ଧାନବାଦ: CIMFR ଅର୍ଥାତ କେନ୍ଦ୍ରୀୟ ଖଣି ଏବଂ ଇନ୍ଧନ ଅନୁସନ୍ଧାନ ସଂସ୍ଥାନର ବୈଜ୍ଞାନିକ ଏବେ ନୀଳହରିତ ଶୈବାଳରୁ ଫୁଡ ପ୍ରଡକ୍ଟ ଉତ୍ପାଦନ କରିବାକୁ କରୁଛନ୍ତି ପ୍ରୟାସ । ସାଧାରଣତଃ ଶୈବାଳ ବା ଶିଉଳି ସବୁ ପୋଖରୀ, ଜଳାଶୟ ଓ ନଦୀମାନଙ୍କରେ ଦେଖିବାକୁ ମିଳନ୍ତି । ଏହା ଏକ ଉଦ୍ଭିଦ ଯାହାର ମୂଳ, ଡାଳ ଏବଂ ପତ୍ରରେ ବିଭକ୍ତ ହୋଇନଥାଏ । କେତେକ କିସମର ଶୈବାଳ କ୍ଷତିକାରକ ହୋଇଥିବାବେଳେ କିଛି କୁ ଖାଦ୍ୟ, ଔଷଧ ଏବଂ ଚାଷରେ ବ୍ୟବହାର କରାଯାଇପାରେ ।
ଶୈବାଳରେ ପ୍ରୋଟିନ , କାର୍ବହାଇଡ୍ରେଟ ଓ ଭିଟାମିନ ସମେତ ଅନେକ ପୋଷକ ତତ୍ବ ରହିଥାଏ । ଏହାକୁ ବ୍ୟବହାର କରି ଧାନବାଦର ଝରିଆ ଅଞ୍ଚଳର ଡିଗବାହିଡ ସ୍ଥିତ CIMFRର ବୈଜ୍ଞାନିକ ଅନେକ ଫୁଡ ପ୍ରଡକ୍ଟ କରୁଛନ୍ତି । ଆଉ ଏହି ପ୍ରୋଜେକ୍ଟ 2 ବର୍ଷ ମଧ୍ୟରେ ସାରିବାକୁ ଲକ୍ଷ୍ୟ ରହିଛି ।
ଏଥିପାଇଁ ବୈଜ୍ଞାନିକ ଶୈବାଳରୁ ଏଭଳି ପଦାର୍ଥକୁ ଅଲଗା କରୁଛନ୍ତି , ଯାହା ମାନବ ଶରୀରକୁ ହାନୀ ପହଞ୍ଚାଇପାରେ । ଏହା ପରେ ଏଥିରୁ ପୁଷ୍ଟିକର ଉପାଦାନ ବାହାର କରି ଖାଦ୍ୟ ପଦାର୍ଥକୁ ପ୍ରସ୍ତୁତ କରାଯିବ । ଏହି ଖାଦ୍ୟ ପଦାର୍ଥ କ୍ୟାପସୁଲ୍ , ଟାବଲେଟ ବା ପାଉଡର ଆକାରରେ ପ୍ରସ୍ତୁତ କରାଯିବ । ଯେପରି ଏହା ଲୋକଙ୍କ ପାଖରେ ସହଜରେ ପହଞ୍ଚିପାରିବ ।
ଶୈବାଳରୁ ପ୍ରସ୍ତୁତ ଫୁଡ ପ୍ରଡକ୍ଟ ସମ୍ପୁର୍ଣ୍ଣ ଭାବେ ଶାକାହାରୀ ହେବ । ଏଥିସହ ଏହାର ଦାମ ମଧ୍ୟ କମ ରଖିବାକୁ ଚେଷ୍ଟା କରାଯିବ, ଯେପରି ଯେକୌଣସି ଗରିବ ଲୋକ ଏହାକୁ କିଣି ଖାଇବାକୁ ସକ୍ଷମ ହୋଇପାରିବ। ବୈଜ୍ଞାନିକଙ୍କ ଅନୁସାରେ କୁପୋଷଣକୁ ମଧ୍ୟ ଏହା ସହଜରେ କାବୁ କରିପାରିବ । ଶୈବାଳ ଉତ୍ପାଦକୁ ନେଇ କୃଷକଙ୍କୁ ପ୍ରଶିକ୍ଷଣ ଦିଆଯିବ । ଯାହା ଦ୍ବାରା ରୋଜଗାରର ସୁଯୋଗ ସୃ୍ଷ୍ଟି ହେବ ।
ବର୍ତ୍ତମାନ ଚୀନ, ଜାପାନ, ଇଣ୍ଡୋନେସିଆ ଏବଂ ଅଷ୍ଟ୍ରେଲିଆ ସମେତ ଅନେକ ଦେଶରେ ଶୈବାଳକୁ ଉପଯୋଗୀ ଖାଦ୍ୟ ପଦାର୍ଥ ଭାବେ ବ୍ୟବହାର କରାଯାଉଛି । ଆଜିର ବର୍ଦ୍ଧିତ ଜନସଂଖ୍ୟା ମଧ୍ୟରେ ଖାଦ୍ୟ ସମସ୍ୟାର ସମାଧାନ ପାଇଁ ଏଭଳି ପ୍ରୟାସ ଜରୁରୀ ରହିଛି। ଏହା ସଫଳ ହେଲେ ଆମ ଦୈନିକ ଖାଦ୍ୟ ପଦାର୍ଥରେ ସାମିଲ ହୋଇପାରିବ ଶୈବାଳ । ଯାହା ଦ୍ବାରା ଶରୀରକୁ ଶକ୍ତି ମିଳିବା ସହ ଖାଦ୍ୟ ସମସ୍ୟା ଦୂର ହେବ।
ବ୍ୟୁରୋ ରିପୋର୍ଟ, ଇଟିଭି ଭାରତ
