ନୂଆଦିଲ୍ଲୀ: କୋରୋନା ସଂକ୍ରମଣ ଦିନକୁ ଦିନ ବଢିଚାଲିଥିବା ବେଳେ ଦେଶରେ ଅନେକ ଗର୍ଭବତୀ ମଧ୍ୟ ଏହାର ଶିକାର ହୋଇଥିବା ଦେଖାଯାଇଛି । ଦିଲ୍ଲୀ ଏମ୍ସରେ ଶୁକ୍ରବାର ସନ୍ଧ୍ୟାରେ ଏପରି ଜଣେ ମହିଳା ସଫଳତାର ସହ ପ୍ରସବ କରିଛନ୍ତି । ଯାହାଙ୍କ ଗର୍ଭରୁ ଜନ୍ମ ନେଇଛି ଏକ ସୁସ୍ଥ ପୁତ୍ର ସନ୍ତାନ । ଏନେଇ ଏମ୍ସ କର୍ତ୍ତୃପକ୍ଷ ସୂଚନା ଦେଇ କହିଛନ୍ତି କି ଉଭୟ ମା’ ଓ ପୁତ୍ର ସୁସ୍ଥ ଅଛନ୍ତି ଏବଂ ନବଜନ୍ମିତ ଶିଶୁ ଦେହରେ ବର୍ତ୍ତମାନ ସୁଦ୍ଧା କୋରୋନାର କୌଣସି ଲକ୍ଷଣ ଦେଖାଯାଇ ନାହିଁ ।
ତେବେ ଶିଶୁଟିର କୋଭିଡ-19 ପରୀକ୍ଷା କରାଯିବ କି ନାହିଁ ପ୍ରଶ୍ନର ଉତ୍ତର ଦେଇ ଏମ୍ସର ଅବଷ୍ଟେଷ୍ଟ୍ରିକ୍ସ ଓ ଗାଇନାକୋଲୋଜି ବିଭାବ ପ୍ରଫେସର ଡ଼ଃ ନୀରଜ ଭଟଲା କହିଛନ୍ତି କି ପ୍ରାରମ୍ଭିକ ସ୍ତରରେ ଶିଶୁଟିକୁ ଅବଜରଭେସନରେ ରଖାଯିବ । ଶିଶୁଟି ଦେହରେ କୋରୋନାର ଲକ୍ଷଣ ଅଛି କି ନାହିଁ, ତାହା ଅନୁଧ୍ୟାନ କରାଯିବ। ବର୍ତ୍ତମାନ ସୁଦ୍ଧା ଶିଶୁ ପୁତ୍ର ସମ୍ପୂର୍ଣ୍ଣ ସୁସ୍ଥ ରହିଛି ଏବଂ ନିର୍ଦ୍ଧାରିତ ସମୟର ସପ୍ତାହେ ପୂର୍ବରୁ ଜନ୍ମ ଗ୍ରହଣ କରିଛି ।
ସେପଟେ ଡାକ୍ତରଙ୍କ କହିବା ଅନୁଯାୟୀ ଜଣେ କୋରୋନା ପଜିଟିଭ ଗର୍ଭବତୀ ମହିଳାଙ୍କ ପ୍ରସବ ଘଟଣା ଦିଲ୍ଲୀରେ ପ୍ରଥମ । ମହିଳା ଜଣଙ୍କ ଦିଲ୍ଲୀ ଏମ୍ସର ଜଣେ ଫିସିଓଲୋଜିଷ୍ଟଙ୍କ ପତ୍ନୀ । ସମ୍ପୃକ୍ତ ଡାକ୍ତର ଜଣଙ୍କ କୋରୋନା ପଜିଟିଭି ଜଣା ପଡିବାର କିଛି ଦିନ ପରେ ତାଙ୍କ ପତ୍ନୀ ମଧ୍ୟ କୋରୋନା ପଜିଟିଭ ବୋଲି ଜଣା ପଡିଥିଲା । ସେତେବେଳକୁ ସେ 9 ମାସର ଗର୍ଭବତୀ ଥିଲେ ।
ତେବେ ଶୁକ୍ରବାର ତାଙ୍କର ପ୍ରସବ ପରେ ଶିଶୁ ପୁତ୍ର ସମ୍ପୂର୍ଣ୍ଣ ସୁସ୍ଥ ଥିବା ସହ ଏବେ ସେ ନିଜ ମା’ ସହିତ ହିଁ ରହିଛି । ସେପଟେ ବର୍ତ୍ତମାନ ସୁଦ୍ଧ ସ୍ତନ୍ୟପାନ ଦ୍ବାରା କୋରୋନା ସଂକ୍ରମଣର କୌଣସି ପ୍ରମାଣ ରହିନାହିଁ । ଏଥିସହ ସମ୍ପୃକ୍ତ ମହିଳା ଜଣଙ୍କ କୋରୋନା ପଜିଟିଭ ଚିହ୍ନଟ ହେବା ସତ୍ତ୍ବେ ବର୍ତ୍ତମାନ ତାଙ୍କ ପାଖରେ କୋରୋନାର କୌଣସି ଲକ୍ଷଣ ଦେଖାଯାଉନାହିଁ ।
ପ୍ରକାଶ ଯେ ସମ୍ପୃକ୍ତ ଗର୍ଭବତୀ ମହିଳା କୋରୋନା ପଜିଟିଭ ଜଣା ପଡିବା ପରେ ଏମ୍ସରେ ପଜିଟିଭ ଚିହ୍ନଟ ହୋଇଥିବା ଗର୍ଭବତୀ ମହିଳାଙ୍କ ପାଇଁ ଏକ ସ୍ବତନ୍ତ୍ର ୱାର୍ଡ ପ୍ରସ୍ତୁତ କରାଯାଇଛି । ଏଥିସହ ସେମାନଙ୍କ ପାଇଁ ସ୍ବତନ୍ତ୍ର ନିୟମ ମଧ୍ୟ ପ୍ରସ୍ତୁତ କରାଯାଇଛି । ଯେପରି ସ୍ତନ୍ୟପାନ କରିବା ପୂର୍ବରୁ ମାସ୍କ ବ୍ୟବହାର ସହ ହାତକୁ ଭଲ ଭାବେ ସଫା କରିବା । ସ୍ତନ୍ୟପାନ ପରେ ଶିଶୁର ମୁହଁକୁ ସଫା କରିବା ସହ ନିଜେ ମଧ୍ୟ ସଫାସୁତୁରା ରହିବା ଆବଶ୍ୟକ ।
ବ୍ୟୁରୋ ରିପୋର୍ଟ, ଇଟିଭି ଭାରତ
