କୋଲକାତା: ସବୁ ପ୍ରତୀକ୍ଷାର ଅନ୍ତଘଟାଇ ଆସିଯାଇଛି 2019 ଲୋକସଭା ନିର୍ବାଚନର ଫଳାଫଳ। ଅନେକ ରାଜ୍ୟରେ ଦେଖିବାକୁ ମିଳିଛି ରାଜନୈତିକ ପରିବର୍ତ୍ତନ। ଚଳିତ ବର୍ଷ ଅନୁଷ୍ଠିତ ହୋଇଥିବା ସପ୍ତଦଶ ଲୋକସଭା ମହାସମର ବଦଳାଇଛି ଦେଇଛି ଦେଶର ଅନେକ ଅଞ୍ଚଳର ରାଜନୈତିକ ଦୃଶ୍ୟପଟ୍ଟ। ଏଥିରୁ ବାଦ ପଡିନାହିଁ ରାଜନୈତିକ ଦୃଷ୍ଟିକୋଣରୁ ଅନେକ ଗୁରୁତ୍ବ ବହନ କରୁଥିବା ରାଜ୍ୟ ପଶ୍ଚିମବଙ୍ଗ।
ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ଏଥର ପଶ୍ଚିମବଙ୍ଗରେ ଦେଖିବାକୁ ମିଳିଛି ଅଦ୍ଭୂତପୂର୍ବ ନିର୍ବାଚନୀ ଫଳାଫଳ। ପ୍ରଥମ ଥର ପାଇଁ ଏଠାକାର ଲୋକସଭା ନିର୍ବାଚନରେ ବିପୁଳ ସଫଳତା ହାସଲ କରିଛି ଗୈରିକ ଦଳ ବିଜେପି। ସ୍ଥିତି ଏପରି ହୋଇଛି ଯେ ବିଜେପିର ନିର୍ବାଚନୀ ରଣନୀତି ଆଗରେ ଚିତପଟାଙ୍ଗ ମାରିଛି ବିରୋଧିଙ୍କ ଶକ୍ତି। ରାଜ୍ୟର ମୋଟ 42ଟି ଲୋକସଭା ଆସନରୁ ଦଳ ଏକତୃତୀୟାଂଶରୁ ଅଧିକ ଆସନ ହାତେଇ ନେଇଛି।
ଅନ୍ୟପଟେ ଉଣାଅଧିକେ ଏହି ନିର୍ବାଚନରେ ଝଟକା ଖାଇଛନ୍ତି ଅନ୍ୟ ଦଳ। ଏଥର ଶାସକ ତୃଣମୂଳ କଂଗ୍ରେସକୁ (ଟିଏମସି) 22ଟି, ବିଜେପି 18 ଏବଂ 2ଟି ଆସନ କଂଗ୍ରେସ ଖାତାକୁ ଯାଇଛି । ଚଳିତ ଥର ସମ୍ପୂର୍ଣ୍ଣ ଭାବେ ମୂଳପୋଛ ହୋଇଯାଇଛି ଦୀର୍ଘ 34 ବର୍ଷ ଧରି ଏଠାକାର ଶାସନ ଗାଦି ଭୋଗ କରିଥିବା ବାମଦଳ । 2019 ନିର୍ବାଚନରେ ପଶ୍ଚିମବଙ୍ଗରେ ଗୋଟିଏ ହେଲେ ମଧ୍ୟ ଆସନ ପାଇବାରେ ସକ୍ଷମ ହୋଇନାହାନ୍ତି ବାମପନ୍ଥୀ । ଯାହା ଦଳର ଅସ୍ଥିତ୍ବ ଏବଂ ସ୍ଥାୟୀତ୍ବ ଉପରେ ପ୍ରଶ୍ନବାଚୀ ସୃଷ୍ଟି କରିଛି।
2019 ନିର୍ବାଚନ ବଦଳାଇ ଦେଲା କି ବଙ୍ଗର ରାଜନୈତିକ ରଙ୍ଗ?
