ନୂଆଦିଲ୍ଲୀ: ସାରା ଦେଶରେ କୋରୋନା ବିତ୍ପାତ ଜାରି ରହିଥିବା ବେଳେ ଅଣଦେଖା ହୋଇ ରହିଯାଇଛି ଅନେକ ରୋଗ । ଯେଉଁଥିରୁ ଗୋଟିଏ ହେଉଛି ଟ୍ୟୁବରକ୍ୟୁଲୋସିସ ବା ଟିବି । ବର୍ତ୍ତମାନ କୋରୋନାର ଚିକିତ୍ସାକୁ ଗୁରୁତ୍ବ ଦିଆଯାଉଥିବା ବେଳେ ଟିବିକୁ ଅଣଦେଖା ନକରି ଏହି ରୋଗୀଙ୍କ ତୁରନ୍ତ ଏକ ମାସର ଔଷଧ ଯୋଗାଇବାକୁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ । ଏନେଇ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡିକୁ ଶୁକ୍ରବାର ନିର୍ଦ୍ଦେଶ ଜାରି କରାଯାଇଛି ।
ଜାରି ହୋଇଥିବା ନିର୍ଦ୍ଦେଶ ଅନୁଯାୟୀ ପୂର୍ବରୁ ଚିକିତ୍ସାଧୀନ ଟିବି ରୋଗୀ ବା ବର୍ତ୍ତମାନ ସମୟରେ ଚିହ୍ନଟ ହୋଇଥିବା ରୋଗୀମାନଙ୍କୁ ଆଗାମୀ ମାସେ ପର୍ଯ୍ୟନ୍ତ ସମସ୍ତ ଜରୁରୀ ଔଷଧ ଯୋଗାଇ ଦିଆଯିବ । ନିକଟସ୍ଥ ସ୍ବାସ୍ଥ୍ୟକେନ୍ଦ୍ରରେ ସେମାନଙ୍କୁ ଔଷଧ ଯୋଗାଇବାର ବ୍ୟବସ୍ଥା କରାଯିବ । ଏଥିସହ ବିନା ଆଇଡି କାର୍ଡରେ ମଧ୍ୟ ରୋଗୀମାନଙ୍କୁ ଔଷଧ ଦିଆଯାଇପାରିବ ବୋଲି ଶୁକ୍ରବାର ଘୋଷଣା କରାଯାଇଛି ।
ତେବେ ସାରା ଦେଶରେ ଥିବା ଟିବି ରୋଗୀମାନଙ୍କୁ ବର୍ତ୍ତମାନ ସମୟରେ ନ୍ୟାସନାୟ ଟିବି ଏଲିମିନେସନ ପ୍ରୋଗ୍ରାମ (ଏନଟିଇପି) ଦ୍ବାରା ଜାରି ଗାଇଡଲାଇନ ଅନୁସରଣ କରିବାକୁ କୁହାଯାଇଛି । ବର୍ତ୍ତମାନର ଲକଡାଉନ ପରିସ୍ଥିତିରେ ଦେଶର ଅନ୍ୟ ଜରୁରୀ ସେବା ଯୋଗାଇବା ପାଇଁ ସରକାର ଏପରି ପଦକ୍ଷେପ ନେଇଥିବା କୁହାଯାଇଛି । ଟିବି ରୋଗୀଙ୍କ ଔଷଧ ସହଜରେ ଉପଲବ୍ଧ ହେଉ ନଥିବାରୁ ଆଗାମୀ ମାସେ ପର୍ଯ୍ୟନ୍ତ ଆବଶ୍ୟକୀୟ ଔଷଧ ସେମାନଙ୍କ ପାଖରେ ପହଞ୍ଚାଇବା ପାଇଁ ନିର୍ଦ୍ଦେଶ ଦିଆଯାଇଛି । ଏଥିସହ ଅଧିକ ସାହାଯ୍ୟ ପାଇଁ ଟୋଲ ଫ୍ରି ନମ୍ବର (1800-11-6666) ମଧ୍ୟ ଜାରି କରାଯାଇଛି ।
