ଶ୍ରୀନଗର: କୁନି ବୟସରେ ମହାନ ଚିନ୍ତାଧାରା । ମାତ୍ର 7 ବର୍ଷ ବୟସରେ କିଛି କରି ଦେଖାଇବାର ରହିଛି ଜୋସ୍ ଜୁନୁନ । ବୟସରେ ସିନା ସାନ ହେଲେ ଅନ୍ୟମାନଙ୍କ ପାଇଁ ସାଜିଛନ୍ତି ପ୍ରେରଣର ଉତ୍ସ । ଯାହାକୁ ବଡବଡ ଲୋକ ବି କରିବାକୁ ପଛଘୁଞ୍ଚା ଦେଉଛନ୍ତି ଆଜି ସେ କୁନି ବୟସରେ ବି ତାକୁ କରି ଦେଖାଇଛନ୍ତି ।
ଦୃଢ ଇଚ୍ଛାଶକ୍ତି ଥିଲେ ସବୁ କାମକୁ ସମ୍ଭବ କରିହୁଏ । ଆଉ ଏହାର ନିଚ୍ଛକ ଉଦାହରଣ ପାଲଟିଛନ୍ତି ଶ୍ରୀନଗରର 7 ବର୍ଷୀୟା ଜନ୍ନତ । ଜମ୍ମୁ ଓ କାଶ୍ମୀରକୁ କୁହାଯାଏ ଦେଶର ଭୂସ୍ବର୍ଗ ବା ଜନ୍ନତ । ଆଉ ଏହି ଭୂସ୍ବର୍ଗରେ ରହିଛି ଡାଲ ହ୍ରଦ, ଯାହାକି ଏଠାକୁ ଆସୁଥିବା ପର୍ଯ୍ୟଟକଙ୍କ ପାଇଁ ପାଲଟିଥାଏ ଆକର୍ଷଣର କେନ୍ଦ୍ରବିନ୍ଦୁ । ହେଲେ ଏହି ହ୍ରଦରେ ଥିବା ଅଳିଆ ଆବର୍ଜନାକୁ ପରିଷ୍କାର କରିବା ପାଇଁ ଅଣ୍ଟା ଭିଡିଛନ୍ତି ଜନ୍ନତ । ଦୀର୍ଘ 2 ବର୍ଷ ହେଲା ସେ ଏହି ହ୍ରଦକୁ ସଫା କରିଆସୁଛନ୍ତି । ଜନ୍ନତଙ୍କ ଏହି ମହାନ କାର୍ଯ୍ୟ ତାଙ୍କୁ ଆଜି ପାଠ୍ୟ ପୁସ୍ତକରେ ସ୍ଥାନ ଦେଇପାରିଛି । ଆଉ ଏଥିପାଇଁ ସେ ନିଜ ବାପାଙ୍କୁ ଦେଇଛନ୍ତି ଏହାର ଶ୍ରେୟ ।
ତେବେ ଜନ୍ନତ ଏହି କାର୍ଯ୍ୟକୁ ପ୍ରଂଶସା କରି ହାଇଦ୍ରାବଦର ଏକ ଘରୋଇ ସ୍କୁଲ ନିଜ ପାଠ୍ୟକ୍ରମରେ ଜନ୍ନତଙ୍କ କାମକୁ ସ୍ଥାନ ଦେଇଛି । ପରିବେଶକୁ ପରିଷ୍କାର କରିବା ପାଇଁ ସବୁଠି ସ୍ବଚ୍ଛ ଭାରତର ଅଭିଯାନ ଚାଲିଥିବାବେଳେ ଜନ୍ନତଙ୍କ ଏହି ମହାନ କାାର୍ଯ୍ୟ ସମସ୍ତଙ୍କ ପାଇଁ ଉଦାହରଣ ପାଲଟିଛି ।
@ANI