2014 ନିର୍ବାଚନ ତୁଳନାରେ 2019ରେ ପଶ୍ଚିମବଙ୍ଗରେ ରାଜନୈତିକ ଦୃଷ୍ଟିକୋଣରୁ ଦେଖିବାକୁ ମିଳିଛି ଅନେକ ପରିବର୍ତ୍ତନ । ବଦଳିଯାଇଛି ଅନେକ ଦଳର ସ୍ଥିତି । ଏକଦା ଜାତୀୟ ରାଜନୀତିକୁ ପ୍ରତ୍ୟେକ୍ଷ କିମ୍ବା ପରୋକ୍ଷ ଭାବେ ନିୟନ୍ତ୍ରଣ କରୁଥିବା ବାମଦଳ ଏଥର ସମ୍ପୂର୍ଣ୍ଣ ଭାବେ ମୂଳପୋଛ ହୋଇଯାଇଛି । ଗତ ଲୋକସଭା ତୁଳନାରେ ଅନେକ ଆସନ ଆସନ ହରାଇ ଦଳୀୟ ବିପର୍ଯ୍ୟୟକୁ ସାମ୍ନାକୁ କରିଛି ଟିଏମସି। ଅନ୍ୟତମ ଦଳ କଂଗ୍ରେସର ସ୍ଥିତି ଏଠାରେ ଯଥା ପୂର୍ବଂ ତଥା ପରଂ ରହିଛି । ଅନେକ ଆସନରେ ବାମଦଳ ସହ ମେଣ୍ଟ ବୁଝାମଣା କରିବା ପରେ ମଧ୍ୟ କୌଣସି ସଫଳତା ମିଳିନାହିଁ ।
2021 ବିଧାନସଭା ନିର୍ବାଚନ ପୂର୍ବରୁ କଣ ହେବେ ଏହି ତିନି ଦଳର ସ୍ଥିତି
ବାମଦଳ: ପଶ୍ଚିମବଙ୍ଗକୁ ନିଜର ପାରମ୍ପରିକ ଗଡ ଭାବେ ଗଢିତୋଳିଥିଲେ ବାମପନ୍ଥୀ । ଦିନ ଥିଲା ଏଠାରେ ଲାଲ ସଲାମ ଭଳି ସ୍ଲୋଗାନ ଶୁଣିବାକୁ ମିଳୁଥିଲା । 1977 ମସିହାରୁ 2011 ମସିହା ପର୍ଯ୍ୟନ୍ତ ଦୀର୍ଘ 34 ବର୍ଷ ପଶ୍ଚିମବଙ୍ଗରେ କ୍ଷମତାସୀନ ଥିଲା ବାମଦଳ। ମାତ୍ର ଟିଏମସିର ଶକ୍ତି ବଢିବା ପରେ ଗାଦିଚ୍ୟୁତ ହୋଇଯାଇଥିଲା ବାମପନ୍ଥୀଙ୍କ ନେତୃତ୍ବାଧିନ ସରକାର । 2011 ବିଧାନସଭା ନିର୍ବାଚନରେ ଟିଏମସି କ୍ଷମତାକୁ ଫେରିବା ସହ ଧିରେ ଧିରେ ପଶ୍ଚିମବଙ୍ଗର ରାଜନୈତିକ ଦୃଶ୍ୟପଟରୁ ଗାଏବ ହେବାରେ ଲାଗିଛି ବାମଦଳର ସ୍ଥିତି । 2016 ବିଧାନସଭା ନିର୍ବାଚନରେ ପୁନର୍ବାର ଟିଏମସି କ୍ଷମତାକୁ ଫେରିବା ସହ ରାଜ୍ୟରେ ତୃତୀୟ ସ୍ଥାନକୁ ଚାଲି ଯାଇଛି ଦଳ।
ଟିଏମସି: ବାମପନ୍ଥୀଙ୍କ ସହ ଦୀର୍ଘ ଦିନ ଧରି ସଂଘର୍ଷ କରିବା ପରେ ସର୍ବପ୍ରଥମେ 2011 ରାଜ୍ୟ ବିଧାନସଭା ନିର୍ବାଚନରେ ବାଜିମାତ କରିବା ସହ କ୍ଷମତାସୀନ ହୋଇଥିଲା ଟିଏମସି । ଗତବର୍ଷ ଅନୁଷ୍ଠିତ ହୋଇଥିବା ପଞ୍ଚାୟତ ନିର୍ବାଚନରେ ଦଳକୁ ସଫଳତା ମିଳିଥିଲେ ମଧ୍ୟ ବିଜେପି ସହ କଡା ମୁକାବିଲା କରିବାକୁ ପଡିଥିଲା । ଯାହାର ପୁନରାବୃତ୍ତି 2021 ବିଧାନସଭା ନିର୍ବାଚନରେ ଦେଖିବାକୁ ମିଳିପାରେ ।
ବିଜେପି: ଧିରେଧିରେ ବଙ୍ଗ ମାଟି ଗୈରିକ ରଙ୍ଗାୟିତ ହେବାରେ ଲାଗିଛି । ଯାହା ବିଗତ ଦିନରେ ଅନୁଷ୍ଠିତ ହୋଇଥିବା ନିର୍ବାଚନ ଫଳାଫଳରୁ ସ୍ପଷ୍ଟ ହୋଇଯାଇଛି। ଏଠାରେ ନିଜର ଶକ୍ତି ବୃଦ୍ଧି କରିବାରେ ଲାଗି ପଡିଛି ଗୈରିକ ଦଳ ବିଜେପି। ଗତବର୍ଷ ଅନୁଷ୍ଠିତ ହୋଇଥିବା ପଞ୍ଚାୟତ ନିର୍ବାଚନରେ ଅନ୍ୟ ବିରୋଧି ଦଳ ଅପେକ୍ଷା ବିପୁଳ ସଫଳତା ପାଇବା ସହ ତୃଣମୂଳ ସ୍ତରରେ ନିଜର ସଙ୍ଗଠନକୁ ମଜବୁତ କରିବାରେ ଲାଗିପଡିଛି ଦଳ। ଏପରିକି ଆସନ୍ତା ବିଧାନସଭା ନିର୍ବାଚନରେ ରାଜ୍ୟରେ ସରକାର ଗଢିବା ପାଇଁ ମଧ୍ୟ ଅଣ୍ଟାଭିଡିଛି। ଏଥରର ଲୋକସଭା ନିର୍ବାଚନରେ ଦଳକୁ ମିଳିଛି ଜବରଦସ୍ତ ସଫଳତା।
ଆଉ 2 ବର୍ଷ ପରେ ପଶ୍ଚିମବଙ୍ଗରେ ହେବ ବିଧାନସଭା ନିର୍ବାଚନ। ତେବେ କିଏ ମାରିବ ବାଜି ଏବଂ କେଉଁ ରଙ୍ଗରେ ରଙ୍ଗାୟିତ ହେବ ରାଜ୍ୟ ରାଜନୈତିକ ଦୃଶ୍ୟପଟ ତାହା ଆଗାମୀ ନିର୍ବାଚନ ଫଳାଫଳରୁ ସ୍ପଷ୍ଟ ହୋଇଯିବ।
