ରାୟପୁର: ଛତିଶଗଡର ପୂର୍ବତନ ମୁଖ୍ୟମନ୍ତ୍ରୀ ଅଜିତ ଯୋଗୀଙ୍କୁ ଲାଗିଛି ଝଟକା । ନିଜକୁ ଆଦିବାସୀ ବୋଲି ଦାବି କରୁଥିବା ଯୋଗୀ ନିରାଶ ହୋଇଛନ୍ତି । ଉଚ୍ଚ କ୍ଷମତା ସମ୍ପନ୍ନ ଜାତିଗତ ଯାଞ୍ଚ କମିଟି ଯୋଗୀଙ୍କ ଆବେଦନକୁ ଖାରଜ କରିଛନ୍ତି । ଏହାସହ ସେ ଆଦିବାସୀ ନୁହଁନ୍ତି ବୋଲି କମିଟି ନିଜ ରିପୋର୍ଟରେ ଦର୍ଶାଇଛି ।
ଏହି ନିଷ୍ପତ୍ତି ଯୋଗୀଙ୍କ ଲାଗି ସମସ୍ୟା ସୃଷ୍ଟି କରିପାରେ । କାରଣ ନିଜର ସମସ୍ତ ଜାତି ପ୍ରମାଣପତ୍ର ସେ ହରାଇପାରନ୍ତି । ଯେଉଁଥିରେ ସେ ନିଜେ ଆଦିବାସୀ ବୋଲି ପ୍ରମାଣ ଦେଇଥିଲେ । ଏହାସହ ଆଞ୍ଚଳିକ ଦଳ ଜନତା କଂଗ୍ରେସର ପ୍ରତିଷ୍ଠାତାଙ୍କୁ ରାଜନୀତିରେ ମଧ୍ୟ ସମସ୍ୟା ସାମନା କରିବାକୁ ପଡିପାରେ । ସମସ୍ତ ଅଭିଯୋଗ ଓ ପ୍ରମାଣ ଯାଞ୍ଚ ପରେ କମିଟି ଏହି ରାୟ ଦେଇଛନ୍ତି । ଫଳରେ ଯୋଗୀ ଆଦିବାସୀ ଭାବେ ପାଉଥିବା ସମସ୍ତ ସୁବିଧା ପାଇବାରୁ ଏବେ ବଞ୍ଚିତ ହେବେ ।
ପୂର୍ବରୁ ଯୋଗୀଙ୍କ ଜାତିଗତ ମାମଲାରେ ଯାଞ୍ଚ ଲାଗି ଛତିଶଗଡର ଭୂପେଶ ସରକାର ଏକ କମିଟି ଗଠନ କରିଥିଲେ । ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଡି ଡି ସିଂହଙ୍କ ଅଧ୍ୟକ୍ଷତାରେ ଏକ ଉଚ୍ଚ କ୍ଷମତା ସମ୍ପନ୍ନ ଯାଞ୍ଚ କମିଟି ଏହି ମାମଲାର ତଦନ୍ତ କରୁଥିଲା । 20 ଅଗଷ୍ଟରେ କମିଟି ଆଗରେ ହାଜର ହୋଇ ଯୋଗୀ ନିଜ ପକ୍ଷ ରଖିଥିଲେ । ଏହାପରେ ସମସ୍ତ ତଥ୍ୟ ଆଧାରରେ କମିଟି ଏହି ରାୟ ଶୁଣାଇଛନ୍ତି । ତେବେ ଅଜିତଙ୍କ ପୁଅ ଅମିତ ଯୋଗୀ ଏହା ସମ୍ପର୍କରେ ଏପର୍ଯ୍ୟନ୍ତ ଖବର ପାଇନଥିବା ସୂଚନା ଦେଇଛନ୍ତି ।
ତେବେ ଏହି ରାୟ ପରେ ଗତ ତିନି ଦଶନ୍ଧି ଧରି ଚାଲିଥିବା ମାମଲାରେ ଅନ୍ତ ଘଟିଛି ବୋଲି କୁହାଯାଉଛି । ସୂଚନାଯୋଗ୍ୟ ଯେ 1986 ମସିହା ପର୍ଯ୍ୟନ୍ତ ଏହି ପ୍ରସଙ୍ଗରେ କୌଣସି ବିବାଦ ନଥିଲା । ସେତେବେଳ ଯାଏଁ ଯୋଗୀ ସରକାରୀ ଚାକିରିଆ ଥିଲେ । ହେଲେ ସେ ପ୍ରଶାସନିକ ସେବାରୁ ଅବ୍ୟାହତି ନେଇ ରାଜନୀତିରେ ପାଦ ଦେବା କ୍ଷଣି ଏହି ପ୍ରସଙ୍ଗ ବିବାଦର ରୂପ ନେଇଥିଲା । କଂଗ୍ରେସ ଦଳ ପକ୍ଷରୁ ସେ ରାଜ୍ୟସଭାରେ ସାଂସଦ ହେବା ପରେ ତାଙ୍କ ଜାତି ସାର୍ଟିଫିକେଟ ଉପରେ ପ୍ରଶ୍ନ ଉଠିଥିଲା ।
