ନୂଆଦିଲ୍ଲୀ: ପୂର୍ବତନ ଭାରତୀୟ ପ୍ରଶାସନିକ ସେବା ଅଧିକାରୀ ଅରୁଣ ଗୋଏଲଙ୍କୁ ନିର୍ବାଚନ କମିଶନର ଭାବେ ନିଯୁକ୍ତି ଦେବା ପ୍ରସଙ୍ଗରେ କେନ୍ଦ୍ର ସରକାରଙ୍କ ଉପରେ ପ୍ରଶ୍ନ ଉଠାଇଛନ୍ତି ସର୍ବୋଚ୍ଚ କୋର୍ଟ (Election Commissioner appointment case) । ଏହି ଗୁରୁତ୍ବପୂର୍ଣ୍ଣ ନିଯୁକ୍ତିର ସମସ୍ତ ପ୍ରକ୍ରିୟା ମାତ୍ର 24 ଘଣ୍ଟାରୁ କମ ସମୟ ମଧ୍ୟରେ ଶେଷ କରାଯାଇଛି । ଅତି ତରବରିଆ ଭାବେ ଏହି ପ୍ରକ୍ରିୟା ସାରିବାକୁ ନେଇ କେନ୍ଦ୍ର ଉପରେ ବର୍ଷିଛନ୍ତି ସର୍ବୋଚ୍ଚ କୋର୍ଟ (SC on Election Commissioner appointment)।
ଜଷ୍ଟିସ କେ.ଏମ ଜୋସେଫଙ୍କ ନେତୃତ୍ବାଧୀନ 5 ଜଣିଆ ସାମ୍ବିଧାନିକ ଖଣ୍ଡପୀଠ ଆଜି ଏହି ମାମଲାର ଶୁଣାଣି କରିଥିଲେ । ତେବେ କେଉଁ ପରିସ୍ଥିତିରେ ଏତେ ସ୍ବଳ୍ପ ସମୟ ମଧ୍ୟରେ ଏହି ଚୟନ ପ୍ରକ୍ରିୟା ଶେଷ ହେଲା? ସେଥିରେ ପାରଦର୍ଶିତା ଅବଲମ୍ବନ କରାଯାଇଛି କି ନାହିଁ ? ପ୍ରଶ୍ନ ଉଠାଇଛନ୍ତି ଖଣ୍ଡପୀଠ ।
ଖଣ୍ଡପୀଠର ନେତୃତ୍ବ ନେଉଥିବା ଜଷ୍ଟିସ ଜୋସେଫ, ଚୟନ ପ୍ରକ୍ରିୟା କେନ୍ଦ୍ର ସରକାରଙ୍କ କାର୍ଯ୍ୟଶୈଳୀକୁ ନେଇ କେନ୍ଦ୍ର ସରକାରଙ୍କୁ ପ୍ରଶ୍ନ କରିଥିଲେ । ମାତ୍ର ଗୋଟିଏ ଦିନରେ ପ୍ରକ୍ରିୟା ଆରମ୍ଭ, ସେହି ଦିନ କ୍ଲିୟରାନ୍ସ , ସେହିଦିନ ଆପ୍ଲିକେସନ ଓ ସେହିଦିନ ନିଯୁକ୍ତି ପ୍ରକ୍ରିୟା ମଧ୍ୟ ଶେଷ କରାଯାଇଛି । ଏହି ସମଗ୍ର ପ୍ରକ୍ରିୟା ମାତ୍ର 24 ଘଣ୍ଚାରୁ କମ ସମୟରେ ଶେଷ ହୋଇଛି । ପ୍ରଧାନମନ୍ତ୍ରୀ ବରିଷ୍ଠତା ଓ ଅଭିଜ୍ଞତା ଭିତ୍ତିରେ ଗୋଏଲଙ୍କ ନାମ ସୁପାରିଶ କରିଥିବା