ଚେନ୍ନାଇ: 49 ତମ ପ୍ରତିଷ୍ଠା ଦିବସ ପାଳିଲା ଏଆଇଏଡିଏମକେ । ଶନିବାର ଦିନ ତାମିଲନାଡୁ ଉପମୁଖ୍ୟମନ୍ତ୍ରୀ ଓ. ପନିରସିଲଭମଙ୍କ ଉପସ୍ଥିତିରେ ଚେନ୍ନାଇ ପାର୍ଟି ଅଫିସରେ ଅଲ ଇଣ୍ଡିଆ ଆନ୍ନା ଦ୍ରାବିଡ ମୁନେତ୍ରା କାଝଗାମ (ଏଆଇଏଡିଏମକେ ) 49 ତମ ପ୍ରତିଷ୍ଠା ଦିବସ ପାଳନ କରିଛି।
ଏହି ଅବସରରେ ପାର୍ଟି ଅଫିସରେ ବିଭିନ୍ନ ଦଳର ନେତାମାନେ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମରେ ତାମିଲନାଡୁ ମନ୍ତ୍ରୀ ତଥା ଏଆଇଏଡିଏମକେ ନେତା ଡି ଜୟକୁମାର କହିଛନ୍ତି ଯେ, ‘2021 ବିଧାନସଭା ନିର୍ବାଚନରେ ଆମ ଦଳ ନିଶ୍ଚିତ ବିଜୟ ହାସଲ କରିବ । ଆଜି ଏଆଇଏଡିଏମକେର ପ୍ରତିଷ୍ଠା ଦିବସ ପାଳନ କରୁଛୁ। ଆସନ୍ତା ବର୍ଷ ଦଳ ପ୍ରତିଷ୍ଠାକୁ 50 ବର୍ଷ ହେବ । ତାମିଲନାଡୁରେ ଦୀର୍ଘ ବର୍ଷ ଧରି ଶାସନ କରିଆସୁଥିବା ଦଳ ଆସନ୍ତା ବର୍ଷ ମଧ୍ୟ କ୍ଷମତାରେ ରହିବ। କଂଗ୍ରେସ ଏବଂ ଡିଏମକେ ସମୟ ସମାପ୍ତ ହୋଇଛି’ ବୋଲି ସେ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି, ଏଆଇଏଡିଏମକେ ହେଉଛି ଏକ ଏପରି ସରକାର ଯିଏ ସାମାଜିକ ନ୍ୟାୟ ପାଇଁ ସର୍ବଦା ଲୋକମାନଙ୍କ ପାଇଁ ଛିଡା ହୋଇଛି । ଆମ ଦଳ ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ସ୍ୱପ୍ନ ପୂରଣ କରିବ।
