ଚଣ୍ଡିଗଡ: ପଞ୍ଜାବର ଫରିଦକୋଟ ଜିଲ୍ଲାର କୋଟକପୁରାରେ ଦୁଇ ଜଣ ଦଳିତ ମହିଳାଙ୍କୁ କିଛି ପୁରୁଷ ରାସ୍ତାରେ ଗାଳିଗୁଲଜ କରୁଥିବା ସହ ମାଡ ମାରୁଥିବା ଘଟଣା ସାମ୍ନାକୁ ଆସିଛି । ଯାହାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି ।
ଭିଡିଓରେ ଦେଖାଯାଉଛି, ଦୁଇ ଜଣ ଦଳିତ ମହିଳାଙ୍କୁ କିଛି ଲୋକେ ରାସ୍ତାରେ ତଳେ ପକାଇ ଗାଳିଗୁଲଜ କରିବା ସହ ମାରପିଟ କରୁଛନ୍ତି । ଦୁଇ ମହିଳା ସେମାନଙ୍କୁ ଛାଡିଦେବା ପାଇଁ ଅନୁରୋଧ ମଧ୍ୟ କରୁଛନ୍ତି । ସବୁଠାରୁ ବଡ କଥା ହେଲା ଏହି ସବୁ ଘଟଣାକୁ ପ୍ରତ୍ୟକ୍ଷଦର୍ଶୀ ଅଟକାଇବା ବଦଳରେ ଘଟଣାର ମଜା ଉଠାଉଛନ୍ତି ।
ମହିଳାଙ୍କୁ ମାରପିଟ୍ କରୁଥିବା ଲୋକେ ଅକାଳୀ ଦଳର ସମର୍ଥକ ବୋଲି ଅଭିଯୋଗ ହୋଇଛି । ମହିଳାଙ୍କ ସ୍ବାମୀ ତାଙ୍କ ଶ୍ବଶୁରଙ୍କ ଦ୍ବିତୀୟ ପତ୍ନୀର ପୁଅ ହୋଇଥିବାରୁ ସମ୍ପତ୍ତି ବିବାଦକୁ ନେଇ ଶ୍ବଶୁରଙ୍କ ପ୍ରଥମ ସ୍ତ୍ରୀ ଏବଂ ତାଙ୍କ ପିଲା ଏପରି କରିଥିବା ନେଇ ଅଭିଯୋଗ କରିଛନ୍ତି ମହିଳା ।
ତେବେ ଭାଇରାଲ ଭିଡିଓ ଆଧାରରେ ଥାନାରେ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ ଜାରି ରହିଛି ବୋଲି ଫରିଦକୋଟ ପୋଲିସ କହିଛି ।