କହିଛନ୍ତି । ତେବେ ମାତ୍ର 24 ଘଣ୍ଟା ମଧ୍ୟରେ ଯଦି ବିଜୁଳି ବେଗରେ ଏହି ସମସ୍ତ ପ୍ରକ୍ରିୟା ଶେଷ କରାଯାଇ ନିଯୁକ୍ତି ଚୂଡାନ୍ତ କାରଯାଏ, ତେବେ ଏହା କି ପ୍ରକାର ମୂଲ୍ୟାଙ୍କନ ବୋଲି ଖଣ୍ଡପୀଠର ମୁଖ୍ୟ ଜଷ୍ଟିସ ଜୋସେଫ ପ୍ରଶ୍ନ କରିଥିଲେ ।
କେନ୍ଦ୍ର ସରକାରଙ୍କ ପକ୍ଷରୁ ଆର୍ଟର୍ଣ୍ଣିଂ ଜେନେରାଲ ଆର.ଭେଙ୍କଟରମଣି ମାମଲାରେ ପକ୍ଷ ରଖିଥିଲେ। ତେବେ ପ୍ରକ୍ରିୟାରେ ସମସ୍ତ ନିୟମ ଅନୁପାଳନ କରାଯିବା ସହ ସମସ୍ତ ପାରଦର୍ଶି ବ୍ୟବସ୍ଥା ଗ୍ରହଣ କରାଯାଇଥିବା ସେ କୋର୍ଟଙ୍କୁ ଅବଗତ କରିଥିଲେ । ତେବେ ପ୍ରଶ୍ନ ଅରୁଣ ଗୋଏଲଙ୍କ ବ୍ୟକ୍ତିତ୍ବ ଓ ଦକ୍ଷତା ଉପରେ ନୁହେଁ ବରଂ ତରବରିଆ ଭାବେ ନିଯୁକ୍ତି ପ୍ରକ୍ରିୟା ସମ୍ପର୍କିତ ବୋଲି ଖଣ୍ଡପୀଠ ସ୍ପଷ୍ଟ କରିଥିଲେ । ଗତକାଲି ଏହି ମାମଲାରେ କୋର୍ଟ କେନ୍ଦ୍ର ସରକାରଙ୍କୁ ପ୍ରକ୍ରିୟା ସମ୍ପର୍କିତ ସମସ୍ତ ଫାଇଲ ଦାଖଲ କରିବାକୁ ମଧ୍ୟ ନିର୍ଦ୍ଦେଶ ଦେଇଥିଲେ ।
ଭାରତୀୟ ପ୍ରଶାସନିକ ସେବା ଅଧିକାରୀ ଅରୁଣ ଗୋଏଲ ନଭେମ୍ବର 18 ରେ ନିଜ ପୂର୍ବ ଦାୟିତ୍ବରୁ ଇସ୍ତଫା ଦେବା ପରେ ଠିକ ତାର ପରଦିନ (19 ନଭେମ୍ବର) ରେ ନିର୍ବାଚନ କମିଶନର ଭାବେ ନିଯୁକ୍ତ ହୋଇଥିଲେ । 21 ତାରିଖରେ ଦାୟିତ୍ବ ମଧ୍ୟ ଗ୍ରହଣ କରିଥିଲେ ଗୋଏଲ । ମାତ୍ର 24 ଘଣ୍ଟା ମଧ୍ୟରେ ଏ ସମସ୍ତ ପ୍ରକ୍ରିୟା ଶେଷ କରିବା ନେଇ ମାମଲା ସର୍ବୋଚ୍ଚ କୋର୍ଟରେ ପହଞ୍ଚିଥିଲା । ଖଣ୍ଡପୀଠ ମଧ୍ୟ ଏପରି ଅତି ତରବରିଆ ଭାବେ ନିଯୁକ୍ତିକୁ ନେଇ ପ୍ରଶ୍ନ ଉଠାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
