ନୂଆଦିଲ୍ଲୀ: ପୋଲିସ ହାତରେ ଦୀର୍ଘ 12 ବର୍ଷ ହେବ ୱାଣ୍ଟେଡ ଥିବା ଜୈସ-ଇ-ମହମ୍ମଦର ଆତଙ୍କବାଦୀ ଅବଦୁଲ ମଜୀଦ ବାବା । ତାକୁ ରିମାଣ୍ଡରେ ନେବ ଦିଲ୍ଲୀ ପୋଲିସ । ଏହି ଆତଙ୍କୀର ମୁଣ୍ଡ ପାଇଁ 2 ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା ହୋଇଥିଲା । ତାକୁ ଧରିବା ପାଇଁ 2007ରୁ ବହୁ ଉଦ୍ୟମ କରିଥିଲେ। ଶେଷରେ ମଜୀଦ ବାବାକୁ ଧରିବାରେ ସଫଳ ହୋଇଛି ପୋଲିସ ।
ଡିସିପି ସଞ୍ଜୀବ ଯାଦବଙ୍କ ସୂଚନା ମୁତାବକ, ଦୀର୍ଘ ସମୟ ଧରି ଏହି ଆତଙ୍କବାଦୀକୁ ଧରିବା ପାଇଁ ସ୍ପେଶାଲ ସେଲ୍ ଉଦ୍ୟମ ଚଳାଇଥିଲା । ଜମ୍ମୁ-କାଶ୍ମୀର ସୋପୋର ଜିଲ୍ଲାରେ ଅବଦୁଲ ମଜୀଦ ବାବାର ଘର । ସେ ଶ୍ରୀନଗରରେ ଥିବା ସୂଚନା ମିଳିଥିଲା। ଶେଷରେ ତାକୁ ଧରିବାରେ ସଫଳ ହୋଇଛି ପୋଲିସ ।
ତେବେ ଶ୍ରୀନଗର କୋର୍ଟରେ ତାକୁ ହାଜର ପରେ ରିମାଣ୍ଡରେ ନେବ ଦିଲ୍ଲୀ ପୋଲିସ । ଜୈସ-ଇ-ମହମ୍ମଦ ଉପରେ ଅବଦୁଲ ମଜୀଦ ବାବାଠୁ ବହୁ ତଥ୍ୟ ମିଳିବ ବୋଲି ଆଶା କରାଯାଉଛି ।
