଅମରନାଥ ଯାତ୍ରାରେ କୌଣସି ଦୁର୍ଘଟଣାକୁ ଏଡାଇବା ପାଇଁ ଅମିତ ଶାହା ସୁରକ୍ଷା ବାହିନୀକୁ ନିର୍ଦ୍ଦେଶ ଦେଇଥିଲେ । ତେବେ ଚଳିତ ବର୍ଷ ଅମରନାଥ ଯାତ୍ରା ଅଗଷ୍ଟ 15ରେ ଶେଷ ହେବ ।
ସୁରକ୍ଷା ବ୍ୟବସ୍ଥାକୁ ଦୃଷ୍ଟିରେ ରଖି ଜମ୍ମୁ ଓ ଶ୍ରୀନଗର ଜାତୀୟ ରାଜପଥରେ ସିଆରପିଏଫ ଯବାନଙ୍କ ସହ ଏସୟୁଭି ଏସକର୍ଟମାନଙ୍କୁ ନିୟୋଜିତ କରାଯାଇଛି । ଏହାସହ ପ୍ରଥମ ବ୍ୟାଚ ସୁରକ୍ଷିତ ଭାବେ କାଶ୍ମୀରରେ ପହଞ୍ଚିଥିବା ଡିଜିପି ଦିଲବାଘ ସିଂ କହିଛନ୍ତି ।