ଭୋପାଳ: ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଓ ସଚିନ ପାଇଲଟଙ୍କ ମଧ୍ୟରେ ବଢୁଥିବା ବିବାଦକୁ ନେଇ ସୋମବାର ପ୍ରତିକ୍ରିୟା ରଖିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ରାହୁଲ କହିଛନ୍ତି ଉଭୟ ଗେହଲଟ ଓ ପାଇଲଟ କଂଗ୍ରେସର ଆସେଟ୍ ଅର୍ଥାତ ସମ୍ପତ୍ତି । ସୋମବାର ଇନ୍ଦୋରରେ ଭାରତ ଯୋଡ଼ ଯାତ୍ରା ସମୟରେ ଏକ ସାମ୍ବିଦାକ ସମ୍ମିଳନୀକୁ ସମ୍ବୋଧିତ କରି ଏହା କହିଛନ୍ତି ରାହୁଲ । କିଛି ଦିନ ଥମିବାପରେ ପୁଣି ଏହି ବିବାଦ ମୁଣ୍ଡ ଟେକିଛି ।
ରାଜସ୍ଥାନ କଂଗ୍ରେସର ଦୁଇ ପ୍ରମୁଖ ନେତାଙ୍କ ମଧ୍ୟ ସବୁକିଛି ଠିକ୍ ନଥିବା ବହୁ ପୂର୍ବରୁ ଚର୍ଚ୍ଚା ହୋଇଆସୁଥିଲା । ମାତ୍ର ଦଳୀୟ ନେତୃତ୍ବ ଏହାକୁ ଅସ୍ବୀକାର କରୁଥିଲେ । ମାତ୍ର ଦଳୀୟ ଅନ୍ତଃକନ୍ଦଳ ହାଟରେ ପଡି ଦାଣ୍ଡରେ ଗଡୁଛି ଓ କେଉଁ ମୂହୂର୍ତ୍ତରେ ଏକ ବିସ୍ଫୋରଣର ରୂପ ନେବ ଆକଳନ କରିବା କଷ୍ଟକର । ରାହୁଲ କିନ୍ତୁ ବହୁ ଚତୁରତାର ସହ ରାଜସ୍ଥାନ କଂଗ୍ରେସର ଦୁଇ ନେତାଙ୍କ ବିବାଦ ବିଷୟରେ ପ୍ରତିକ୍ରିୟା ରଖିଛନ୍ତି । ରାହୁଲ ସ୍ପଷ୍ଟ କରିଥିଲେ ଯେ, "ଏହି ନିର୍ଦ୍ଦିଷ୍ଟ ପ୍ରସଙ୍ଗ ଉପରେ ମୁଁ ଏପରି କିଛି କହିବିନାହିଁ ଯାହା କୌଣସି ବିବାଦ ସୃଷ୍ଟି କରିବ । କେବଳ ଏତିକି କହିପାରିବି ଉଭୟ ସଚିନ ପାଇଲଟ ଓ ଅଶୋକ ଗେହଲଟ କଂଗ୍ରେସର ଆସେଟ୍ ।"
ସୂଚନାଯୋଗ୍ୟ ଯେ, ଭାରତ ଯୋଡ଼ ଯାତ୍ରା ଯାହା ଏବେ ମଧ୍ୟପ୍ରଦେଶରେ ରହିଛି, ସୂଚୀ ଅନୁଯାୟୀ ଡିସେମ୍ବର ୪ରେ ରାଜସ୍ଥାନରେ ପ୍ରବେଶ କରିବ । ସେହିପରି ମଧ୍ୟପ୍ରଦେଶରେ ଯେଉଁ କଂଗ୍ରେସ ବିଧାୟକ ଦଳ ଛାଡି ବିଜେପିରେ ମିଶିବାପରେ ୨୦୨୦ରେ କମଲନାଥ ସରକାର ଭାଙ୍ଗିଯାଇଥିଲା, ସେମାନଙ୍କୁ ପୁନର୍ବାର ଦଳରେ ସ୍ଥାନ ଦିଆଯିବା ଉଚିତ୍ ନୁହେଁ ବୋଲି କହିଛନ୍ତି ।
ରାହୁଲ ଗାନ୍ଧୀ କହିଛନ୍ତି, "ଯଦିଓ ମଧ୍ୟପ୍ରଦେଶ ନେତୃତ୍ବ ଏହି ବିଷୟ ଉପରେ ବିଚାର କରିବେ, କିନ୍ତୁ ମୋର ପ୍ରସ୍ତାବ ଏହା ଯେ ଯେଉଁ ବିଧାୟକମାନେ ବିଜେପି ଠାରୁ ଟଙ୍କା ନେଇ କଂଗ୍ରେସ ସରକାର ଭାଙ୍ଗିବାରେ ସହାୟତା କରିଛନ୍ତି ସେମାନଙ୍କୁ ପୁନର୍ବାର ସ୍ଥାନ ନ ମିଳିବା ଉଚିତ୍ । ଏହା ମୋର ବ୍ୟକ୍ତିଗତ ମତ, କିନ୍ତୁ ସେମାନଙ୍କୁ ବିଜେପି କିଣି ନେଇଛି । ସେଥିପାଇଁ ସେମାନେ ବିଶ୍ବାସଯୋଗ୍ୟ ନୁହଁନ୍ତି ।"
ସାମ୍ବାଦିକ ସମ୍ମିଳନୀ ସମୟରେ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ଉତ୍ତରରେ ସାଧାରଣ ବର୍ଗଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ଉପରେ ମଧ୍ୟ ପ୍ରତିକ୍ରିୟା ରଖିଥିଲେ ରାହୁଲ ଗାନ୍ଧୀ । ଏହି ପ୍ରଶ୍ନକୁ ଏଡାଇଯିବା ସହ ରାହୁଲ କହିଥିଲେ, "ଏବେ ମୋର ସଂପୂର୍ଣ୍ଣ ଫୋକସ ଭାରତ ଯୋଡ଼ ଯାତ୍ରା ଉପରେ ରହିଛି, ଏବେ କୌଣସି ରାଜନୈତିକ ପ୍ରସଙ୍ଗରେ ନୁହେଁ । ମୁଁ ଏହାର ଉତ୍ତର ପରବର୍ତ୍ତୀ ସମୟରେ ନିଶ୍ଚୟ ରଖିବି ।"
ସେ ଆହୁରି କହିଥିଲେ ଯେ, "ଭାରତ ଯୋଡ଼ ଯାତ୍ରା ସମୟରେ କୌଣସି ରାଜନୈତିକ ପ୍ରସଙ୍ଗ କିମ୍ବା ଦଳ କଥା ଚିନ୍ତା କରୁନାହିଁ । ମୁଁ ଦିନକୁ ୨୫ କିଲୋମିଟର ଚାଲୁଛି ଓ ଲୋକଙ୍କ କଥା ଶୁଣୁଛି ।"
ବ୍ୟୁରୋ ରିପୋର୍ଟ, ଇଟିଭି ଭାରତ
