ବେଙ୍ଗାଲୁରୁ: ଟଙ୍କା ପାଇଁ ସମ୍ପର୍କରେ ଫାଟ । 40ଲକ୍ଷ ଟଙ୍କା ପାଇଁ ସ୍ବାମୀକୁ ଅପହରଣ କରିଛି ସ୍ତ୍ରୀ । ଏପରି ଘଟଣା ଘଟିଛି କର୍ଣ୍ଣାଟକର ବାଗଲାଗୁଣ୍ଚା ଥାନା ଅଞ୍ଚଳରେ । ଯାହା ସ୍ଥାନୀୟରେ ଚାଞ୍ଚଲ୍ୟ ସୃଷ୍ଟି କରିଛି ।
ସୂଚନାଅନୁସାରେ, ଥୟାଗରଜାନଗର ନିବାସୀ ସୋମଶେଖର ଏକ ଘରୋଇ କମ୍ପାନୀରେ କାମ କରନ୍ତି । ସେ ବେଙ୍ଗାଲୁରୁରେ ଏକ ଘର କିଣିବା ପାଇଁ 40ଲକ୍ଷ ଟଙ୍କା ଯୋଗାଡ କରିଥିଲେ, ଯାହା ଉପରେ ତାଙ୍କ ସ୍ତ୍ରୀଙ୍କ ଆଖି ପଡିଥିଲା । ସେ ଟଙ୍କା ପାଇଁ ସ୍ବାମୀକୁ ଅପହରଣ କରିବାକୁ ସର୍ମ୍ପକୀୟଙ୍କ ସହ ମିଶି ଯୋଜନା କରିଥି ଲା ସ୍ତ୍ରୀ । ଗତ ନଭେମ୍ବର 1 ତାରିଖରେ ସୋମଶେଖରଙ୍କୁ କୋରୋନା ରୋଗୀ କହି ଆମ୍ବୁଲାନ୍ସ ଯୋଗେ ରାସ୍ତା ଉପରୁ ଅପହରଣ କରିନିଆଯାଇଥିଲା । ଏହା ପରେ ସୋମଶେଖରଙ୍କୁ ଚାମରାଜନଗର ଫାର୍ମହାଉସକୁ ନେଇଯାଇଥିଲେ ଅପହରଣକାରୀ ।
ସେଠାରେ ତାଙ୍କ ହାତ ଗୋଡ ବାନ୍ଧି ସ୍ତ୍ରୀ ସୁପ୍ରିୟାକୁ 40ଲକ୍ଷ ଟଙ୍କା ଦେବାକୁ ବାଧ୍ୟ କରିଥିଲେ । ଏହା ପରେ ସୋମଶେଖର ଜଣେ ବନ୍ଧୁଙ୍କୁ ଡାକି ପ୍ରସ୍ତାବ ଦେଇଥିଲେ । ବନ୍ଧୁଙ୍କ ସାହାଯ୍ୟରେ ସୋମଶେଖର ଅପହରଣକାରୀଙ୍କ କବଳରୁ ଖସି ଥାନାରେ ଏକ ଅଭିଯୋଗ ଦାୟର କରିଥିଲେ ।
ତାଙ୍କ ଅଭିଯୋଗକୁ ଭିତ୍ତି କରି ପୋଲିସ ତଦନ୍ତ ଆରମ୍ଭ କରିଥିଲା । ଘଟଣାରେ ସୋମଶେଖରଙ୍କ ପତ୍ନୀ ସୁପ୍ରିୟା ସମେତ ଲତା, ଗଗନ, ବାଲାଜୀ ତେଜ ଏବଂ କିରଣ କୁମାରଙ୍କୁ ଗିରଫ କରିଛି ପୋଲିସ । ଏବେ ଯାଏଁ ଅନ୍ୟ ତିନି ଅଭିଯୁକ୍ତ ଧରା ପଡିନାହାଁନ୍ତି । ପୋଲିସ ସେମାନଙ୍କୁ ଧରିବାକୁ ତଦନ୍ତ ଜାରି ରଖିଛି ବୋଲି କହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
