ମୁମ୍ବାଇ: କୋଝିକୋଡ ବିମାନ ଦୁର୍ଘଟଣାରେ ୱିଙ୍ଗ କମାଣ୍ଡର ଦୀପକ ସାଥେଙ୍କ ସମେତ 19 ଜଣଙ୍କର ମୃତ୍ୟୁ ଘଟିଛି। ଏହି ଦୁର୍ଘଟଣାକୁ ନେଇ ସାରା ଦେଶରେ ଶୋକର ଛାୟା ଖେଳିଯାଇଛି । ତେବେ ଏଭଳି ସମୟରେ ଦୀପକ ସାଥେଙ୍କ କାର୍ଯ୍ୟ ପାଇଁ ଗର୍ବ ଅନୁଭବ କରିଛନ୍ତି ତାଙ୍କ ମା ନୀଲାବାଇ ସାଥେ । ସେ ଜଣେ ମହାନ ପୁତ୍ର ଥିଲେ ଏବଂ ଅନ୍ୟମାନଙ୍କୁ ସାହାଯ୍ୟ କରିବାରେ ସର୍ବଦା ପ୍ରଥମ ଥିଲେ । ସେ ଦେଶ ପାଇଁ ନିଜ ଜୀବନକୁ ଉତ୍ସର୍ଗ କରିଛନ୍ତି ବୋଲି ନୀଲାବାଇ କହିଛନ୍ତି ।
ୱିଙ୍ଗ କମାଣ୍ଡର ଦୀପକ ସାଥେଙ୍କ ବାପା ଭାରତୀୟ ସେନାର ଜଣେ ଅବସରପ୍ରାପ୍ତ କର୍ଣ୍ଣେଲ । ସାଥେଙ୍କ ବାପା ବସନ୍ତ ସାଥେ ଏବଂ ମା ନୀଲାବାଇ ଉଭୟ ନାଗପୁରରେ ରୁହନ୍ତି । ତେବେ ନିଜ ପୁଅକୁ ହରାଇବାର ଦୁଃଖ ଅଛି ସତ ହେଲେ ଦେଶ ପାଇଁ ସେ ନିଜ ଜୀବନ ଉତ୍ସର୍ଗୀକୃତ କରିଥିବାରୁ ଗର୍ବ ଅନୁଭବ କରିଛନ୍ତି ନୀଲାବାଇ ।
ଏନେଇ ନୀଲାବାଇ କହିଛନ୍ତି, ସେ ଜଣେ ମହାନ ପୁତ୍ର ଥିଲେ । ସେ ସର୍ବଦା ଅନ୍ୟମାନଙ୍କୁ ସାହାଯ୍ୟ କରିବାରେ ପ୍ରଥମ ଥିଲେ। ତାଙ୍କ ଶିକ୍ଷକମାନେ ତାଙ୍କୁ ଖୁବ ପ୍ରଶଂସା କରନ୍ତି। ଅହମ୍ମଦାବାଦ ବନ୍ୟା ସମୟରେ ସେ ସୈନିକଙ୍କ ପିଲାମାନଙ୍କୁ ଉଦ୍ଧାର କରିଥିଲେ । ଆମ ଉଭୟ ପିଲା ଦେଶ ପାଇଁ ନିଜ ଜୀବନକୁ ଉତ୍ସର୍ଗ କରିଛନ୍ତି ବୋଲି ସେ କହିଛନ୍ତି ।
ତେବେ ଦୀପକ ସାଥେଙ୍କ ବଡ ଭାଇ ବିକାଶ ସେନାରେ ଥିଲେ ଏବଂ 22 ବର୍ଷ ବୟସରେ ସେ ଏକ ଦୁର୍ଘଟଣାରେ ଶହୀଦ ହୋଇଥିଲେ। ତେବେ ଦୀପକ ମଧ୍ୟ ଭାରତୀୟ ବାୟୁସେନାରେ କାର୍ଯ୍ୟ କରିଥିଲେ । ଅବସର ନେବା ପରେ ସେ ଏୟାର ଇଣ୍ଡିଆରେ ପାଇଲଟ୍ ଭାବରେ କାର୍ଯ୍ୟ କରୁଥିଲେ। ଶୁକ୍ରବାର ବିମାନ ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଛି।
ସେପଟେ ଆଜି ଦୀପକ ସାଥେଙ୍କ ମା ନୀଲାବାଇଙ୍କର 83 ତମ ଜନ୍ମଦିନ । ପୁଅକୁ ହରାଇବାର ଦୁଃଖ ଆଗରେ କୁଆଡେ ହଜିଯାଇଛି ଜନ୍ମଦିନର ଆନନ୍ଦ ।
ବ୍ୟୁରୋ ରିପୋର୍ଟ, ଇଟିଭି ଭାରତ
